(سۋرەت ازاتتىق سايتىنان الىندى)

№2 اتىراۋ قالالىق سوتىندا م. بوقاەۆ پەن ت.ايانوۆتىڭ ءىسى بويىنشا باستى سوت وتىرىسى ءوتىپ جاتىر. العاشقى كۇنى تۇستەن كەيىن قورعاۋشى تاراپ سوتقا بىرقاتار ءوتىنىش حاتتارىن وقىپ بەردى. ايتارلىعى، بۇل كورىنىس قورعاۋشىلاردىڭ اراسىنداعى ءوزارا قاراما-قايشىلىقتارعا ۇلاستى. تالعات ايانوۆتىڭ قورعاۋشىسى تولەپقالي ايانوۆ مەملەكەتتىك ايىپتاۋشىلارعا، ءوز ارىپتەسى ماكس بوقاەۆتىڭ قورعاۋشىسى جانار بالعاباەۆاعا نارازىلىق ءبىلدىردى.

«مەن ءبىر مەزگىلدە م. بوقاەۆ پەن ت. اياننىڭ قورعاۋشىسى بولىپ تابىلامىن. ويتكەنى ولارعا تاعىلعان ايىپتار بىردەي. مەنىڭ ارىپتەسىم جانار بالعاباەۆا م. بوقاەۆتىڭ قورعاۋشىسى بولىپ وتىر. ول بۇرىن قورعاۋشى ەسەبىندە رينات كيبراەۆقا زاڭگەرلىك قىزمەت كورسەتكەن. رينات كيبراەۆ بۇل ءىس بويىنشا كۋاگەر رەتىندە شاقىرىلعان. ول تەرگەۋگە تالعات ايانوۆقا قاتىستى تۇسىنىك بەرگەن. سول تۇسىنىگىندە تالعاتتىڭ الماتىدا شەرۋ ۇيىمداستىرۋ ماقساتىمەن بەلسەندىلەرمەن كەزدەسكەنىن جانە قولىندا ت. تولەشوۆتەن العان 50 مىڭ اقش دوللارى بولعانى تۋرالى ايتىپتى. ماعان ر. كيبراەۆتى قورعاعان اداممەن قاتار وتىرۋ ىڭعايسىز. ەرتەڭ ول قورعاعان ادام سوتقا كەلىپ، تۇسىنىك بەرەدى»، - دەدى سوتتا تولەپقالي ايانوۆ.

ەسكە سالا كەتسەك، سوتقا دەيىنگى تەرگەۋدە تۇسىنىك بەرگەن رينات كيبراەۆ  ت.ايانوۆ پەن م.بوقاەۆتىڭ ارام پيعىلى مەن جوسپارلارى تۋرالى، اتاپ ايتقاندا شەرۋ ۇيىمداستىرۋعا قاراجاتىنىڭ بارىن الدىن-الا بىلگەنىن ايتقان. «3 مامىردىڭ تۇنىندە مارلەن، تالعات جانە مەن ۇشەۋمىز «التىن ساراي» ساۋناسىنا باردىق. تالعات ىشىمدىك ءىشىپ وتىرىپ، وزىنە اتىراۋداعى شەرۋدى ۇيىمداستىرۋعا وڭتۇستىك قازاقستاننىڭ الدەبىر ادامدارى كومەكتەسكەنىن ماقتانىشپەن جەتكىزدى. اڭگىمەسىنەن ۇققانىم: ول الگى اقشانىڭ ءبىر بولىگىن ءوز قاجەتىنە جۇمساپ، قالعان بولىگىن مارلەنگە ساقتاپ قويۋدى تاپسىرعان»،- دەلىنگەن كۋاگەردىڭ تەرگەۋشىلەرگە بەرگەن تۇسىنىگىندە.

وزىنە ءسوز كەزەگى كەلگەندە م. بوقاەۆتىڭ قورعاۋشىسى جانار بالعاباەۆا تولەپقالي ايانوۆتىڭ ءوتىنىشىنىڭ نەگىزسىز ەكەنىن مالىمدەدى. «مەن تالعات ايانوۆقا قاتىستى تۇسىنىك بەرگەن رينات كيبراەۆتىڭ مۇددەسىن قورعادىم. ال قازىرگى سوتتا ماكس بوقاەۆتى قورعاۋعا كەلدىم. بىرىنشىدەن، ول تۇسىنىكتەردىڭ نەگىزىن تىڭداۋ كەرەك. ول جەردە قانداي دا ءبىر قايشىلىقتار بار-جوعىن سوندا كورەمىز. ەكىنشىدەن، مەن ماكس بوقاەۆتىڭ قورعاۋشىسىمىن، ەندەشە ەشقانداي قايشىلىقتار بولۋى مۇمكىن ەمەس. سوندىقتان ءوتىنىش حاتتىڭ ەكىنشى بولىگىن قاناعاتتاندىرماۋ كەرەك دەپ سانايمىن»،- دەدى ج. بالعاباەۆا.

وسىلايشا سوت باستالماي جاتىپ، قورعاۋشى تاراپتىڭ اراسىندا ءوزارا باسەكەلەستىك، جىكشىلدىك ورنادى. جانجال ۇلعايا باستاعان كەزدە قورعاۋشىلار سوتتالۋشى م.بوقاەۆپەن جانە ءوزارا ىمىراعا كەلۋ ءۇشىن ۇزىلىسكە شىعۋعا ءماجبۇر بولدى. ايتا كەتەلىك، سوتتا م. بوقاەۆ پەن ت. اياندى ازىرشە التى قورعاۋشى قورعاۋدا.

كەمەل قاراسارتوۆ

Abai.kz