سارسەنبىنىڭ ءساتتى كۇنى بارشا تالدىقورعاندىقتار ءۇشىن ۇلكەن قۋانىشپەن باستالدى. اسىرەسە، بيكەن ريموۆا اتىنداعى الماتى وبلىستىق دراما تەاتر ۇجىمى مۇشەلەرىنىڭ قۋانىشتارىندا شەك جوق. سەبەبى، جەتىسۋدىڭ باس قالاسىندا بۇرىن-سوڭدى بولماعان 3 قاباتتى زاماناۋي ۇلگىدەگى جاڭا تەاتردىڭ قازىعى قاعىلدى.

تەاتر عيماراتى تالدىقورعان قالاسىنىڭ جاڭادان بوي كوتەرىپ كەلە جاتقان وڭتۇستىك-باتىس اۋدانىندا ورنالاسپاق. عيماراتتىڭ قازىعىن قاعىپ، كاپسۋلاسىن سالۋ ءراسىمىن وبلىس اكىمى اماندىق باتالوۆپەن بىرگە قازاقستاننىڭ حالىق ارتىستەرى، بەلگىلى تەاتر جانە كينو اكتەرى دوسقان جولجاقسىنوۆ، تالانتتى رەجيسسەر تالعات تەمەنوۆ، تەاتر ءارتىسى الماحان كەنجەبەكوۆا، سونىمەن قاتار كينواكتەر الىمعازى رايىمبەك اتقاردى.

تەاتر قۇرىلىسىنىڭ باستالۋىنا وراي وتكەن سالتاناتتى شارادا وبلىس اكىمى اماندىق باتالوۆ: «ەلباسى نۇرسۇلتىن ءابىشۇلى نازارباەۆتىڭ ونەرگە دەگەن زور قامقورلىعىنىڭ ارقاسىندا وسى عيماراتتى سالۋعا قول جەتكىزىپ وتىرمىز. تاۋەلسىزدىكتىڭ 25 جىلدىعىندا تالدىقورعاننىڭ جاڭا شاعىن اۋدانىندا قۇرىلىسى ءجۇرىپ جاتقان سالتانات سارايىنىڭ، كورمە پاۆيلونىنىڭ جانىنان وسى عيماراتتارعا ساۋلەتتىك جاعىنان ۇيلەسىمى مول جاڭا دراما تەاترى دا سالىنباقشى. اكۋستيكاسى، ساحناسى، اكتەرلەر بولمەسى، تەاتر عيماراتىنىڭ وزىنە عانا ءتان باسقا دا ەرەكشەلىكتەرىنىڭ بارلىعى دا ەسكەرىلىپ، تەاتر بارلىق پارامەترلەرگە ساي، جوعارى تالعاممەن جاسالاتىن بولادى. ونەر قامقورلىق جاساعاندا عانا وسەدى. مادەنيەت پەن ونەرىمىز وركەندەپ، وسە بەرسىن، جاڭا سالىناتىن تەاتر جەتىسۋ حالقىنىڭ قۋانىشىنا قىزمەت ەتسىن»، - دەدى.

جالپى، تەاتر قۇرىلىسىنىڭ قۇنى 3 ملرد. 734 ملن. تەڭگە. قۇرىلىس جۇمىستارىن BI Group كومپانياسىنا قاراستى «ونەركاسىپ قۇرىلىس» جشس جۇرگىزەدى. عيماراتتىڭ جالپى اۋدانى 10,5 م2. قۇرىلىستىڭ اياقتالۋ مەرزىمى 2018 جىلدىڭ ماۋسىم ايىنا جوسپارلانىپ وتىر.

اباي-اقپارات