Сәрсенбінің сәтті күні барша талдықорғандықтар үшін үлкен қуанышпен басталды. Әсіресе, Бикен Римова атындағы Алматы облыстық драма театр ұжымы мүшелерінің қуаныштарында шек жоқ. Себебі, Жетісудың бас қаласында бұрын-соңды болмаған 3 қабатты заманауи үлгідегі жаңа театрдың қазығы қағылды.

Театр ғимараты Талдықорған қаласының жаңадан бой көтеріп келе жатқан Оңтүстік-Батыс ауданында орналаспақ. Ғимараттың қазығын қағып, капсуласын салу рәсімін облыс әкімі Амандық Баталовпен бірге Қазақстанның халық әртістері, белгілі театр және кино актері Досқан Жолжақсынов, талантты режиссер Талғат Теменов, театр әртісі Алмахан Кенжебекова, сонымен қатар киноактер Әлімғазы Райымбек атқарды.

Театр құрылысының басталуына орай өткен салтанатты шарада облыс әкімі Амандық Баталов: «Елбасы Нұрсұлтын Әбішұлы Назарбаевтың өнерге деген зор қамқорлығының арқасында осы ғимаратты салуға қол жеткізіп отырмыз. Тәуелсіздіктің 25 жылдығында Талдықорғанның жаңа шағын ауданында құрылысы жүріп жатқан Салтанат сарайының, Көрме павильонының жанынан осы ғимараттарға сәулеттік жағынан үйлесімі мол жаңа драма театры да салынбақшы. Акустикасы, сахнасы, актерлер бөлмесі, театр ғимаратының өзіне ғана тән басқа да ерекшеліктерінің барлығы да ескеріліп, театр барлық параметрлерге сай, жоғары талғаммен жасалатын болады. Өнер қамқорлық жасағанда ғана өседі. Мәдениет пен өнеріміз өркендеп, өсе берсін, жаңа салынатын театр Жетісу халқының қуанышына қызмет етсін», - деді.

Жалпы, театр құрылысының құны 3 млрд. 734 млн. теңге. Құрылыс жұмыстарын BI Group компаниясына қарасты «Өнеркәсіп құрылыс» ЖШС жүргізеді. Ғимараттың жалпы ауданы 10,5 м2. Құрылыстың аяқталу мерзімі 2018 жылдың маусым айына жоспарланып отыр.

Абай-ақпарат