قاۋىن-قاربىز مول تابىس كوزىنە اينالىپ كەلەدى

ماقتالى ەسەپتەلەتىن ماقتارال اۋدانىنىڭ حالقى ءبىر كەزدەرى جاپپاي «اق التىن» وسىرۋمەن شۇعىلدانىپ كەتكەن بولاتىن. بۇل جەر قۇنارلىعىن كەمىتىپ، ەروزياعا ۇشىراۋ قاۋپىن تۋعىزۋى دا مۇمكىن بولاتىن. عالىمدار مەن مامانداردىڭ دابىل قاعۋىنىڭ ارقاسىندا بۇل ۇردىسكە سوڭعى جىلدارى وزگەرىس ەنگىزىلدى. ونىڭ ۇستىنە قاۋىن-قاربىزدان دا مول پايدا تابۋعا بولاتىنىن تۇسىنگەن جەرگىلىكتى شارۋالار بۇل ونىمگە كوبىرەك كوڭىل بولە باستادى. ماقتارالدىڭ مىرزا شولىندە وسكەن قاۋىن-قاربىزدىڭ ءدامى ءتىل ۇيىرەدى. الىسقا تاسىمالداۋعا دا شىدامدى سورتتارى دا بار. سول سەبەپتى ونى وتكىزۋ دە اسا قيىنعا سوعا قويمايدى. مىنە، وسى سەكىلدى ەرەكشەلىكتەر ەسكەرىلە كەلە سوڭعى 10 جىل كولەمىندە ماقتارالدا قاۋىن-قاربىز ەگۋمەن اينالىساتىندار قاتارى كوبەيىپ، ءونىم كولەمى جىلدان جىلعا ارتۋمەن كەلەدى.    

«ماقتارالدىق ديقاندار بيىل 28 مىڭ گەكتار جەردەن 610 مىڭ توننا قاۋىن-قاربىز السا، سونىڭ 450 مىڭ تونناسىن شەت ەل نارىعىنا شىعارعان. بۇل گەكتارىنان 263 تسەنتنەردەن ءونىم الىپ، وتكەن جىلمەن سالىستىرعاندا 25 تسەنتنەرگە ارتىق قاۋىن-قاربىز جيناعان مىرزاشولدىكتەر باقشا داقىلدارىن وسىرۋدەن ورتا ازيانىڭ كوشباسشىسى ەكەندىگىن دالەلدەيدى. ماقتارالدىڭ باۋ-باقشا ونىمدەرىنەن كول-كوسىر پايدانى رەسەيلىك جانە بەلارۋستىك كاسىپكەرلەر دە كورىپ وتىر. وڭتۇستىكتەن جەتكەن قاۋىن-قاربىزدى وسى تەرىسكەيدەگى كورشىلەر باتىس ەۋروپا مەملەكەتتەرىنە تاسىمالدايدى ەكەن»،- دەپ حابارلايدى ماقتارال اۋداندىق اكىمدىگىنىڭ ءباسپاسوز قىزمەتى.

جەرگىلىكتى قالامگەرلەر وسى سوزدەرىنە دالەل رەتىندە رەسەيلىك بيزنەسمەن ستانيسلاۆ كاسپاروۆتىڭ تومەندەگى ءسوزىن كەلتىرەدى: «ماقتارالدى «قاۋىن-قاربىزدىڭ وتانى» دەپ سانايمىز. بۇل جەردىڭ قاۋىن-قاربىزىنىڭ ءدامى ەرەكشە ءتاتتى. سول سەبەپتى، ماسكەۋ مەن مينسك قالالارى وسى جەردىڭ ونىمىنە تاپسىرىس بەرەدى. ءبىز وسى جەردەن جەتكىزىپ تۇرامىز».
     جەرگىلىكتى ديقاندار وندىرگەن ونىمدەرىن ەكسپورتقا، ياعني رەسەي مەن بەلورۋسسياعا شىعارۋدا كەدەندىك كەدەرگىلەردىڭ بولماۋى كوپ جاردەمىن تيگىزىپ جۇرگەنىن ايتادى. ءيا، نەسىبەسىن جەردەن تاپقان شارۋالاردىڭ شارۋاسى الداعى ۋاقىتتا دا ءدال وسىلاي دوڭگەلەي بەرسىن دەپ تىلەيمىز. قازاقتا «ەلدە بولسا ەرىنگە تيەدى» دەگەن جاقسى ءسوز بار ەمەس پە؟ ماقتارالدا وسكەن قاۋىن-قاربىزدى وبلىسىمىزدىڭ بارلىق تۇرعىندارى تۇتىنۋمەن كەلەدى.  

Abai.kz