مينەرالدى سۋىمەن اتاعى الىسقا ۇزاعان سارىاعاش اۋدانىندا كەڭەس وداعى تۇسىندا ءجۇزىم شارۋاشىلىعى دا كەڭ ەتەك جايعانى بەلگىلى. كەيىنگى جىلدارى ءجۇزىم القاپتارى جاپپاي جويىلىپ، شارۋاشىلىقتىڭ بۇل ءتۇرىنىڭ قاناتى قىرقىلعانداي كۇي كەشكەن بولاتىن. جەر جاعدايى مەن اۋا رايى ءجۇزىم وسىرۋگە قولايلى بۇل اۋداندا سوڭعى جىلدارى بۇل ءونىم ءتۇرىن ءوندىرۋ قايتا قولعا الىنعان بولاتىن. سونىڭ ارقاسىندا بۇگىندە ءجۇزىم القابى 1891 گەكتارعا جەتتى. ونىڭ ءونىم بەرەتىن 1648  گەكتارىنان شارۋالار  بيىل 13184 توننا ءونىم الدى. ورتاشا ونىمدىلىك گەكتارىنا 80 تسەنتنەردى قۇراعان.

«جينالعان ءجۇزىمنىڭ 4 313 تونناسى اسحانالىق بولسا، 8871 تونناسى تەحنيكالىق سورتتار. بيىل جىلداعىدان مول ءونىم الىپ وتىرعاندىعىن ايتقان ديقاندار جينالعان  8871 توننا تەحنيكالىق ءجۇزىم سورتىن اۋدانداعى «Caspian Food» جشس-گى مەن «سەميرەچە» جشس-ءنىڭ شاراپ زاۋىتتارىنا وتكىزگەنىن ايتۋدا. ال قالعان ءونىم ىشكى نارىققا جانە ەلىمىزدىڭ باسقا وبلىستارى مەن 500 تونناسى رەسەي فەدەراتسياسىنا جونەلتىلگەن»، - دەپ حابارلايدى وڭتۇستىك قازاقستان وبلىستىق اكىمدىگىنىڭ ءباسپاسوز قىزمەتى.

سارىاعاشتىق شارۋالار بىلتىرعى جىلى دا 1648 گەكتار القاپتان ءجۇزىم جيناپ، ءونىم كولەمى 13 مىڭ تونناعا جەتكەن بولاتىن. ورتاشا ونىمدىلىك 79,2 تسەنتنەر بولعان. بيىلعى ءونىم بەرەكەلدىلىگى ارتقان.

Abai.kz