ۇكىمەتتىڭ جەرگىلىكتى جەرلەردە اگروكەشەندەردى دامىتۋ باعدارلاماسى اياسىندا وتكەن جىلى وڭتۇستىك قازاقستان وبلىسى وتىرار اۋدانىندا جالپى قۇنى 450 ميلليون تەڭگە، قۋاتتىلىعى 10 مىڭ توننا ءونىم قابىلداۋعا قاۋقارلى كاسىپورىن اشىلعان-دى. بۇل اۋداندا جۇگەرى داقىلىن سوناۋ 1990 جىلدارداعى كولەمگە جەتكىزۋ جانە جۇگەرى كلاستەرىن دامىتۋ بويىنشا جۇمىستار اتقارۋعا مولىنان مۇمكىندىك اشقان بولاتىن. وسى سالتاناتتى جيىندا اۋدان اكىمى س.پولاتوۆ 2020 جىلعا دەيىن جۇگەرى القابىن 15 مىڭ گەكتارعا جەتكىزۋ جونىندەگى ءىس-شارا جوسپارى بەكىتىلگەنىن ايتقان ەدى. مىنە، وسى جوسپاردى ىسكە اسىرۋ بيىلعى جىلدان باستالىپ كەتتى. وسى جىلى ديقاندار اۋدان برەندىنە اينالعان داقىل ءتۇرىن 7 مىڭ گەكتارعا ەگىپ، گەكتارىنان 120 تسەنتنەردەن ءونىم الىندى. بۇرىندارى شارۋالار جيناعان ءونىمىن كەپتىرە الماي، جازداي ەتكەن ەڭبەگى زايا كەتەتىن. ەندى شارۋالارعا ونىمدەرىن ىسىراپسىز جيناپ الۋىنا مۇمكىندىك تۋدى.

تىڭ تەحنولوگيامەن جۇمىس ىستەيتىن كاسىپورىندا الدىمەن جۇگەرى ءدانى سوبىعىنان الىنىپ، كەپتىرىلەدى. سودان كەيىن قامبالاردا ساقتالادى. كەپتىرەتىن قۇرال-جابدىقتار انگليادان، ساقتاۋ قۇرىلعىلارى قىتايدان ارنايى الدىرىلعان. كاسىپورىندا بۇگىندە 30-عا جۋىق ادام جۇمىس ىستەۋدە. ولاردىڭ كۇندەلىكتى تابىس كولەمى ورتاشا 5-8 مىڭ تەڭگەنى قۇرايدى ەكەن. الداعى ۋاقىتتا ءونىم وتكىزۋ كولەمى ارتاتىن بولسا، جۇمىسشىلار سانى دا كوتەرىلەتىن بولادى.

 جۇگەرى وڭدەۋ زاۋىتى — وتىرار اۋدانىنداعى يندۋستريالدى ايماقتا بوي كوتەرگەن العاشقى كاسىپورىن. تاياۋدا وسىندا جۇگەرى كلاستەرىن دامىتۋ اياسىندا داقىلدى تەرەڭ وڭدەيتىن قوس بىردەي ءوندىرىس وشاعى اشىلماق. بۇل جۇگەرى شارۋاشىلىعىمەن اينالىساتىن جەرگىلىكتى شارۋالار ءۇشىن جاقسى جاڭالىق بولدى.

Abai.kz