اقتوبەدەگى تەراكت وقيعاسىنا قاتىسقاندارعا ۇكىم وقىلاتىن وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى قازىر قىزۋ دايىندىق ۇستىندە دەپ حابارلايدى Nur.kz Aktobenews.kz باسىلىمىنا سىلتەمە جاساپ.

سوت توراعاسى تەراكت وقيعاسىنا قاتىستىلاردىڭ ءىسى سوتقا ءالى تۇسپەسە دە قاۋىپسىزدىكتىڭ كۇشەيتىلىپ جاتقانىن ايتتى:

ء"ىس باستالعان كەزدە ءباسپاسوز قىزمەتى ارقىلى حابارلاناتىن بولادى. 5-ماۋسىم كۇنگى وقيعاعا قاتىسى بار كۇدىكتىلەردىڭ ءىسى پروكۋراتۋرادا تەرگەۋدە بولعاندىقتان ءبىزدىڭ تاراپتان ەشتەڭە ايتا المايمىز. سەبەبى ءىس سوتقا تۇسكەن جوق. ءىستىڭ جابىق تۇردە قارالۋى دا مۇمكىن. زاڭعا سايكەس قاۋىپسىزدىكتى دە قامتاماسىز ەتۋىمىز كەرەك. سول سەبەپتى سوت وتىرىسى وتكىزىلەتىن زال ۇلكەيتىلىپ، قوسىمشا جوندەۋ جۇمىستارى جاسالدى. سوت عيماراتىنىڭ اينالاسىنداعى قاۋىپسىزدىك كۇشەيتىلدى، تەحنيكا جاڭارتىلدى. جوعارى سوت 1,5 ميلليون تەڭگە قارجىعا ءىس قاراۋعا جەڭىل بولسىن دەپ جاڭادان جازبا قۇرالدارىن، تەلەديدار، داۋىس كۇشەيتۋ قوندىرعىسى الىندى. قازىر قاجەت زاتتاردىڭ بارلىعى ساتىلىپ الىندى", — دەيدى وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىنىڭ توراعاسى نۇرلان سۇلتانوۆ.

قازىرگى ۋاقىتتا 1,5 ميلليون تەڭگەگە الىنعان جابدىقتار وبلىستىق سوت عيماراتىنا ورناتىلىپ جاتىر. سونىمەن قاتار، عيماراتتىڭ سىرتىنداعى ايىپتاۋشىلاردى الىپ شىعاتىن سوت قاقپاسى دا جاڭارتىلعان.

سوت وتىرىسىنا باق وكىلدەرى قاتىستىرىلماۋى مۇمكىن. جەرگىلىكتى تىلشىلەر تەك قىسقا تۇسىندىرمە وقىلاتىن سوت ۇكىمىنە قاتىسادى.

اباي-اقپارات