ارىس قالاسىنا قاراستى اقدالا اۋىلدىق وكرۋگىندە الما تەرۋ ناۋقانى قىزۋ ءجۇرىپ جاتىر. «اگروفيرما جاڭا اقدالا» جاۋاپكەرشىلىگى شەكتەۋلى سەرىكتەستىگىنىڭ 170گا جەرگە گوللانديالىق جانە  «سەمەريانكا» الما اعاشتارىنىڭ 2 سۇرپى وتىرعىزىلعان.

- ء«ار كوشەتتىڭ اراقاشىقتىعى - 80 سم. بيىكتىگى 3,5 مەترگە دەيىن كوتەرىلەدى. ءار ءتۇپ الما اعاشىنان 1 جىلدىڭ وزىندە 40-45 الما الىنادى. » - دەدى الما باۋىنىڭ باسقارۋشىسى ن.ەسەنقۇلوۆ.

اتالعان الما باۋدا  جەرگىلىكتى تۇرعىنداردان 50-دەن اسا ادام ەڭبەك ەتۋدە.

وڭتۇستىك ءوڭىرىنىڭ الما باعىن ەگۋگە قولايلى بولۋىنا وراي باعباندىق شارۋاشىلىقتى قولعا العان ارىستىق شارۋالار الداعى جىلدارى الما باعىنىڭ كولەمىن ۇلعايتىپ، ارىس الماسىن ەلىمىز بەن الىس-جاقىن شەتەلدەرگە تانىمال برەندكە اينالدىرۋدى كوزدەپ وتىر.

ايتا كەتەيىك، وسىعان دەيىن وڭتۇستىك قازاقستاندىق شارۋالاردىڭ قاجىرلى ەڭبەكتەرى تۋرالى جازعان بولاتىنبىز. سونىڭ ىشىندە، ماقتالى ەسەپتەلەتىن ماقتارال اۋدانىنىڭ حالقى ءبىر كەزدەرى جاپپاي «اق التىن» وسىرۋمەن شۇعىلدانىپ كەتكەن بولاتىن. بۇل جەر قۇنارلىعىن كەمىتىپ، ەروزياعا ۇشىراۋ قاۋپىن تۋعىزۋى دا مۇمكىن بولاتىن. عالىمدار مەن مامانداردىڭ دابىل قاعۋىنىڭ ارقاسىندا بۇل ۇردىسكە سوڭعى جىلدارى وزگەرىس ەنگىزىلدى. ونىڭ ۇستىنە قاۋىن-قاربىزدان دا مول پايدا تابۋعا بولاتىنىن تۇسىنگەن جەرگىلىكتى شارۋالار بۇل ونىمگە كوبىرەك كوڭىل بولە باستادى. ماقتارالدىڭ مىرزا شولىندە وسكەن قاۋىن-قاربىزدىڭ ءدامى ءتىل ۇيىرەدى. الىسقا تاسىمالداۋعا دا شىدامدى سورتتارى دا بار. سول سەبەپتى ونى وتكىزۋ دە اسا قيىنعا سوعا قويمايدى. مىنە، وسى سەكىلدى ەرەكشەلىكتەر ەسكەرىلە كەلە سوڭعى 10 جىل كولەمىندە ماقتارالدا قاۋىن-قاربىز ەگۋمەن اينالىساتىندار قاتارى كوبەيىپ، ءونىم كولەمى جىلدان جىلعا ارتۋمەن كەلەدى.    

«ماقتارالدىق ديقاندار بيىل 28 مىڭ گەكتار جەردەن 610 مىڭ توننا قاۋىن-قاربىز السا، سونىڭ 450 مىڭ تونناسىن شەت ەل نارىعىنا شىعارعان. بۇل گەكتارىنان 263 تسەنتنەردەن ءونىم الىپ، وتكەن جىلمەن سالىستىرعاندا 25 تسەنتنەرگە ارتىق قاۋىن-قاربىز جيناعان مىرزاشولدىكتەر باقشا داقىلدارىن وسىرۋدەن ورتا ازيانىڭ كوشباسشىسى ەكەندىگىن دالەلدەيدى. ماقتارالدىڭ باۋ-باقشا ونىمدەرىنەن كول-كوسىر پايدانى رەسەيلىك جانە بەلارۋستىك كاسىپكەرلەر دە كورىپ وتىر. وڭتۇستىكتەن جەتكەن قاۋىن-قاربىزدى وسى تەرىسكەيدەگى كورشىلەر باتىس ەۋروپا مەملەكەتتەرىنە تاسىمالدايدى ەكەن»،- دەپ حابارلايدى ماقتارال اۋداندىق اكىمدىگىنىڭ ءباسپاسوز قىزمەتى.

Abai.kz