باس ءمۇفتي ەرجان قاجى مالعاجىۇلىنىڭ باستاماسىمەن ءدىن قىزمەتكەرلەرى پاتەر جالداپ تۇراتىن 8 بالالى وتباسىعا جۇمىلا كوتەرىپ، ءۇي سالىپ بەردى، - دەپ حابارلايدى قمدب ءباسپاسوز قىزمەتى.

الماتى وبلىسىندا 2 بولمەلى پاتەر جالعا الىپ، كۇن كورىپ جۇرگەن وتباسىنىڭ تاعدىرى تۋرالى العاش بولىپ تەلەارنالاردا ايتىلعان بولاتىن. ءدىن قىزمەتكەرلەرى كوپبالالى انانىڭ جاعدايى تۋرالى ماتەريالدى كورگەن سوڭ بۇل ماسەلەگە بەي-جاي قاراي المادى. ناتيجەسىندە باسپانانى ارمانداعان كوپبالالى وتباسى ءۇيلى بولدى. جاڭا ۇيگە كوشكەن وتباسىنا باس ءمۇفتي ەرجان قاجى مالعاجىۇلى ارنايى بارىپ، جاعدايلارىمەن تانىسىپ، ۇيدە تۇتىنۋعا قاجەتتى دۇنيەلەردى سىي رەتىندە تابىستادى.

«بۇگىن اق تۇيەنىڭ قارىنى جارىلعان كۇن. ويتكەنى، تەلەارنالاردان كومەك سۇراعان كوپبالالى انا تۋرالى جاڭالىقتى كورگەنەن كەيىن، قول ۇشىن سوزىپ جاردەم بەرەمىز دەپ شەشتىك. ەكى جارىم ايدا وسى ءۇيدى سالىپ، وتباسىنىڭ يگىلىگىنە بەرىپ وتىرمىز. بۇل اتقارىپ جاتقان يگى جۇمىستارىمىزدى كوپشىلىككە كورسەتپەۋىمىزگەدە بولاتىن ەدى.  بىراق، بۇل جۇمىس باسقا قالتالى ازاماتتارعا عيبرات بولسا ەكەن دەگەن نيەتىمىز بار. اللا تاعالا وسى جانۇياعا بەرەكە بەرسىن. كىشتەنتاي بۇلدىرشىندەر حالقىنا قىزمەت ەتەتىن ازامات بولسىن»، – دەپ باتاسىن بەردى باس ءمۇفتي ەرجان قاجى مالعاجىۇلى.

بۇعان دەيىن پاتەر جالداپ، ءومىردىڭ تاۋقىمەتىن سەزىنگەن كوپبالالى وتباسىنىڭ وتاعاسى مارات بايسىنوۆ باس ءمۇفتي ەرجان قاجى مالعاجىۇلىنا العىس ايتىپ، ريزاشىلىعىن جەتكىزدى. جاڭادان تۇرعىزىلعان 5 بولمەلى ءۇي قالانىڭ شەت جاعىندا، نۇرا ەلدىمەكەنىندە ورنالاسسادا، وتباسى ءوز ءۇيىنىڭ بار بولعانىنا قۋانىپ وتىر.

باسپانا قيىندىعىن باستان وتكىزگەن گۇلنۇر راحىمجانقىزىنىڭ قۋانىشىندا شەك جوق. ويتكەنى، ەندى ەل قاتارلى ءومىر ءسۇرىپ، بالالارىم قوعامعا پايدالى ازامات بولىپ وسسە دەيدى. قۋانىشتان كوزىنە جاس العان كوپبالالى انا ءدىني باسقارما قايىرىمدىلىق اياسىنداعى شارالاردان قالدىرماي قولداۋ كورسەتىپ كەلە جاتقانىن جەتكىزدى.

ءوز ءسوزىن ۇيگە قالاي قول جەتكىزگەنىنەن باستاعان انانىڭ كوزىنەن قۋانىشتىڭ نۇرى انىق سەزىلەدى. ءۇيلى بولعان انا بالالار ءوز شاڭىراعىنان شىعىپ مەكتەپگە بارعانعا قۋاناتىنىن ايتادى.

«يمامدار كەلىپ ءۇي سالىپ بەرەمىز دەگەندە قاتتى قۋاندىم. قۋانىشتى حاباردى بالالارعا كەلىپ ايتقانىمدا «ۋاقىتىندا كورەمىز انا، اسىقپاڭىز» دەدى. بىراق، ءۇي سالىنىپ بولعان سوڭ العاش قونىستانعانىمىزدا بالالاردىڭ شاتتىعىندا شەك بولعان جوق. بالالار ءوز ۇيىنەن شىعىپ مەكتەپگە بارعانعا ريزا. مەكتەپكە دەيىنگى دايىندىق سىنىبىندا وقيتىن رامازان ەسىمدى بالام جەكسەنبى كۇنى «ەرتەن ساباققا بارامىن» دەپ قاتتى قۋانادى. بۇدان اسقان باقىت بارما؟! ءبىر ارالىقتا كۇيەۋىم اۋىرىپ، توسەكتەن تۇرا الماي قالعاندا قاتتى قينالدىق. 15 جىل پاتەر جالداپ تۇردىق. ىزگى جانداردىڭ دەمەۋىمەن ەندى ءبارى ارتتا قالدى. يماندى، مەيىرىمدى جاندارعا العىس ايتامىن»، – دەيدى كوپبالالى انا گۇلنۇر راحىمجانقىزى.

بۇل وتباسى ءۇشىن ەندى ءبارى ارتتا قالدى. سەبەبى بۇگىندە ول جاڭا باسپاناعا قول جەتكىزىپ، قونىس تويىن تويلاۋدا. تەك قانا باسپانا ەمەس، وتاعاسىنىڭ اۋىل شارۋاشىلىعىمەن شۇعىلدانۋعا نيەتى بارىن بىلگەن ءدىن قىزمەتكەرلەرى  بۇزاۋلى سيىر دا ساتىپ اپەرگەن. ءۇي شارۋاسىمەن اينالىساتىن وتاعاسى 2-توپتاعى مۇگەدەك. ال، جۇبايى گۇلنۇر راحىمجانقىزى قالادا ءبىر مەكەمەدە تازالىقشى بولىپ جۇمىس جاسايدى. ەندى ءدىن قىزمەتكەرلەرى كوپبالالى انانى جاقىن جەردەگى مەكەمەلەردىڭ بىرىنە تۇراقتى جۇمىسقا ورنالاستىرىپ بەرمەك.

نۇرا ەلدىمەكەنىندە ءۇي اۋىز سۋ، جارىق سەكىلدى ماسەلە ءوز شەشىمىن تاپقان. جاڭا قونىسقا كوشكەن وتاعاسى ەندى ءۇيىنىڭ الدىنا قاقپا ورناتۋدى جوسپارلاپ وتىر. ءۇي ۇلكەن جولعا جاقىن ورنالاسقان جانە مال شارۋاشىلىعىمەن شۇعىلدانۋعا قولايلى.

يگى شاراعا باس مۇفتيمەن بىرگە تالعار اۋدانى، نۇرا اۋىلدىق وكرۋگىنىڭ اكىمى دانيار كۇنگەي، الماتى قالاسىنىڭ باس يمامى نۇربەك ەسماعانبەت، قمدب ءىس باسقارۋشىسى ەربوسىن ورىن، «زەكەت» قورىنىڭ ديرەكتورى الىشەر سپانوۆ قاتىستى.

Abai.kz