قازاقستاندا قۇلاعالى تۇرعان جاتاقحانا تۇرعىندارى باسپانادان قۋماۋىن سۇرايدى
باتىس قازاقستان وبلىسىنىڭ اقساي قالاسىنداعى قۇلاعالى تۇرعان جاتاقحانا تۇرعىندارى 4 قازان كۇنى وبلىستىق اكىمدىك عيماراتى الدىنا جينالدى. حالىق اۋدان بيلىگى ۇسىنعان ۋاقىتشا باسپانانىڭ ناشارلىعىنا نارازىلىق ءبىلدىرىپ، بولمەلەرىن جەكەشەلەندىرۋگە رۇقسات بەرۋىن سۇرادى.
ولار ءورت قاۋىپسىزدىگى مەن تازالىق ەرەجەلەرىنە ساي ەمەس عيماراتتى تاستاپ كەتپەي وتىر.
باستاماشىل توپ وكىلدەرىمەن وبلىس اكىمىنىڭ ورىنباسارى مارات توقجانوۆ كەزدەسىپ، جاتاقحانا تۇرعىندارىنا "ەشكىم دالادا قالمايدى" دەگەن ۋادە بەردى. بىراق اكىمنىڭ ورىنباسارى تۇرعىنداردىڭ ءبارى "مەملەكەتتەن باسپانا الا المايتىنىن" ەسكەرتتى.
باستاماشىل توپ پىكىرى ەكىگە جارىلدى. ولاردىڭ ءبىر بولىگى جاتاقحانادان قۋماۋىن سۇراسا، قالعاندارى ۋاقىتشا باسپانادا تۇرۋعا كەلىستى، بىراق تۇرعىندار ۆاحتالى اقساي قالاشىعىنداعى بيلىك ۇسىنعان باسپاناعا كوڭىلدەرى تولمايدى.
بيلىك وكىلدەرىنىڭ ايتۋىنشا، جاتاقحانا كەز كەلگەن ۋاقىتتا قۇلاپ ءتۇسۋى مۇمكىن. قازىرگى تاڭدا بۇل عيماراتتا 76 وتباسى - شامامەن 200-دەي ادام تۇرىپ جاتىر، ولاردىڭ 67-ءى وسى جاتاقحانادا تىركەلگەن.
اباي اقپارات
