وڭتۇستىك قازاقستاندا «ۋچاسكە» رەسپۋبليكالىق جەدەل الدىن الۋ ءىس-شاراسى 2 تاۋلىك بويى جۇرگىزىلىپ، وبلىس اۋماعىنداعى 7993 پاتەر مەن جەكە ۇيلەر، سونداي-اق، ىشكى ىستەر ورگاندارى ەسەبىندە تۇرعان 1008 ازامات  مەكەنجايى بويىنشا تەكسەرىلدى.

ەكى كۇندىك شارا ناتيجەسىندە، جالپى 1509 اكىمشىلىك قۇقىقبۇزۋشىلىق انىقتالدى. ونىڭ 623 دەرەگى «نولدىك توزىمدىلىك» قاعيداتى بويىنشا تىركەلسە، 886 جاعداي جول قوزعالىسى قاۋىپسىزدىگىن بۇزۋ بويىنشا ورىن الدى.

سونىمەن بىرگە، 68 وقيعا قوعامدىق كولىك جۇرگىزۋشىلەرىنىڭ تاراپىنان ورىن العان جاعداي بولسا، 190 اكىمشىلىك قۇقىقبۇزۋشىلىق الىپ جۇرۋگە قولايلى بەينەجەتوندارعا قاتىستى تىركەلدى.  

شارا كەزىندە اۆتوۋراگان قوندىرعىسىنىڭ كومەگىمەن جول قوزعالىسى ەرەجەسىن بۇزعاندار تاراپىنان 466 مىڭ تەڭگە ايىپپۇل ءوندىرىلىپ، 12 قىلمىستىڭ بەتى اشىلدى. وعان قوسا، سەندەلىپ جانە قايىرشىلىق جاساپ جۇرگەن 18 ءجاسوسپىرىم قۇرىقتالىپ، ونىڭ 8-ءى جاسوسپىرىمدەردى بەيىمدەۋ ورتالىعىنا ورنالاستىرىلدى.

سونىمەن قاتار، مال ۇرلىعىن انىقتاۋ جانە جولىن كەسۋ ماقساتىندا جەرگىلىكتى پوليتسيا قىزمەتى، پروكۋراتۋرا جانە مال دارىگەرلىك قىزمەتى وكىلدەرىنەن جۇمىس توبى قۇرىلىپ، وبلىس جانە شىمكەنت قالاسى اۋماعىنداعى مال بازارلارىنا تەكسەرۋ جۇرگىزىلدى. مال تاسمالداۋ بارىسىندا قر جقە بۇزعان 10 اۆتوكولىك جۇرگىزۋشىسى اكىمشىلىك جاۋاپكەرشىلىككە تارتىلىپ، 2 جۇك كولىگى اقىلى ايىپتۇراققا قويىلدى. وبلىستاعى مال بازارلارىنا تاسمالدانىپ جاتقان 497 قارا، 741 ۇساق جانە 285 جىلقى مالدارىنا  تەكسەرۋ جۇرگىزىلدى.

ەسكە سالايىق، 2016 جىلدىڭ قىركۇيەك ايىنان باستاپ وڭتۇستىك قازاقستان وبلىسىنىڭ اۋماعىندا «ۋچاسكە» رەسپۋبليكالىق جەدەل-الدىن الۋ ءىس-شاراسى وتكىزىلۋدە. 

وقو ءىىد جپق ءباسپاسوز قىزمەتى