شەتەلدىك فيلمدەر تۇتاس مەملەكەتتىك تىلگە ءتارجىمالانسىن دەگەن دەپۋتاتتاردىڭ باستاماسى ولاردى، ءتىپتى، شوشىندىرىپ وتىر. ويتكەنى ونداي كينونىڭ قالادا كورەرمەنى جوق ەكەن. قازاق ءتىلدى قاۋىم، كوبىنە، اۋىلداردا دەپ سىلتاۋراتقاندار قاراپايىم اۋدارمانى دا «قازاقتىڭ ءسوزى كوپ» دەپ اۋىرسىنۋدا.   

بۇل تۋرالى كتك حابارلاپ وتىر.

نۇرتاي سابيليانوۆ, ءماجىلىس دەپۋتاتى:

-قالاي اۋدارادى، قالاي ىستەيدى ول وزدەرىنە بايلانىستى بولۋ كەرەك دەپ ويلايمىن! قارجىنى تابۋ كەرەك! ويتكەنى بىزدە مەملەكەتتىك ءتىلى-قازاق ءتىلى! ول مىندەتتى تۇردە اۋدارىلۋى كەرەك! دۋبلياج جاساۋدى  سول 2012-ءشى جىلدان باستاپ ەنگىزگەن كەزدە، كوبى  قارسى بولاتىن وسىعان. 

قازىر دە قارسى! نۇرتاي ءسابيليانوۆتىڭ سوزدەرى ءتىل جاناشىرلارىنا جاققانىمەن، كينوپروكاتشىلارعا جاقپاي قالدى. ويتكەنى، سىرتتان كەلەتىن فيلمدەردى قازاقشا سويلەتۋ قالادا ءتيىمسىز ەكەن. ال كينوتەاتر ءىشى تولماعان سوڭ، ولاردى ءتارجىمالاۋدىڭ دا قاجەتى جوق دەيدى.

ۆاديم گولەنكو, كينوپروكاتشى:

-بۇل العا دەپ ۇرانداتا بەرەتىن پاتريوتتاردىڭ الەگى. قازاقشا قاجەت دەگەنىمەن، ونىڭ قيىندىقتارىن ايتىپ تاۋىسۋ مۇمكىن ەمەس. ءبىر كينونى دۋبلياجداۋ ءۇشىن ميلليونداعان قارجى جۇمسالادى،داۋىس سوناۋ لوندوندا جازىلادى. ال ونداي كينولاردىڭ كورەرمەنى جوق. سوندىقتان، بۇل بارىپ تۇرعان شىعىن.

كينوپروكاتشىلار گولليۆۋد فيلمدەرىنە قازاقشا ءسۋبتيتردى دە جولاتقىسى جوق. ايتۋلارىنشا، اعىلشىن تىلىنەن اۋدارعاندا قازاقتىڭ ءسوزى كوبەيىپ كەتەتىن كورىنەدى. ءارى ونى دىبىستايتىن اكتەرلەر دە تىم كوپ اقى سۇرايدى ەكەن. وسىلاي دەپ سان سىلتاۋدى العا تارتقاندار تۇپتەپ كەلگەندە ءتارجىمالاۋ ءۇشىن مەملەكەتتەن تەڭگە سۇراپ وتىر. بۇل قازاق تىلىنە اۋدارىلعان ىلۋدە ءبىر فيلم عانا. ونىڭ وزىندە «مالەفيسەنتا» ەرتەگىسى مەملەكەتتىك ەسەبىنەن تارجىمالانعان. مۇنداي تۋىندىلار كينوسىنشىلارعا دا ۇناپ وتىر. بىراق، قازاق كينوسىنا دا قولداۋ بولسا ەكەن دەيدى.

گۇلنار ابىكەەۆا، كينوتانۋشى:

-وسىنداي قۇلشىنىسپەن دەپۋتاتتار قازاق كينوسىن قولداسا عوي. وتاندىق كارتينالاردى پروكاتقا كوبىرەك شىعارىپ، ولاردى قارجىلاندىرىپ، سوندا قازاق ءتىلدى  كارتينالار وركەندەر ەدى. مەملەكەتتىك ءتىلدىڭ دە مەرەيى ۇستەم بولار ەدى.

تانىمال كينوسىنشىنىڭ ايتۋىنشا ەلىمىزدە جىلدا قازاق تىلىندە 20 شاقتى كينو تۇسىرىلەدى ەكەن. بىراق بىردە-بىرەۋى قولداۋ تاپپاي، سول كۇيى كينوپروكاتقا شىقپاي قالادى. ال ماسەلەن، فرانتسيادا كەرىسىنشە. فرانتسۋز تىلىندەگىلەرىنەن باسقاسى مۇلدە كورسەتىلمەيدى.

راشيد نۇعمانوۆ, رەجيسسيور:

-فرانتسيادا ەگەر فيلم فرانتسۋز تىلىندە بولماسا، وندا ول مۇلدەم كورسەتىلمەيدى. سوندىقتان، كينونى كورسەتكىسى كەلگەندەر ونى ۇنەمى سۋبتيترگە اۋدارىپ وتىرادى.

شەتەل تۋىندىلارىن قازاقشالاۋ تۋرالى زاڭ وسىدان ءتورت جىل بۇرىن دا قابىلدانعان. بىراق، ول كەزدە ەشكىم دە پىسقىرىپ قارامادى. الايدا بۇل جولى دەپۋتاتتار كينوپروكاتقا شىنداپ كىرىسكەلى وتىر.

بەكبولات تىلەۋحان، ءماجىلىس دەپۋتاتى:

– جوق ،ونى سۋبتيترعا بەرەسىز، بىراق كۇندىزگى ۋاقىتقا قويىپ قويادى. ونى بىلايشا ايتقاندا يت جۇلىمىن شىعارايىن دەپ وتىر عوي.