قازاقستاندىق بالالار كۇنى كەشەگە دەيىن مەكتەپتە «پرەزيدەنتىمىز – پۋتين» دەپ ساباق وتەتىن. تاۋەلسىزدىك الدىق، ازاتتىققا قول جەتكىزدىك دەپ بوركىمىزدى اسپانعا اتىپ جۇرگەنىمىزدى قايتەيىك، ەگەر وزىڭنەن تۋعان ۇلىڭ وزگە ەلدىڭ باسشىسىن پرەزيدەنتىم دەپ تانىپ، ءانۇرانىنىن ايتىپ، تۋىنا ءتاۋ ەتىپ جاتسا. بۇلاي بولۋىنىڭ سەبەبى نەدە؟ بايقوڭىرداعى بارلىق مەكتەپ قازاقستاندىق ستاندارتقا سايكەس وقىتپايتىن. رەسەيدىڭ نەگىزىندە ءبىلىم بەرەتىن. مەكتەپتەرى دە، وقۋلىقتارى دا قازاقستاننىڭ يەلىگىندە ەمەس-ءتىن. سودان كەلىپ جەر كىندىگى سانالاتىن جۇلدىزدى قالاشىقتاعى بالالار «پرەزيدەنتىمىز – پۋتين» دەمەگەندە قايتسىن؟!، - دەپ جازادى "ەگەمەن قازاقستان" گازەتىنىڭ ءتىلشىسى.

تاۋەلسىزدىك العانىمىزعا شيرەك عاسىر ۋاقىت تولعانعا دەيىن وسىلاي بولىپ كەلدى. سەڭ ەكى جىل بۇرىن عانا قوزعالدى. سودان قازاقستان مەن رەسەي اراسىندا ۇكىمەتارالىق كوميسسيا قۇرىلىپ، بايقوڭىردىڭ ماسەلەسى قايتا قارالا باستادى. قوس ەلدىڭ ۇكىمەت مۇشەلەرى بىرنەشە وتىرىس وتكىزىپ، قالاداعى پروبلەمالاردى بىرلەسە شەشۋدىڭ جولدارىن قاراستىردى. سونىڭ ناتيجەسىندە بايقوڭىر قالاسىندا 6 مەكتەپ پەن ءبىر بالاباقشا قازاقستاندىق ستاندارتتا ءبىلىم بەرۋگە كوشتى. سوڭعى ماسكەۋدە وتكەن ماجىلىستە ءبىراز ماسەلە شەشىمىن تاپتى. رەسەي تاراپىنان ۇكىمەت توراعاسىنىڭ ورىنباسارى دميتري روگوزين جانە قازاقستان جاعىنان سول كەزدەگى پرەمەر-ءمي­نيستردىڭ ءبىرىنشى ورىنباسارى باقىتجان ساعىنتاەۆ توراعالىق جاسادى. ماجىلىستە «بايقوڭىر» كەشەنىنىڭ قىزمەتىنە جانە بىرىككەن جوبالاردى جۇزەگە اسىرۋدىڭ كوكەيتەستى ماسەلەلەرى، سونداي-اق كەشەندى بىرلەسىپ پايدالانۋ جونىندەگى «جول كارتاسىنىڭ» ورىندالۋ بارىسى، بايقوڭىر قالاسىنىڭ، تورەتام مەن اقاي اۋىلدىق وكرۋگتەرىنىڭ ينفراقۇرىلىمىن دامىتۋ، كەشەننىڭ نىساندارى مەن مۇلىكتەرىن ساقتاۋ ماسەلەلەرى قارالدى.

مەملەكەتارالىق كەلىسىمدەرگە سايكەس باي­قوڭىر قالاسىندا 2007 جىلى قازاقستاننىڭ ەسەبىنەن 80 ورىندىق پەرزەنتحانا، اۋىسىمىنا 100 ادام قابىلدايتىن ايەلدەرگە كەڭەس بەرۋ ءۇيىنىڭ قۇرىلىسى باستالعان ەدى. قۇرىلىس 2010 جىلدىڭ سوڭىندا اياقتالدى. بىراق رەسەي تاراپى ءارتۇرلى سەبەپتەرمەن عيماراتتى ءوز تەڭگەرىمىنە الۋدى وسى ۋاقىتقا دەيىن شەگەرىپ كەلەدى. ال 2015 جىلدىڭ تامىزىندا رەسەي ۇكىمەتى رەسمي تۇردە ونى ءوز تەڭگەرىمىنە الۋدان باس تارتتى. مۇنداي جاعدايدا قازاقستان تاراپى وسى نىسان نەگىزىندە قازاقستاندىق ازاماتتارعا قىزمەت كورسەتەتىن مەديتسينالىق مەكەمە اشۋعا دايىن ەكەندىگىن بىلدىرگەن ەدى. وسى ماجىلىستە بۇل ماسەلە تۇپكىلىكتى شەشىمىن تاپتى. وبلىس اكىمدىگىنىڭ باستاماسى بويىنشا ۇكىمەتارالىق كوميسسيانىڭ ءماجىلىسى شەڭبەرىندە بايقوڭىر قالاسىندا قازاقستاندىق مەديتسينالىق ۇيىم اشۋ جونىندە شەشىم قابىلداندى.

اتالعان ەمحانا تامىز ايىنان باستاپ ءوز جۇمىسىنا كىرىستى. ورتالىق عيماراتىنىڭ قۇرىلىسىنا 1 ميلليارد تەڭگەدەن استام قاراجات جۇمسالعان. سولتۇستىك اۋدانداردا تۇراتىن 240 مىڭ حالىق ەندى دەرتىنە شيپا ىزدەپ وبلىس ورتالىعىنا سابىلمايتىن بولدى. بارلىق مەديتسينالىق كومەك بايقوڭىر قالاسىندا جاسالا بەرەدى.

ماسكەۋدەگى ماجىلىستە «بايقوڭىر» كەشەنىندەگى 14 نىساندى قىزىلوردا وبلىسىنىڭ كوممۋنالدىق مەنشىگىنە بەرۋ ماسەلەلەرى قارالدى. ولار شاعىن جانە ورتا بيزنەستىڭ دامۋىنا جانە بايقوڭىر قالاسى تۇرعىندارىنا قولايلى جاعداي جاساۋ ماقساتىندا قىزمەت ەتەدى. اينالاسى از عانا ۋاقىت­تىڭ ىشىندە التى مەكتەپ پەن ءبىر بالاباقشا قازاقستان تاراپىنا ءوتىپ، بىرنەشە اۋدانعا قاتار قىزمەت كورسەتەتىن مەديتسينالىق ورتالىق اشىلىپ، ونداعان نىسان ءبىزدىڭ يەلىگىمىزگە بەرىلدى. بۇل – ۇلكەن ەڭبەكتىڭ ناتيجەسى. ال وسىنى ەلدىڭ بەرەكەسى دەمەي كورىڭىز؟

ەرجان بايتىلەس

Abai.kz