بيىل جىلدىڭ قورىتىندى ەسەبى بويىنشا، وڭتۇستىك قازاقستان وبلىسىنىڭ اكىمى تاپسىرماسىمەن مال شارۋاشىلىعىن دامىتۋدىڭ 2014-2016 جىلدارعا ارنالعان ءىس-شارا جوسپارى پىسىقتالدى. وبلىستىق اۋىل شارۋاشىلىعى باسقارماسى، كاسىپكەرلىك جانە يندۋستريالدى-يننوۆاتسيالىق دامۋ باسقارماسى جانە «ماكسيمۋم» ايماقتىق ينۆەستيتسيالىق ورتالىعىمەن بىرلەسە دايىندالعان قۇجات ايماقتاعى مال شارۋاشىلىعىن دامىتۋعا تىڭ سەرپىن بەرمەك. بۇل تۋرالى وقو اكىمدىگىنىڭ ءباسپاسوز قىزمەتىنە سىلتەمە جاساي وتىرىپ، «اباي اقپارات» پورتالى  حابارلايدى.  

«وڭتۇستىك قازاقستان وبلىسىندا ەتكە دەگەن قاجەتتىلىك جىلىنا 90 مىڭ توننا، ال سۇتكە سۇرانىس 450,7 مىڭ توننانى قۇرايدى. بۇگىنگى تاڭدا مۇنداي قاجەتتىلىك قاناعاتتاندىرىلعانىمەن، حالىق سانىنىڭ ارتۋىنا بايلانىستى مال شارۋاشىلىعى ونىمدەرىنە دەگەن سۇرانىس ءوسىپ كەلەدى. ونىڭ ۇستىنە، وبلىستىڭ الەۋمەتتىك-ەكونوميكالىق دامۋى ءۇشىن ەت ونىمدەرىن رەسپۋبليكانىڭ باسقا وبلىستارىنا، شەتەلدەرگە ەكسپورتتاۋ ۇلكەن ماڭىزعا يە»، — دەلىنگەن ءباسپاسوز حابارلاماسىندا.

جەلتوقسان ايىنداعى مالىمەتتەرگە، قاراعاندا، وبلىستا قايتا وڭدەۋ بويىنشا «FoodMaster» اق، «اتامەكەن» جشس، «سايرام ءسۇت» جشس سياقتى جالپى سانى 31 كاسىپورىندار شوعىرلانعان. وندا جالپى وبلىستا وندىرىلەتىن 653 مىڭ توننا ءسۇتتىڭ 22,8 پايىزى قايتا وڭدەلەدى.  ال ءۇش تاراپتان ازىرلەنگەن باعدارلاما نەگىزگى ءۇش باعىتتا جۇزەگە اساتىن بولادى. ولاردىڭ قاتارىنا وبلىستا بار ءسۇت تاۋارلى فەرمالاردىڭ مال باسىن اسىلداندىرۋ، شاعىن ۇلگىلىك-وتباسىلىق فەرمالاردى ۇيىمداستىرۋ، ءىرى قارا مال بورداقىلاۋ الاڭدارىن قۇرۋ سياقتى ءىس-شارالار ەنىپ وتىر. بۇل ءىس-شارا جوسپارىن قارجىلاندىرۋدىڭ نەگىزگى قارجىلىق وپەراتورى قىزمەتىن «ماكسيمۋم» ايماقتىق ينۆەستيتسيالىق ورتالىعى مەن «ىرىس» شاعىن نەسيە ۇيىمى ارقىلى جۇزەگە اسىراتىن بولادى. بۇل رەتتە «ماكسيمۋم» ورتالىعى ارقىلى 4 ملرد. تەڭگە كولەمىندە قاراجات قاراستىرىلعانى بەلگىلى بولدى.  وبلىستىڭ ەكونوميكاسى ءۇشىن ماڭىزدى سانالاتىن جوسپاردى جۇزەگە اسىرۋ ارقىلى جىل سايىن 9,1 ملرد. تەڭگەنى قۇرايتىن مال شارۋاشىلىعى ونىمدەرىن ءوندىرۋ مۇمكىندىگى تۋادى.

Abai.kz