ماقتارالدىقتار كەلەسى جىلى بيىلعىدان دا ارتىق ماقتا جيناۋعا نيەتتەنىپ وتىر، - دەپ حابارلايدى اباي-اقپارات.

ىشكى ءونىمىنىڭ باسىم بولىگىن ديحانشىلىقتان الاتىن ماقتارالدىقتار كوكشە بايلىعىن قىستىڭ كوزى قىراۋعا ۇرىندىرماي، جيىپ-تەرىپ كوڭىلى جايلاندى. الا جازداي تەر توگىپ، جەردىڭ قىرتىسىنان نەسىبە ايىرعانداردىڭ ەڭبەكتەرى ەلەنىپ، ماراپاتقا بولەندى.

ماقتارال اۋدانىنىڭ شارۋالارى بيىل اق التىن القاپتارىن ۇلعايتتى. ماقتا ءونىمى ورتا ەسەپپەن 27-28 تسەنتنەردەردى قۇراپ، باعاسى 160 تەڭگەدەن اسىپ ءتۇستى. شارۋاشىلىعىنىڭ باسىم بولىگىن وسى داقىل قۇرايتىن شارۋالاردىڭ بيىل ايى وڭىنان تۋدى. وڭىرىمىزدە وندىرىلگەن ماقتانىڭ 80 پايىزى ماقتارالدىقتاردىڭ ەنشىسىندە.

شالعاي اۋداننىڭ ەڭبەكقور حالقى جەمىس-جيدەك ءوسىرۋدى دە جەتىك مەڭگەرگەن. الما، ءجۇزىم شارۋاشىلىقتارىنىڭ  دا  جىل ساناپ، القابى ۇلعايۋدا. 

اپتاپ ىستىقتا باقشادا ءجۇرىپ، بەينەت ەتۋدەن قاشپايتىن مۇنداعى ديحانداردىڭ ءبىر-اق ماسەلەسى بار. شىلىڭگىر شىلدەدە كەيبىر شارۋاشىلىقتارعا اعىن سۋدى جەتكىزۋ - قيامەتتىڭ قايىمى. الايدا، الداعى جىلدارى قوسىمشا كانالدار ارقىلى بۇل ماسەلەنىڭ شەشىمى تابىلاتىن سىڭايلى. اۋدان اكىمىنىڭ سوزىنە سەنسەك، كەلەر جىلى اۋداندا سۋ تاپشىلىعى بولمايتىن بولدى. اق التىنعا مولىنان قارىق بولعان ديقاندار، كەلەسى جىلى بيىلعىدان دا ارتىق ماقتا جيناۋعا نيەتتەنىپ وتىر. سەبەبى ءونىمدى توكپەي-شاشپاي جيناۋ، ءوسىرۋ تاجىريبەسى جىلدان –جىلعا ارتۋدا.

اباي-اقپارات