بۇگىن جاڭا جىل قارساڭىندا شىمكەنتتەگى ق.تولەمەتوۆ كوشەسىندە 2 كوپقاباتتى تۇرعىن ءۇي پايدالانۋعا بەرىلدى.  سالتاناتتى شاراعا وبلىس اكىمى جانسەيىت تۇيمەباەۆ قاتىسىپ، 96 وتباسىعا  پاتەر كىلتىن تابىستادى.

7 قاباتتى قوس ءزاۋلىم تۇرعىن ءۇيدىڭ قۇرىلىسىن  «وتاۋ ستروي» كومپانياسى جۇرگىزگەن. نەگىزگى تاپسىرىس بەرۋشى -  «قازاقستان يپوتەكالىق كومپانياسى» يپوتەكالىق ۇيىمى.

«جاڭا جىل قارساڭىندا قونىستانعالى وتىرعان باسپانالارىڭىز قۇتتى بولسىن. بۇل ۇيلەردى مەملەكەت سىزدەرگە دەلدالدارسىز جانە نەسيەگە بارىنشا تومەن پايىزبەن ۇسىنىپ وتىر. ۇزاق مەرزىمدى جالعا بەرىلىپ وتىرعان باسپانالاردىڭ  ساتىپ الۋ قۇنى دا ارزان. مەملەكەتتىڭ وسىنداي ىگى ىستەرى الداعى ۋاقىتتا دا جالعاسىن تاباتىن بولادى»،- دەدى وبلىس اكىمى جانسەيىت تۇيمەباەۆ.

جاڭا پاتەرگە جايعاسقانداردىڭ باسىم كوپشىلىگىن كوپ بالالى جانە مۇگەدەك بالالارى بار وتباسىلار قۇرايدى.  سونداي-اق، جاڭا قونىسقا قول جەتكىزگەندەردىڭ اراسىندا جەتىم بالالار مەن ورالماندار، مەملەكەتتىك قىزمەتكەرلەر مەن  بيۋدجەتتىك مەكەمە قىزمەتكەرلەرى دە  بار. مۇنداعى تۇرعىن ۇيلەردىڭ ءار شارشى مەترى ءۇشىن جىلدىق تولەم 900 تەڭگەدەن اسپايدى. 20 جىل مەرزىم اياقتالعاندا پاتەرلەر ازاماتتاردىڭ مەنشىگىنە اينالادى.  

جالپى، «نۇرلى جول" مەملەكەتتىك باعدارلاماسى مەن "وڭىرلەردى دامىتۋدىڭ 2020 جىلعا دەيىنگى باعدارلاماسى" ىسكە اسا باستاعاننان-اق «قازاقستان يپوتەكالىق كومپانياسى» شىمكەنت قالاسىندا 2541 پاتەردى  ساتىپ العان.

اباي-اقپارات