وقو-دا وندىرىلگەن ەت «حالال» ستاندارتىنا سايكەستەندىرىلىپ، مۇسىلمان ەلدەرىنە ەكسپورتتالادى. بۇل وڭتۇستىك قازاقستان وبلىسىنىڭ بيىلعى جىلىنىڭ باستى جاڭالىقتارىنىڭ ءبىرى، - دەپ حابارلايدى اباي-اقپارات وبلىس اكىمدىگىنىڭ ءباسپاسوز قىزمەتىنە سىلتەمە جاساپ.

بايدىبەك اۋدانىندا دۋبايلىق «AMK METAL FZCO» مەتاللۋرگيالىق كومپانياسى ءوز بيزنەسىن ءارتاراپتاندىرۋ ماقساتىندا اگروونەركاسىپتىك كەشەن سالاسىندا ەڭ ءىرى جوبانى جۇزەگە اسىرماق، - دەپ حابارلايدى وبلىس اكىمدىگى.

جالپى قۇنى 30 ملن. اقش دوللارىن قۇرايتىن جوبا اياسىندا دۋبايلىق ينۆەستورلار 20 مىڭ باس ءمۇيىزدى ءىرى قاراعا ارنالعان بورداقىلاۋ الاڭى مەن جىلدىق قۋاتتىلىعى 5 مىڭ توننا بولاتىن ەت وڭدەۋ زاۋىتىن سالماقشى.

«بۇگىندە جوبانى جۇزەگە اسىرۋدىڭ شارتتارى مەن ەگجەي-تەگجەيلى تەتىكتەرى وڭتۇستىك قازاقستان وبلىسىنىڭ جەتەكشىلىگى دەڭگەيىندە تالقىلانىپ، بايدىبەك اۋدانىنان 17 مىڭ مال جايىلىمدىق جەر مەن 2 مىڭ گەكتار سۋارمالى جەر، سونداي-اق، زاۋىت سالۋ ءۇشىن اۋدانداعى يندۋستريالدى ايماقتان 5 گەكتار جەر تەلىمى بولىنۋدە»، - دەلىنگەن حابارلامادا.

جوبانىڭ ەرەكشەلىگى سول، مۇندا وندىرىلگەن ەت «حالال» ستاندارتىنا سايكەستەندىرىلىپ، ونىڭ باسىم بولىگى مۇسىلمان ەلدەرىنە ەكسپورتتالماق. بۇل اۋىل شارۋاشىلىعى كاسىپورىندارىنا، ونىڭ ىشىندە قاراپايىم شارۋالارعا ءوز ءونىمىن تۇراقتى تۇردە قىمبات باعادا ەكسپورتتاۋعا مۇمكىندىك بەرەدى.

ايتا وتەيىك، بىرىككەن اراب امىرلىگىندە تىركەلگەن «AMK METAL FZCO» كومپانياسى 20 جىلدان بەرى «ارسەلورميتتال تەمىرتاۋ» اق-مەن تىعىز بايلانىستا جۇمىس ىستەپ كەلە جاتقان كاسىپورىن. اتالمىش كومپانيا تەمىرتاۋ مەتاللۋرگيا كومپانياسىنان جىل سايىن جالپى سوماسى 400 ملن. اقش دوللارىن قۇرايتىن ءونىم ساتىپ الادى.  

اباي-اقپارات