«نۇرلى جول» باعدارلاماسى بويىنشا 11 ايدا 435 ملرد تەڭگە يگەرىلدى

«نۇرلى جول» باعدارلاماسى بويىنشا بولىنگەن قاراجات رەسپۋبليكالىق دەڭگەيدە تولىق كولەمدە دەرلىك يگەرىلەدى. بۇل تۋرالى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسىنداعى ءوز بايانداماسىندا قارجى ءمينيسترى باقىت سۇلتانوۆ ايتىپ ءوتتى. 

«بيىلعى جىلدىڭ 11 ايىندا «نۇرلى جول» باعدارلاماسى بويىنشا 435 ملرد تەڭگە نەمەسە جىلدىق كولەمنىڭ 92% -ى يگەرىلدى. جىل بويىنشا رەسپۋبليكالىق دەڭگەيدە ورىندالۋ كولەمى شامامەن 99,9% بولادى دەپ كۇتىلۋدە»، - دەدى قارجى ۆەدومستۆوسىنىڭ باسشىسى.

ب. سۇلتانوۆتىڭ ايتۋىنشا، جەرگىلىكتى ورگاندار 215,5 ملرد تەڭگەنى نەمەسە بەرىلگەن قاراجاتتىڭ 94,5%-ىن يگەرگەن، 12 ملرد تەڭگە يگەرىلمەگەن. يگەرىلمەگەن قاراجاتتىڭ ەڭ كوپ كولەمى ماڭعىستاۋ مەن اقتوبە وبلىستارىندا بايقالادى. اۋتسايدەرلەر قاتارىندا الماتى، اقمولا جانە اتىراۋ وبلىستارى بار. جۇمىس ءوندىرىسى كەستەسىنەن كەشىگۋ يگەرىلمەۋدىڭ نەگىزگى سەبەبى بولىپ تابىلادى.

«مەملەكەتتىك باعالى قاعازداردى ورنالاستىرۋدان تۇسكەن قاراجات 87,4%-عا نەمەسە 25 ملرد تەڭگەگە يگەرىلگەن. جىل سوڭىنا دەيىن 13 ملرد تەڭگەنى يگەرۋ كەرەك»، - دەدى سپيكەر.

ەسكە سالا كەتەيىك، بۇگىن ۇكىمەتتىڭ كەزەكتى وتىرىسىندا ەلىمىزدىڭ 2016 جىلعى 11 ايداعى الەۋمەتتىك-ەكونوميكالىق دامۋ قورىتىندىسى شىعارىلۋدا.

باقىتجان ساعىنتاەۆ قازاقستانداعى ەكونوميكالىق ءوسىمدى نىعايتۋ ءۇشىن بارلىق كۇشتى جۇمساۋدى تاپسىردى

ۇكىمەت وتىرىسىن اشۋ كەزىندە قر پرەمەر-ءمينيسترى باقىتجان ساعىنتاەۆ 2016 جىلدىڭ 11 ايىنىڭ قورىتىندىسى بويىنشا وڭ كورسەتكىشتەر بار ەكەنىن اتاپ ءوتتى. وسى ۋاقىت ارالىعىندا ءجىو 0,8%-دى قۇراعان.

«قازىر بارلىق رەزەرۆتەردى قولدانۋدامىز. ءبىز اكىمدەرمەن جانە كومپانيالاردىڭ باسشىلارىمەن سويلەستىك. وسى جىلدى 1%-دىق وسىممەن اياقتاي الامىز، سول ءۇشىن وسى باعىتتا بارلىق كۇشىمىزدى جۇمساۋىمىز كەرەك»، - دەدى ب. ساعىنتاەۆ.

ەسكە سالا كەتەيىك، ۇكىمەت وتىرىسىندا قازاقستان رەسپۋبليكاسىنىڭ 2016 جىلعى 11 ايداعى الەۋمەتتىك-ەكونوميكالىق دامۋ جانە بيۋدجەتتىڭ اتقارىلۋ قورىتىندىسى قاراستىرىلۋدا.

قر ىشكى نارىعىنىڭ كومىر جانە جول بيتۋمىمەن قامتىلۋى تولىق كولەمدە ىسكە اسىرىلۋدا

قر ۇكىمەتىنىڭ وتىرىسىندا ىشكى نارىقتىڭ مۇناي حيميا ونىمدەرىمەن قامتىلۋى جانە ەنەرگەتيكا سالالارى بويىنشا اعىمداعى جاعداي قاراستىرىلدى.

قر ەنەرگەتيكا ءمينيسترى قانات بوزىمباەۆ جەدەل مالىمەتتەر بويىنشا گاز ءوندىرىسى  41,9 ملرد تەكشە م قۇراعانىن باياندادى. 2,4 ملن. توننا سۇيىلتىلعان گاز وندىرىلگەن.

بۇدان بولەك، بيىلعى جىلدىڭ 1 جەلتوقسانىنداعى مالىمەتتەر بويىنشا 475 مىڭ توننا جول بيتۋمى وندىرىلگەن. ىشكى نارىقتىڭ وتاندىق بيتۋممەن قامتىلۋى تولىق كولەمدە جۇزەگە اسىرىلۋدا.

جەدەل مالىمەتتەرگە سۇيەنسەك، ەلەكتر ەنەرگياسىن ءوندىرۋ كولەمى 84,5 ملرد كۆت/س، ال كومىر ءوندىرۋ 89,1 ملن توننانى قۇرادى.

ەلەكتر ەنەرگەتيكاسىن تۇتىنۋشىلاردىڭ كومىر ونىمدەرىمەن قامتىلۋى (مەتاللۋرگيا، ونەركاسىپتىك كاسىپورىندار، تۇرعىندار، كوممۋنالدىق-تۇرمىستىق سەكتور) 100% ورىندالۋدا.

2016 جىلى وتاندىق اۋىل شارۋاشىلىعى وندىرۋشىلەرىنە جانار-جاعارماي جەتكىزۋ مىندەتتەمەسى تولىق ورىندالدى

قر ۇكىمەتى وتىرىس بارىسىندا اعىمداعى جىلدىڭ 11 ايىندا قازاقستاننىڭ مۇناي-گاز سالاسىنداعى دامۋ ناتيجەلەرىن، سونداي-اق ىشكى جانار-جاعارماي نارىعىنداعى احۋالدى قاراستىردى.

قر ەنەرگەتيكا ءمينيسترى قانات بوزىمباەۆ اتالعان كەزەڭدەگى مۇناي مەن كوندەنسات ءوندىرۋ كولەمى 70,8 ملن توننانى قۇراعانى تۋرالى مالىمدەدى. اعىمداعى جىلى مۇناي-گاز سالاسىنداعى كاسىپورىنداردى قولداۋ جونىندەگى شارالار، سونىمەن قاتار قاشاعاننىڭ ىسكە قوسىلۋى جىلدىق مۇناي ءوندىرۋ كولەمىن 74-تەن 75,5 ملن تونناعا دەيىن ارتتىرۋعا مۇمكىندىك بەرەدى. ءوز كەزەگىندە، مۇناي وڭدەۋ كولەمى 13,1 ملن توننانى قۇرادى.

اۋىل شارۋاشىلىعى وندىرۋشىلەرىنىڭ قاجەتتىلىگى ءۇشىن ارزانداتىلعان ججم جەتكىزۋ تولىقتاي ورىندالدى. اعىمداعى جىلعى 13 جەلتوقسانداعى جاعداي بويىنشا، مۇناي بازالارىنداعى قور كولەمى: اي-92/93 جانارمايى – 103 مىڭ توننادان اسادى، ديزەلدىك وتىن كولەمى - 155 مىڭ توننادان اسادى.

ججم قالدىق كولەمى ىشكى سۇرانىستى قامتاماسىز ەتۋگە جەتكىلىكتى قولايلى قوردى قۇرايدى. جانار-جاعارماي تاپشىلىعى بايقالمايدى.

باقىتجان ساعىنتاەۆ مەملەكەتتىك ورگاندار مەن ايماقتارعا بيۋدجەتتەن بولىنگەن قارجىنى ۋاقىتىلى يگەرۋدى تاپسىردى

قر پرەمەر-ءمينيسترى باقىتجان ساعىنتاەۆ ۇكىمەت وتىرىسى بارىسىندا ورتالىق مەملەكەتتىك ورگاندار باسشىلارى مەن ايماق اكىمدەرىنىڭ اعىمداعى جىلعى الەۋمەتتىك-ەكونوميكالىق دامۋ قورىتىندىسى تۋرالى ەسەپتەرىن تىڭدادى.

پرەمەر-مينيستر وقىلعان باياندامالار بويىنشا ەكونوميكادا جاقسى كورسەتكىشتەر بايقالاتىنىن، جىل باسىمەن سالىستىرعاندا بارلىق وڭىرلەردە وڭ ۇدەرىستەر بار ەكەنىن اتاپ ءوتتى.

ب. ساعىنتاەۆ جىل قورىتىندىسى بويىنشا ءجىو 0,5% دەڭگەيىندە جوسپارلانعانى، بىراق قازىر ول 0,8%-دى قۇرايتىنىن ەسكە سالدى.

«بۇگىن ءبىز تىڭداعان بارلىق باياندامالار جىلدى 1%-دىق ءجىو دەڭگەيىندە اياقتاۋعا مۇمكىندىگىمىز بار ەكەنىن كورسەتەدى»، - دەدى ب. ساعىنتاەۆ.

سونداي-اق، قر پرەمەر-ءمينيسترى ب. ساعىنتاەۆ قارجى مينيسترلىگىنە بيۋدجەت قاراجاتىنىڭ يگەرىلۋىنە مونيتورينگ جۇرگىزۋدى قامتاماسىز ەتۋدى تاپسىردى.

Abai.kz