وقو اۋماعىندا تۇيە شارۋاشىلىعىن دامىتۋ جوسپارلى تۇردە ىسكە اسىپ كەلەدى. ماسەلەن، وبلىستاعى تۇيەنىڭ 48 پايىزى سوزاق اۋدانىندا. سول سەبەپتى قىمىران ءوندىرۋدى دە جولعا قويۋ جوسپاردا بار. بۇل تۋرالى «اباي اقپارات» پورتالى وڭتۇستىك قازاقستان وبلىسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

اۋداندا تۇيە شارۋاشىلىعىمەن اينالىساتىن ازاماتتاردىڭ باسىن قوسىپ، «ارۋانا» دەگەن كووپەراتيۆ قۇرىلعان. قازىر عيماراتى دايىندالۋدا. «ىرىس» قارجى ۇيىمىنان 12 ميلليون تەڭگە نەسيە الىپ، ونىڭ 8 ميلليونىن قۇرال-جابدىقتار الۋعا جۇمسالعان. جىل سوڭىنا دەيىن ونى ورناتىپ، پاستەرلەنگەن قىمىران شىعارۋدى قولعا الۋ جوسپارلانىپ وتىر. اۋداندا جىلىنا 12 مىڭ توننا ءتىرى سالماقتا ەت، 14 مىڭ توننا ءسۇت وندىرىلەدى. ەكى جەردە مال سويۋ الاڭشاسى اشىلعان.

بۇگىندە مال باسى كوبەيۋى ءارى قوڭدى بولۋى ءۇشىن مال تۇقىمىن اسىلداندىرۋ ماسەلەسى الدىڭعى ورىنعا شىعىپ وتىر. اتا-بابامىز ەجەلدەن قۇرىق ۇستاپ، جىلقى ءۇيىرىپ، قوي قايىرعاندىقتان بۇل كاسىپ بىزگە تاڭ ەمەس. سوناۋ ىقىلىم زامانداردان بەرى اجەتكە جاراپ كەلە جاتقان مال تۇقىمىنىڭ ازىپ، ۇساقتالىپ كەتكەن كەزدەرى دە بولعان. بۇگىندە وسى سالاعا كوپتەپ كوڭىل ءبولىنىپ، مال تۇقىمىن اسىلداندىرۋعا ەرەكشە ءمان بەرىلىپ جاتىر. سەڭ قوزعالدى. ەندى اتالعان ماسەلە باعدارلامالار ارقىلى ەمەس، ارنايى پالاتا قۇرۋ ارقىلى شەشىلەدى.

ءتورت تۇلىك – ىرىس بولسا، تۇيە سونىڭ ءىرىسى…

بيىلدان باستاپ ەلىمىزدە ءتورت تۇلىكتى اسىلداندىرۋ باعىتىندا ءار وبلىستىڭ ەرەكشەلىگىنە قاراي ارنايى پالاتالار قۇرىلۋدا. شىلدە ايىندا ەلىمىز بويىنشا تۇڭعىش رەت اقتوبەدە «جىلقى تۇقىمدارى» پالاتاسى، ال تالدىقورعاندا «قوي تۇقىمدارى پالاتاسى» قۇرىلعان بولاتىن. ال، جۋىردا شىمكەنت قالاسىندا «تۇيە تۇقىمدارى» رەسپۋبليكالىق پالاتاسى قۇرىلىپ، جۇمىسىن باستادى.

Abai.kz