قالا اكىمدىگىندە قر تاۋەلسىزدىگىنىڭ 25 جىلدىعىنا ارنالعان سالتاناتتى ءىس-شارا ءوتتى. مەرەكەلىك جيىندا قالا اكىمى عابيدوللا ءابدىراحىموۆ قۇتتىقتاۋ ءسوز سويلەپ، بىرقاتار ازاماتتاردى ماراپاتتادى. بۇل تۋرالى «اباي اقپارات» پورتالى شىمكەنت قالاسى اكىمىنىڭ ءباسپاسوز قىزمەتىنە سىلتەمە جاساي وتىرىپ حابارلايدى.

«سىزدەردى قازاقستان رەسپۋبليكاسى تاۋەلسىزدىگىنىڭ 25 جىلدىق مەرەكەسىمەن قۇتتىقتايمىن! تاۋەلسىزدىك – بۇل حالىقتىڭ سان عاسىرلار بويى ەركىندىكتى اڭساعان ارمانى. قازاقستاننىڭ بۇگىنگى قۇدىرەتتى كۇشى ەل بىرلىگىندە، ۇلت پەن ۇلىستار تاتۋلىعىندا. ەلباسىمىز نۇرسۇلتان نازارباەۆتىڭ ساليقالى ساياساتىنىڭ ارقاسىندا مەملەكەتىمىز الەمدەگى دامىعان ەلۋ ەلدىڭ قاتارىنا ەنىپ، بۇكىل الەمگە تانىلىپ وتىر»، - دەدى قالا اكىمى ءوز قۇتتىقتاۋىندا.

ايتۋلى مەرەكەگە وراي 25 ازاماتقا «قۇرمەت» وردەنى، «ەرەن ەڭبەگى ءۇشىن» جانە «شاپاعات» مەدالى، «قازاقستان رەسپۋبليكاسىنىڭ قۇرمەت گراموتاسى» تابىس ەتىلدى. سونىمەن قاتار، 57 ادام «قازاقستان رەسپۋبليكاسى تاۋەلسىزدىگىنىڭ 25 جىلدىعى» مەرەيتويلىق مەدالدارىمەن، 3 ادام قالا اكىمىنىڭ العىس حاتتارىمەن ماراپاتتالدى. 12 ازامات «شىمكەنت قالاسىنىڭ دامۋىنا قوسقان ۇلەسى ءۇشىن» مەدالىن الدى.

ءىس-شارا سوڭىندا وبلىستىق فيلارمونيا ونەرپازدارى، جەرگىلىكتى ونەر ۇجىمدارى مەن جاس انشىلەر مەرەكە مەرەيىن اسىرىپ، اننەن شاشۋ شاشتى.

Abai.kz