وڭتۇستىك قازاقستان وبلىسى، ورداباسى اۋدانىنىڭ «شۇبار» اۋىلدىق وكرۋگىندە 8500-دەي تۇرعىن تۇرادى. اۋىلشارۋاشىلىق ماقساتىنداعى 15750 گەكتار جەردىڭ 1300 گەكتارى سۋارمالى، 7400 گەكتارى جايىلىم دا قالعانى ءتالىمى جەر سانالادى.

- اۋىل ادامدارىن جۇمىسپەن قامتۋ ماقساتىندا ۇيىمداستىرىلعان كاسىپورىندار كوپتەپ سانالادى. اۋىلدىق وكرۋگ اۋماعىندا ءىرى ەسەپتەلەتىن تاس قياقتايتىن كارەر، ءبىر كىرپىش زاۋىتى، 2 گەكتار ونەركاسىپتىك، 5 گەكتار فەرمەرلىك جىلىجاي بار. كەڭەس داۋىرىنەن بەرى جۇمىس ىستەپ كەلە جاتقان «شۇبار» اسىل تۇقىمدى كەشەندە 7,5 مىڭعا جۋىق تالپاق تاناۋ وسىرىلۋدە. «جۇمىسپەن قامتۋ – 2020» باعدارلاماسى بويىنشا شاعىن كاسىپكەرلىككە اۋىلدىق وكرۋگىمىزدەن 30-عا جۋىق ادام وقىتىلدى. ولارعا ۇسىنىس بەرىلىپ، سونىڭ ىشىندە 15-ءى نەسيە الدى. ولار وتباسىلىق ءسۇت فەرماسى مەن مال بورداقىلاۋ الاڭدارىن ۇيىمداستىرىپ جاتقان جايى بار. الداعى ۋاقىتتا جانۇيالىق قۇس ءوسىرۋ بويىنشا تاعى ءۇش ازاماتتى وقىتىپ، نەسيە ماسەلەسى شەشىلسە، باستاما ءوز قولداۋىن تابادى دەگەن ويدامىز. وكرۋگ اۋماعىندا برولەر تاۋىقتارىن وسىرەتىن «قاينار قۇس» فابريكاسى بار. سول فابريكادان جەرگىلىكتى تۇرعىندار كوكتەمدە ارقايسىسىن 200 تەڭگەدەن بالاپان ساتىپ الىپ، ونى 35-40 كۇن باعىپ، قايتا فەرمانىڭ وزىنە ساتادى. اتالعان ۋاقىت ارالىعىندا بالاپان 5 كەلىدەن استام ءتىرى سالماق جينايدى. ونى فابريكاعا كەلىسىن 500 تەڭگەدەن وتكىزەدى. بىلايشا ايتقاندا ءونىمدى وتكىزۋدە ماسەلە جوق. قاجەت بولسا جەممەن قامتاماسىز ەتۋگە دە فابريكا جاردەم بەرەدى. ءوزارا كەلىسە السا، ۆەتەرينارلارى ءدارى ەگىپ كەتەدى. بۇل جەرگىلىكتى تۇرعىنداردىڭ قىزىعۋشىلىعىن تۋعىزۋدا، - دەيدى شۇبار اۋىلىنىڭ اكىمى قىدىرباي سەيىتقۇل.

 ەلباسىنىڭ «سىباعا»، باعدارلاماسى بويىنشا بىلتىر 90 باس ءىرى قارا مال الۋ جوسپارلانىپ، ول تولىعىمەن ورىندالعان. بيىل تاعى 75 باس الۋ جوسپارلانىپ، 80 باسقا جەتكىزىلگەن. «قۇلان» باعدارلاماسى بويىنشا 188 باس اسىل تۇقىمدى ۋاق مال الۋ جوسپارلانسا، ناتيجە - 450 باسقا جەتتى. شۇبار اۋىلدىق وكرۋگىندە بيىل 2900 گەكتار اق ەگىس ەگىلىپ، گەكتار بەرەكەلدىلىگى 27 تسەنتنەرگە دەيىن جەتتى. التىن كۇز مەرەكەسىندە اۋىلدىق وكرۋگ اپپاراتى استىقتان ەڭ جوعارى ءونىم جيناعانى ءۇشىن اۋىسپالى تۋعا يە بولدى.

Abai.kz