وڭتۇستىك قازاقستان وبلىسىندا وبلىس ورتالىعىنا جاقىن ورنالاسقان اۋدانداردىڭ ءبىرى – ورداباسى. سول سەبەپتى دە ءۇش ءجۇزدىڭ باسىن قوسقان كيەلى تاۋدىڭ اتىمەن اتالعان اۋداندا ونەركاسىپ ورىندارى ءجيى شوعىرلانعان. شاعىن جانە ورتا كاسىپكەرلىك تە جاقسى دامىپ كەلەدى. ولاردىڭ ىشىندە اۋىلشارۋاشىلىق ماقساتىنداعى نىساندار دا از ەمەس. ال، قىزىل ميا وسىمدىگىنىڭ تامىرىنان ءونىم وندىرۋمەن اينالىساتىن ءوندىرىس ورنى كىمدى دە بولسا قىزىقتىرماي قويمايدى. بۇل شارۋامەن شۇبار اۋىلدىق وكرۋگىندەگى ابدراحيم جۇمابەكوۆ باسشىلىق ەتەتىن «باستاۋ فارم» جاۋاپكەرشىلىگى شەكتەۋلى سەرىكتەستىگى اينالىسادى ەكەن.

- ءوندىرىس ورنىمىزدىڭ اشىلىپ، جۇمىس ىستەي باستاعانىنا 10 جىلدان استى، - دەيدى سەرىكتەستىك مەنەدجەرى گۇلدانا كەرىمقۇلوۆا. – قىزىل ميانىڭ تامىرىن قىزىلوردا، شاردارا تۇركىستان، جەتىساي، سارىاعاش وڭىرلەرىنەن قازىپ اكەلەمىز. تامىر سۋ كۇيىندە قازىلىپ الىنىپ، ونى شاۋىپ، تازالاپ، جۋىپ، كەپتىرىپ، حيمفارم زاۋىتىنا، «زەردە» ءدارىحانالار جۇيەسىنە ەكسترات، ياعني شيكىزات كۇيىندە جىبەرەمىز. بىزدە سونداي-اق، قىزىل ميا تامىرىنان ۇنتاق، سۇيىقتىق تۇرىندەگى ونىمدەر دە جاسالادى. ولاردى بوشكەلەرگە قۇيىپ قويامىز. قىزىل ميادان نەگىزىنەن جوتەلگە قارسى دارىلەر جاسالادى. سوسىن كوكا-كولا سەكىلدى سۋسىندارعا، كۇلشەلەرگە پايدالاناتىن كرەمنىڭ قۇرامىنا قوسىلادى. ءدامى ءتاتتى بولىپ كەلەدى.

مەنەدجەردىڭ ايتۋىنشا، جىلىنا تاپسىرىسقا قاراي 100-200 توننا، كەيدە ودان دا كوپ ءونىم وندىرىلەدى ەكەن. سەرىكتەستىك باسشىلارى بۇل جۇمىستى اتقارۋ ءۇشىن مەملەكەتتەن ارنايى ليتسەنزيا العان. ەكى ورتاداعى كەلىسىم بويىنشا تامىرلار قازىلىپ الىنعاننان كەيىن ورنىنا قايتادان تۇقىمى ەگىلەدى. سونىڭ ارقاسىندا قىزىل ميا 2-3 جىلدا قايتادان قالپىنا كەلىپ، ول 6-7 جىلدىڭ ىشىندە تاعى قازىپ الىنادى.

سەرىكتەستىك وسى باستاماسى ارقىلى بۇگىندە كەمىندە 50-گە جۋىق اۋىل ادامدارىن تۇراقتى جۇمىسپەن قامتىپ وتىرسا، ناۋقان كەزىندە ولاردىڭ قاتارى بۇدان دا ارتادى. جالاقىلارى 50-70 مىڭ تەڭگەدەن باستالىپ، 120-140 مىڭ تەڭگەگە دەيىن جەتەدى. اۋىلدا وتىرىپ، ءوز-ءوزىن، جەرلەستەرىن دە جۇمىسپەن قامتىپ، اۋىل اجارىن اشۋعا اتسالىسىپ جۇرگەن وسىنداي ازامتتاردىڭ تىندىرىمدى تىرلىگىنە قالاي ريزا بولماسسىڭ؟!

Abai.kz