بۇگىندە ماقتا القاپتارىندا تەرىم جالعاسىپ، شارۋاشىلىقتار ونى تەزىرەك جيناۋ قامىندا. اۋدان اۋماعىنداعى 136,4 مىڭ گەكتار سۋارمالى ەگىستىك جەر بار دەسەك، ول 19403 شارۋا قوجالىقتارىنا تيەسىلى بولىپ وتىر. قازىرگى كەزدە ەگىستىك القاپتاردا جيىن-تەرىم جالعاسۋدا. جاقىن كۇندەردە ناۋقان اياقتالادى.

بۇگىنگى تاڭعا ەگىلگەن 83,0 مىڭ گەكتار جەردىڭ 30 مىڭ گەكتاردان استامى تەرىلىپ، ودان 57,5 مىڭ توننا «اق التىن» جينالۋدا. ورتاشا ونىمدىلىك گەكتارىنا 19,7 تسەنتنەردى قۇراپ وتىر. جينالعان ءونىمدى وتكىزۋدە تاۋقىمەت جوق. شارۋالار ماقتا شيكىزاتىن ماقتا وڭدەۋ زاۋىتتارىنا 1 تونناسىن 160-162 مىڭ تەڭگەدەن ساتۋدا.

ماسەلە – تۇقىمنىڭ ساپالى بولۋىندا، سونىمەن قاتار ونى ۋاقىتىسىندا ەگىپ، كۇتىپ-باپتاۋدا. 2016 جىلى اۋداندا ەگىلەتىن ماقتا داقىلىنىڭ كولەمى 83 مىڭ گەكتاردى قۇرادى. ونىڭ ىشىندە، 20 مىڭ گەكتار جەرىندە يننوۆاتسيالىق تەحنولوگيالاردى كەڭىنەن قولدانا وتىرىپ، تەحنولوگيالىق كارتاعا سايكەس، ماقتا شيكىزاتىن وندىرۋگە كەتەتىن شىعىنداردى بارىنشا ازايتىپ، ەگىلىپ وتىر. جالپى، اۋداندا 11 بىرلىك ماقتا وڭدەۋ زاۋىتتارى جۇمىس ىستەيدى. سوندىقتان شارۋالاردىڭ جينالعان ءونىمى قازىرگى تاڭدا وڭدەۋ ورىندارىنا كىدىرىسسىز جونەلتىلۋدە. 

جالپى، دەرەككە جۇگىنەر بولساق، بۇگىنگى كۇنگە دەيىن ەگىلگەن اۋىل شارۋاشىلىعى داقىلدارىنان 42,3 مىڭ توننا جۇگەرى ءدانى، 1,0 مىڭ توننا كۇرىش، 57,5 مىڭ توننا ماقتا شيكىزاتى، 584,2 مىڭ توننا باقشا ونىمدەرى، 115,2 مىڭ توننا كوكونىس ونىمدەرى جانە 1,1 مىڭ توننا جەمىس-جيدەك پەن ءجۇزىم ونىمدەرى جينالدى. اتالعان ونىمدەر نەگىزىنەن كورشى مەملەكەتتەرگە قىمبات باعاعا ساتىلۋدا. بۇل الا جازداي توككەن تەردىڭ جەمىسى. سوندىقتان شارۋالاردىڭ حال-احۋالى الدىڭعى جىلدارعا قاراعاندا الدەقايدا جاقسارا ءتۇستى.اۋداندا ماقتا، جالپى اۋىل شارۋاشىلىعى سالاسىنا قاتىستى جوبالار جۇزەگە اسىرىلۋدا. اتاپ ايتار بولساق، بيىل ماقتاارال اۋىلدىق وكرۋگىندە «حامرو اتا» فەرمەر قوجالىعى 2 گەكتار جەرگە جىلىجاي سالۋعا 78,2 ملن تەڭگە ينۆەستيتسيالىق قارجى سالدى. جىلىجاي ىسكە قوسىلعان جاعدايدا مۇندا جاڭادان 23 جۇمىس ورنى اشىلادى. وڭتۇستىك وڭىردە شارۋاشىلىق تا كوپ، حالىقتىڭ سانى دا از ەمەس. سوندىقتان ءاربىر جوبانىڭ جۇزەگە اسۋى جاڭادان جۇمىس ورنىنىڭ اشىلۋىنا مۇمكىندىك بەرىپ وتىر. «پروگرەسس-2009» جاۋاپكەرشىلىگى شەكتەۋلى سەرىكتەستىگى 200,0 ملن تەڭگەگە قۋاتتىلىعى 20 مىڭ توننا بولاتىن ماقتا وڭدەۋ زاۋىتىن سالماق. جاڭا زاۋىتتا الداعى ۋاقىتتا جاڭادان 35 جۇمىس ورنى اشىلماق.

Abai.kz