وڭتۇستىك قازاقستان وبلىسى، ورداباسى اۋدانىنىڭ قاراسپان اۋىلىندا بوي كوتەرگەن جاڭا جىلىجاي بىلتىردان بەرى رەسپۋبليكانىڭ بارلىق ايماقتارىنا كوكونىس پەن جەمىس-جيدەكتەر جەتكىزۋدى باستادى. ازىرگە ءبىر بولىگى عانا ىسكە قوسىلعان كەشەندە قىزاناق پەن قياردىڭ بىرنەشە ءتۇرى وسىلۋدە.

ورداباسى اۋدانىندا كۇننىڭ جىلۋىن پايدالانىپ جۇمىس ىستەيتىن جەراستى جىلىجايلارى پايدا بولدى. قىتايدان اكەلىنگەن ءتاسىلدىڭ ەرەكشەلىگى ارتىق شىعىنسىز دەيدى ماماندار. ويتكەنى وعان جىلىتۋ جۇيەسى قاجەت ەمەس. 

كاسىپكەر جانات قىدىربايدىڭ ايتۋىنشا، جەردىڭ استىنداعى بولىگى 8 مەتر، ۇستىندەگى بولىگى 7 مەتر، سوندىقتان قىستىڭ كۇنى دە جىلۋدى ۇستايدى. جالپى ورداباسىنىڭ جەرى وتە قۇنارلى، سامال جەلىنىڭ دە جىلىجايعا پايداسى مول دەسەدى. 

جىلىجايدىڭ ءبىر عانا بولىگىنىڭ اۋماعى 4 گەكتار، ۇزىندىعى 225 مەتر، 13 مەتر. مۇندا بىلتىر ءبىرىنشى رەت قىزاناق وتىرعىزىلدى. ءبىر ەرەكشەلىگى مۇندا ەشقانداي جىلىتۋ پەشتەرى جوق، تەحنولوگياسى دا قاراپايىم. جازدىڭ كۇنى كۇننىڭ ەنەرگياسىن سىڭىرگەن توپىراق جىلىجايعا جىلۋ بولەتىن كورىنەدى. ازىرگە ءبىر بولىگى جۇمىس ىستەپ تۇرعان جىلىجايدىڭ 2018 جىلعا دەيىن 50 گەكتارعا ۇلعايماق. مۇندا قازىردىڭ وزىندە جيىرماعا جۋىق جەرگىلىكتى تۇرعىن جۇمىسقا تارتىلعان. 

جىلىجايدىڭ تەمپەراتۋراسىن ۇنەمى باقىلاپ وتىرۋ كەرەك، جازدا 40 گرادۋستان اسپاۋى كەرەك، ال قىستا پليۋس 10 گرادۋستان تومەن تۇسپەگەنى ءجون دەيدى ماماندار. جالپى ورداباسى اۋدانىندا بىرنەشە ءىرى جىلىجاي بار. قازىر 62 گەكتار جەرگە ءتۇرلى ونىمدەر ەگىلۋدە. ولار ەڭ الدىمەن رەسپۋبليكانىڭ 8 وبلىسىنا جانە رەسەيدىڭ بىرقاتار وڭىرلەرىنە، ماسكەۋگە تارايتىن بولادى. ونىمدەردى ۋكراينا مەن مالدوۆاعا جەتكىزۋ دە جوسپاردا بار. 

Abai.kz