قوسسەيىت اۋىلىندا سوڭعى ۋاقىتتا ءجۇزىم ءوسىرىپ، ۇيىنەن جىلىجاي سالۋشىلار قاتارى مولايىپ تۇر. اۋدان اكىمى ارمان ابدۋللاەۆ بىلتىردان باستاپ بارلىعى 13 گەكتار القاپقا ءجۇزىم اعاشىن وتىرعىزىپ جاتقان قابىلان جۇمابەكتىڭ شارۋاشىلىعىن ارالاپ كوردى. جانە بۇل وڭىردە ءجۇزىم شارۋاشىلىعىن ءوسىرۋدىڭ ماڭىزى زور ەكەنىن ايتىپ ءوتتى. 

جاپىراعىن جايقالتىپ ۇلگەرگەن باۋدىڭ ءوسىمى جاقسى كورىنەدى. بۇگىنگى كۇننىڭ تالابى – كووپەراتيۆكە بىرىگە وتىرىپ، مەملەكەت تاراپىنان بەرىلەتىن كوپتەگەن جەڭىلدىكتەردى پايدالانۋ ەكەنىن جەتە ۇعىنعان قابىلان مىرزا بۇل جۇمىستا كەزدەسەتىن قيىندىقتاردى دا ايتىپ ءوتتى. قوجالىق يەسىن مۇقيات تىڭداعان اۋدان باسشىسى پروبلەمالار بويىنشا جۇمىس جۇرگىزەتىنىن ايتتى.

اۋدان اكىمى ءۇي ىرگەلىك جىلىجاي كولەمىن ودان ءارى ۇلعايتىپ جاتقان ءنادىر قوسانوۆتىڭ تىرلىگىنە ريزا بولدى. العاشىندا 10 سوتىق جەرگە جىلىجاي جاساپ، كوك-سوك ەككەن قوسانوۆتاردىڭ وتباسى ءونىمدى وزىنەن شىعارسا كول-كوسىر پايدا بولاتىنىنا كوزدەرى جەتكەن. سوندىقتان دا بيىل تاعى دا اۋلاسىنداعى جىلىجاي كولەمىن كەڭەيتىپتى. الداعى ۋاقىتتا اتا مۇراعا العان جەرىنەن 50 سوتتىق جەرگە جىلىجاي جاساپ، اۋىلدى كوگەرگەنمەن قامتاماسىز ەتۋگە تاۋەكەل جاساپ وتىرعان ءنادىر قوسانوۆتىڭ ەڭبەكقورلىعى باسقالارعا ۇلگى بولاتىن تىرلىك ەكەنىن اۋدان باسشىسى اتاپ كورسەتتى. جانە باسقا اۋىلداستارىنا ۇلگى ەتتى. جالپى اۋا رايى قالىپتى، جىلى سانالاتىن بۇل وڭىرگە جىلىجاساي سالۋدىڭ پايداسى زور ەكەنى بايقالادى. سوندىقتان جەرگىلىكتى شەنەۋنىكتەر جىلىجاي سالۋ ىسىنە الداعى ۋاقىتتا كوبىرەك كوڭىل بولمەك.

Abai.kz