كەشە الماتىدا «Almaty invest-2016» حالىقارالىق ەكونوميكالىق فورۋمى اياسىندا جالپى سوماسى 300 ميلليارد تەڭگەنى قۇرايتىن مەموراندۋمعا قول قويىلدى، دەپ حابارلايدى «اباي اقپارات» پورتالى.

دالىرەك ايتساق، «Almaty invest-2016» حالىقارالىق ينۆەستيتسيالىق فورۋمى اياسىندا قۇنى 300 ملرد تەڭگەنى قۇرايتىن 53 مەموراندۋمعا قول قويىلدى. الماتى اكىمدىگى تاراتقان رەسمي مالىمەتتەرگە سۇيەنسەك،  اتالعان حالىقارالىق ەكونوميكالىق فورۋمعا قازاقستاندىق جانە شەتەلدىك ينۆەستورلار قاتىسقان.

شارا اياسىندا 53 جوباعا ينۆەستيتسيا تارتۋ ماسەلەلەرى تالقىلانىپ، الماتى قالاسىنىڭ ينۆەستيتسيالىق الەۋەتىن كوتەرۋ، وا-داعى ەكونوميكالىق ورتالىققا اينالدىرۋ جايلارى ءسوز بولعان. ەكونوميكالىق فورۋمنىڭ نەگىزگى مودەراتورى UBS  «Asset Management» ستراتەگيالار جانە جاھاندىق نارىقتار بويىنشا باسشىسى ماسسيميليانو كاستەلي مىرزا بولدى.

فورۋم بيىل ءبىرىنشى مارتە ۇيىمداستىرىلىپ وتىرعان جوق. ءداستۇرلى تۇردە الماتى تورىندە وتكىزىلەتىن ينۆەستيتسيالىق فورۋمعا بيىل دا مۇرىندىق بولعان الماتى قالاسى اكىمدىگى.

ەستەرىڭىزگە سالا كەتەيىك، الماتىداعى Ritz-Carlton قوناق ۇيىندە الماتى قالاسى اكىمدىگىنىڭ ۇيىمداستىرۋىمەن «Almaty invest-2016» فورۋمى ءوتىپ جاتىر. حالىقارالىق ەكونوميكالىق جيىنعا قالا اكىمى باۋىرجان بايبەك، قر ۇب توراعاسى دانيار اقىشەۆ، UBS  Asset Management ستراتەگيالار جانە جاھاندىق نارىقتار بويىنشا باسشىسى ماسسيميليانو كاستەلي مەن Sanlas hoiding كومپانياسىنىڭ نەگىزىن قالاۋشى گيۋنتەر نەبەل سەكىلدى ساراپشىلار قاتىسۋدا. جالپى فورۋمعا بەدەلدى ساياساتكەرلەر، الەمدىك جانە وتاندىق بيزنەس كوشباسشىلارى، ينۆەستيتسيالىق كورپوراتسيالار باسشىلارى، قارجى ينستيتۋتتارى مەن حالىقارالىق ۇيىمداردان بارلىعى 500-گە تارتا جوعارى قىزمەتتەردەگى ماماندار كەلدى. فورۋمدا ساۋدا جانە قىزمەت كورسەتۋ سالاسى، تاماق ونەركاسىبى، ىسكەرلىك تۋريزم، مەملەكەتتىك-جەكە سەرىكتەستىك جانە يندۋستريالدىق دامۋ سەكىلدى 5 باسىم باعىت بويىنشا الماتى قالاسىنىڭ ينۆەستيتسيالىق مۇمكىندىكتەرى تالقىلاندى.

Abai.kz