وڭتۇستىك قازاقستان وبلىسىنىڭ اكىمى جانسەيىت تۇيمەباەۆ شىمكەنتتەگى قر ۇلتتىق گۆاردياسىنىڭ 6506 اسكەري بولىمىندە بولىپ، اتالعان ءبولىمنىڭ جەكە قۇرامى مەن وقو ءىىد جەرگىلىكتى پوليتسيا قىزمەتكەرلەرىنىڭ ەل تاۋەلسىزدىگىنىڭ 25 جىلدىق مەرەيتويىنا ارنالعان مەرەكەلىك جيىنىنا قاتىستى.

بولىمشەنىڭ جاۋىنگەرلىك قىزمەتتىك ءومىر سالتىمەن تانىسىپ، اكىمدىكپەن ەكى جاقتى ىنتىماقتاستىق باعىتىن ايقىنداۋ ماقساتىمەن بارعان ايماق باسشىسى بارشا قاتىسۋشىلاردى ەگەمەندىك تويىمەن قۇتتىقتاپ، ولاردى ەلىمىزدىڭ دامۋىنا بىرلەسە اتسالىسۋعا شاقىردى.

«بۇل مەرەكە 25 جىل ىشىندە قازاقستاندى الەمگە تانىتىپ، بۇكىل دۇنيە ءجۇزىنىڭ الپاۋىت ەلدەرىمەن تەرەزەمىزدى تەڭ ۇستاتقان مەيرام. وسىناۋ شيرەك عاسىر ىشىندە قازاقستان بۇۇ-نا مۇشەسى بولدى، الەمنىڭ 120-دان اسا ەلىندە ديپلوماتيالىق وكىلدىكتەرىمىز اشىلىپ، بارلىعىمەن تەڭ دارەجەدە قارىم-قاتىناس ورنادى. ءوزىمىزدىڭ ۇلتتىق قورعانىسىمىز، ىشكى ىستەرىمىز، ۇلتتىق گۆارديامىز قالىپتاستى. ءوز شەكارامىزدى،  تىنىشتىعىمىز بەن بەيبىتشىلىگىمىزدى قورعايتىن وسىنداي دەڭگەيگە جەتتىك. بۇل سالادا سىزدەردىڭ دە اتقارعان ۇلەستەرىڭىز مول. وسى كەزەڭ ىشىندە ىشكى ىستەر قىزمەتكەرلەرى، اسكەرلەرى، ۇلتتىق گۆارديا ەلىمىزدىڭ تىنىشتىعى مەن بەيبىتشىلىگىن ساقتاۋدا، تۇراقتىلىقتى نىعايتۋدا ارقاشان الدىڭعى ساپتا بولا ءبىلدى»، - ج.تۇيمەباەۆ.

مۇنان سوڭ، ايماق باسشىسى ۇلتتىق گۆارديا مەن ىشكى ىستەر سالاسىندا ۇزدىك قىزمەت ەتكەن 15 ازاماتتى وبلىس اكىمىنىڭ العىس حاتىمەن ماراپاتتاپ، قىزمەتىنە ساتتىلىك تىلەدى. ال مەرەكەلىك شارا بارىسى گارنيزوندىق ساپتىق جيىننىڭ سالتاناتتى مارشىمەن ۇلاستى.  

Abai.kz