وڭتۇستىك قازاقستاندا ەل تاۋەلسىزدىگىنىڭ 25 جىلدىعىنا وراي «تۋعان جەردى تۇلەتۋ – پەرزەنتتىك پارىز!» سالتاناتتى كەزدەسۋى ءوتتى. شاراعا وبلىس اكىمى جانسەيىت تۇيمەباەۆ پەن ەلىمىزگە تانىمال كورنەكتى مەملەكەت جانە قوعام قايراتكەرلەرى، اقىن-جازۋشىلار مەن قازاق ەستراداسىندا وزىندىك ورنى بار ونەر مايتالماندارى جانە كاسىپكەرلەر سياقتى  ءتۇرلى سالادا قىزمەت ەتىپ جۇرگەن 150-دەن استام ازامات قاتىستى.

تاۋەلسىزدىك تويىندا قاستەرلى وڭتۇستىكتىڭ تورىندە مەتسەناتتارمەن باس قوسىپ، ورتاق ءىستى بىرلەسە جوسپارلاۋدى ماقسات تۇتقان ءوڭىر باسشىسى تابانىن جەرگە، ارقاسىن ەلگە تىرەگەن ازاماتتارىمىز ءار قيىردا ايانباي ەڭبەك ەتىپ، ابىرويعا بولەنىپ جۇرگەنىن وبلىس جۇرتشىلىعى ماقتان ەتەتىنىن جەتكىزدى. 

«تاتۋلىق پەن تۇراقتىلىقتى تۋ ەتكەن قازاق ەلىنىڭ ەندىگى ماقساتى – الەمدە دامىعان وتىز ەلدىڭ اراسىنان ءوز ورنىن تابۋ. بۇل جولدا ەلباسىنىڭ جانقيارلىق ەرلىگىنە ەل بولىپ بىرلەسىپ قولداۋ ءبىلدىرۋىمىز قاجەت. سوندىقتان دا قاسيەتتى تاۋەلسىزدىكتىڭ تويىندا ەل پەرزەنتتەرىنىڭ باسىن قوسىپ، ورتاق ءىسىمىزدى ويلاسىپ الۋدى كوزدەپ وتىرمىز. ۇلت كوشباسشىسى بيزنەستىڭ الەۋمەتتىك جاۋاپكەرشىلىگى جونىندە ءجيى ايتىپ، مەملەكەتتى وركەندەتۋ ماقساتىنا لايىقتى ۇلەسىن قوسقان كاسىپكەرلەردى نازارىنان تىس قالدىرعان ەمەس. بۇگىنگى باسقوسۋىمىز دا پرەزيدەنت اكىمشىلىگىنىڭ تىكەلەي قولداۋىمەن ۇيىمداستىرىلىپ وتىر. ەندەشە «تۋعان جەردى تۇلەتۋ – پەرزەنتتىك پارىز» دەپ اتالاتىن جيىنىمىزعا قوش كەلدىڭىزدەر!»، - دەدى ج.تۇيمەباەۆ.

سونىمەن قاتار، وبلىس باسشىسى بارشا جينالعان جۇرتشىلىقتى مەرەيلى مەرەكەمەن قۇتتىقتاپ، ايماعىمىزدىڭ وركەندەپ، دامۋىنا سۇبەلى ۇلەس قوسقان كوپتەگەن كاسىپكەرلەرگە «وبلىسقا سىڭىرگەن ەڭبەگى ءۇشىن» توسبەلگىسى مەن وبلىس اكىمىنىڭ العىس حاتىن تاپسىردى.

سالتاناتتى شارادا تۋعان جەردى تۇلەتۋ تۋرالى تولعانىستارى مەن پىكىرلەرىن ورتاعا سالعان جەرلەستەرىمىز ەلگە قىزمەت ەتۋ، تۋعان ولكەگە قامقورلىق جاساۋ – پەرزەنتتىك بورىشتارى ەكەنىن اتاپ ءوتتى. ماسەلەن، قازاقستاننىڭ حالىق ءارتىسى ءسابيت ورازباي، جازۋشى، دراماتۋرگ دۋلات يسابەكوۆ، مەملەكەت جانە قوعام قايراتكەرى سەرگەي تەرەششەنكو، «اتاكەنت» كورپوراتسياسىنىڭ توراعاسى حالىق ابدۋللاەۆ، «قازاتومپروم» ۇلتتىق اتوم كومپانياسى باسقارما توراعاسىنىڭ كەڭەسشىسى بولات جىلقىشيەۆ، قر پارلامەنتى سەناتىنىڭ دەپۋتاتى قۋانىش ايتاحانوۆ، قر پارلامەنتى ءماجىلىسىنىڭ دەپۋتاتى ءبايدىلدا جىلقىشيەۆ، قوعام قايراتكەرى ورازكۇل اسانعازيەۆالاردىڭ جان تەبىرەنتەرلىك سوزدەرى، ەلدى، ءوڭىردى كوركەيتۋدەگى ۇسىنىستارى جينالعان كوپشىلىكتىڭ كوكەيىندەگىسىن ءدوپ باستى. ال مەتسەنات، كاسىپكەرلەر سەرىكجان سەيىتجانوۆ، دىنمۇحاممەد ىدىرىسوۆ، باحريددين ءابىلازىموۆ، قايرات مولداسەيىتوۆتەر تاياۋ ارادا وڭىرىمىزدە وزدەرىنىڭ باستامالارىمەن سالىناتىن ءتۇرلى الەۋمەتتىك نىسانداردىڭ جاي-جاپسارىنان حابار بەردى.

وڭتۇستىكتىڭ وزگەلەرمەن سالىستىرعاندا دامۋ مۇمكىندىگى مول. كليماتى، توپىراعى، حالقى، تابيعاتى ءبارى-ءبارى ءوز ۇيلەسىمىن تاۋىپ تۇر. ەندى تەك ناعىز ىسكەر ازاماتتار بەيتاراپ قالماي، بىرىگىپ ايماقتىڭ دامۋىنا كۇش سالۋى كەرەك دەپ، ءوڭىر جاناشىرلارىن بىرلەسە جۇمىس ىستەۋگە شاقىرعان وبلىس اكىمى تۋريزم، اۋىل شارۋاشىلىعى سالالارىندا ىسكە اسىرىلاتىن بىرقاتار جوبالارمەن ءبولىستى.

ماسەلەن، اكىم كونە تۇركىستان قالاشىعىن جاڭعىرتۋ بويىنشا ەسكيزدىك جوبا ازىرلەنگەنىن ايتىپ، ق.ا.ياسساۋي كەسەنەسىنىڭ اۋماعىن اباتتاندىرۋ جوسپارلانعانىن جەتكىزدى. ءوڭىرىمىزدى كوركەيتۋدەگى جوبالاردىڭ قاتارىنا «سارىاعاش» كۋرورتى اۋماعىن كەڭەيتىپ، حالىقارالىق دەڭگەيگە كوتەرۋ،  شاردارادا جاعاجاي ءتۋريزمىن دامىتۋ ماقساتىندا شاردارا سۋ قويماسى اۋماعىندا دەمالىس ايماقتارىن ورنالاستىرۋ ءۇشىن ينۆەستورلار تارتۋ، وبلىس اۋماعىندا تاۋ-شاڭعى ءتۋريزمىن دامىتۋعا باعىتتالعان حالىقارالىق ستاندارتتارعا ساي «قاسقاسۋ» تۋريستىك رەكرەاتسيالىق كەشەنىن ىسكە اسىرۋ، وندىرىستىك جىلىجايلاردى كوبەيتۋ، شىمكەنت قالاسىن دامىتۋ سىندى جوسپارلار دا بار.

سالتاناتتى كەزدەسۋ سوڭى «تۋعان جەردى تۇلەتۋ – پەرزەنتتىك پارىز» باسقوسۋىنا قاتىسۋشىلارىنىڭ ۇندەۋ قابىلداۋىنا ۇلاستى. قر ەڭبەك سىڭىرگەن ونەر قايراتكەرى نۇرلان ونەرباەۆ وقىعان جۇرەكجاردى سوزدە وڭتۇستىكتىڭ مول مۇمكىندىكتەرىن پايدالانىپ، ەلدىڭ ەڭبەكسۇيگىشتىگىن ەسەلەي ءتۇسۋ ءۇشىن نەعۇرلىم جاڭا ۇمتىلىستار مەن جارقىن قۇلشىنىستار قاجەتتىگى ايتىلعان. سونىمەن بىرگە، ۇندەۋدى قابىلداۋشىلار وڭتۇستىك قازاقستان وبلىسىنىڭ، شىرايلى شىمكەنت شاھارىنىڭ، تۇركى دۇنيەسىنىڭ تەكتى ءتورى سانالاتىن تۇركىستاننىڭ، سونداي-اق، سايرام، وتىرار، سوزاق، بايدىبەك، ارىس، ورداباسى، ماقتارال، شاردارا، سارىاعاش، قازىعۇرت، تولە بي، تۇلكىباس اۋداندارىنىڭ كەرەمەت كوركەيىپ-گۇلدەنۋى ءۇشىن ءبارىمىز بىرلەسە كومەكتەسۋگە تيىستىگىمىزدى ايتىپ، ەلىمىزدىڭ تۇكپىر-تۇكپىرىندە، سونداي-اق شەتەلدەردە، ءوڭىرىمىزدىڭ وزىندە ەڭبەكتەنىپ جۇرگەن بارلىق تۇلەكتەردى – مەملەكەت جانە قوعام قايراتكەرلەرىن، الۋان ءتۇرلى سالالارداعى باسشىلاردى، بيزنەس وكىلدەرى مەن كۇللى كاسىپكەرلەردى، عالىمداردى، اقىن-جازۋشىلاردى، سۋرەتشىلەردى، وزگە دە ونەر قايراتكەرلەرىن، ءوز ولكەسىن، قالاسىن، اۋدان-اۋىلىن پەرزەنتتىك ماحابباتپەن سۇيەتىن، تەرەڭ تەبىرەنىسپەن قۇرمەتتەيتىن بارلىق ازاماتتاردى تۋعان جەردى تۇلەتۋگە شىنايى نيەتپەن، اق پەيىلمەن، پەرزەنتتىك ىقىلاسپەن جاردەمدەسۋگە شاقىردى.

ەگەمەندىكتىڭ شيرەك عاسىرلىق تويىنا ارنالعان تورقالى توي وڭتۇستىك قازاقستان وبلىسى ونەر شەبەرلەرىنىڭ كونتسەرتىمەن جالعاستى.

Abai.kz