وڭتۇستىك قازاقستان وبلىسى سارىاعاش اۋدانى جەمىستى اۋىلدىق وكرۋگى اۋماعىندا جەمىس-ءجۇزىم كوشەتتەرىن وسىرەتىن شارۋاشىلىقتاردىڭ بيىلعى ەڭبەگى ەسەلەنىپ قايتتى دەۋگە بولادى.

كەڭەستىك داۋىردەن-اق بۇل اۋىل جەمىس-ءجۇزىم ونىمدەرىن وندىرۋمەن اينالىسقان. ونىمەن قوسا سول كەزدىڭ وزىندە جەمىس-ءجۇزىم كوشەتتەرىن بۇكىل كەڭەس وداعىنا جىبەرىپ وتىرعان. بۇگىنگى تاڭدا جەمىستى اۋىلدىق وكرۋگى اگرارلىق اۋماققا جاتاتىندىقتان اگرو قۇرلىمدار مەن شارۋا قوجالىقتارىنىڭ، جەكە تۇرعىنداردىڭ نەگىزگى كاسىبى جەمىس-ءجۇزىم ونىمدەرىن ءوندىرۋ مەن كوشەتتەرىن وسىرۋمەن اينالىسادى. وكرۋگ اۋماعىندا اۋىل شارۋاشىلىعى سالاسىندا «قازاق جەمىس جانە ءجۇزىم شارۋاشىلىعى عىلىمي زەرتتەۋ ينستيتۋتىنىڭ» (قازعزي) سارىاعاش فيليالى، «سارىاعاش جەر سىيى» جشس، «بەس ارىس-ىنتىماق» جشس، «سارىاعاش كوشەت» جشس، «نەو پيتومنيك» جشس-ءى مەن 56 جەكە شارۋا قوجالىقتارى جۇمىس اتقارادى.

بۇگىنگى تاڭدا جالپى اۋىلدىق وكرۋگى بويىنشا 155,0 گا جەرگە جەمىس، 40,0 گا جەرگە ءجۇزىم، 215,0 گا جەردە جەمىس-ءجۇزىم پيتومنيگى جانە 5,5 گا جەردى جىلىجاي القاپتارى الىپ جاتىر. بۇگىنگى كۇندە وكرۋگ بويىنشا جەمىس كوشەتتەرىنىڭ 12 ءتۇرى، سۇيەكتى جەمىس كوشەتتەرىنىڭ 11 ءتۇرى، ءجۇزىمنىڭ 7 ءتۇرى وسىرىلۋدە. يتاليا ەلىنەن الىنىپ كەلىنگەن گولدەن دەليشەس، رەد دەليشەس، گالا جانە گريننسميد الما كوشەتتەرى دە وسىرىلەدى.

سوڭعى ۋاقىتتا وكرۋگ بويىنشا جىل سايىن 1 ملن. عا جۋىق ءجۇزىم، 750 مىڭنان اساتىن جەمىس، 75 مىڭداي دەكوراتيۆتى اعاش كوشەتتەرى ءوندىرىلىپ، وندىرىلگەن ءونىم جاقىن شەتەلدەر مەن ەلىمىزدىڭ وڭتۇستىك اۋماقتارىنا تاراتىلۋدا. جالپى اۋدانىمىزدا ءوندىرىلىپ جاتقان جەمىس-ءجۇزىم كوشەتتەرىنىڭ 80-85 پايىزى وسى اۋماقتا وسىرىلۋدە.

Abai.kz