زامانىندا كۇرىش وسىرۋدەن اتى شىققان شاردارا جۇرتىنىڭ بۇگىندە سول شارۋانى قايتا قولعا العاندارىنا كوپ ۋاقىت بولا قويعان جوق. بيىلعى ءونىم كورسەتكىشى دە جامان ەمەس. ايتالىق، بيىل شاردارالىق شارۋالار 1 414 گەكتارعا كۇرىش ەگىپ، 8460 توننا ءونىم العان. 30-دان استام شارۋا قوجالىعى گەكتارىنا 60 تسەنتنەردەن كۇرىش جيناپتى.

اۋداندىق اۋىل شارۋاشىلىعى ءبولىمى باسشىلارىنىڭ ايتۋىنشا، كورشى ەلدىڭ ديقاندارى كۇرىشتىڭ «تاۋەلسىزدىك» سۇرپىن قايتا وزىمىزدەن الىپ جاتىر ەكەن. سەبەبى، ءبىزدىڭ شارۋالار بۇل سۇرىپتىڭ ساپاسىن جاقسارتا الىپتى.

ايتالىق، وزگە وڭىردەگى كۇرىشتەر 80-90 كۇندە ءپىسىپ-جەتىلەتىن بولسا، شاردارانىڭ كۇرىشى 120 كۇندە تولىعىمەن جەتىلەدى ەكەن. ياعني، ەكولوگيالىق جاعىنان تازا. شاردارا اۋدانى بيىل كۇرىشپەن قاتار ماقتا جيناۋدان دا جوعارعى كورسەتكىشكە جەتتى. 11 972 گەكتار القاپتان 32 400 توننا ماقتا تەرىلىپ، اۋداندار اراسىندا كوش باستادى. ءار گەكتاردان الىنعان ماقتا تۇسىمدىلىگى — 27,1 تسەنتنەردى قۇراعان. گەكتارىنان الىناتىن ءونىم كولەمى وتكەن جىلمەن سالىستىرعاندا 10 تسەنتنەرگە ارتقان. جالپى، ايماقتا 5500-گە جۋىق شارۋا قوجالىعى بار بولسا، ونىڭ جارتىسىنا جۋىعى اق التىن وسىرۋمەن اينالىسادى. ولار اق ۇلپانىڭ كەلىسىن 100-104 تەڭگەدەن وتكىزگەن. دەسەك تە، شاردارالىق ديقاندار ماقتا القاپتارىن ساقتاپ قالۋدا جانە ساپانى ارتتىرۋدا مەملەكەتتەن قولداۋ قاجەتتىگىن ايتادى. 

اۋداندا كۇرىش شارۋاشىلىعىنىڭ جۇمى¬سىن جۇيەلەۋ ماقساتىندا باسەكەگە قابىلەتتى كۇرىشتىڭ جاڭا سورتتارىن شىعارۋ، وزىق تەحنولوگيالار مەن شەتەلدىك جەتىستىكتەردى تاجىريبەگە ەنگىزۋ سەكىلدى جۇمىستاردى اتقارۋعا ءمان بەرىلىپ وتىر.

Abai.kz