117 مىڭعا جۋىق تۇرعىنى بار ورداباسى اۋدانى ونەركاسىبى دامىعان، ءارى اۋىل شارۋاشىلىعىنا بەيىم اۋدان. سوندىقتان دا بولار، بىلتىر بۇل اۋدان يننوۆاتسيالىق جوبالاردى جۇزەگە اسىرۋدا ۇزدىك دەپ تانىلدى. تامشىلاتىپ سۋعارۋ ءادىسىن ەندىرۋدەن ەكىنشى، جىلىجاي سالاسىن دامىتۋدان ءۇشىنشى ورىن العان اۋدان مۇنداي اتقا لايىق تا ەدى.

بۇدان بولەك، اسىل تۇقىمدى مال باسىن كوبەيتكەن «سەرالى» شق، رەسپۋبليكاعا بەلگىلى «ورداباسى قۇس» كۇركەتاۋىق فابريكاسى، ەكسپورتقا ۇن شىعاراتىن «ورداباسى نان» جشس، ەلىمىزگە تانىمال «ادەليا» شارۋاشىلىعىنا قاراستى جىلىجاي كەشەنىنىڭ قارقىندى جۇمىستارىن اتاپ وتۋگە بولادى. جەرگىلىكتى 57 تۇرعىندى جۇمىسپەن قامتىپ وتىرعان «ورداباسى نان» جشس-ءنىڭ جۇمىسى ماقتاۋعا لايىق. قازىر وسى جەردەگى ديىرمەندەردەن شىعارىلاتىن ۇننىڭ 90 پايىزى وزبەكستان مەن اۋعانستانعا ەكسپورتتالىپ جاتىر ەكەن. ەل اۋماعىنا 10 پايىز عانا ساتىلادى ەكەن. يننوۆاتسيا دەمەكشى سايرام اۋدانىندا ەرگاش ءتىللاحانوۆ اتتى باعبان بار. ءۇي ىرگەلىك جەرىنەن-اق پايداعا كەنەلىپ وتىر. شاعىن جىلىجايىندا ليموننان جىلىنا 2 رەت ءونىم الادى. بارلىق جاعدايدى تۋعىزاتىندىعى سونشالىق، ءبىر ءتۇبىنىڭ وزىنەن قىرۋار جەمىس جيناپالادى. ەرگەش قارتتىڭ ليموندارىنا باسقا وبلىستاردان سۇرانىس بار.وسىدان ەكى-ءۇش جىل بۇرىن سارىاعاشتا ليمون وسىرەتىن تاجىك قىزى زۋحرا مۇعالىمدى ىزدەپ بارعانىمىزدا، “بۇل كوپ كۇتىم تىلەمەيدى، جالقاۋلاردىڭ جۇمىسى ەكەن”، دەپ تاڭعالدىرىپ ەدى. تاعى ءبىر ديحان اقساقال بانان، انار، قۇرما جانە ءىنجىر وسىرۋدە. پالەندەي ءونىم الماسا دا، تالاپ جاقسى. مۇنداي قارتتار تروپيكالىق وسى جەمىستەردى ءالى-اق جەرسىندىرەتىن ءتۇرى بار. وڭتۇستىكتىڭ مانكەنتىندە اباز حاناشەۆ دەگەن ازامات بانان، ليمون ءوسىرىپ جاتىر. دەمەك ەگىنشىلىككە ەبى، جاڭاشىلدىققا جانى قۇمار، جەردىڭ بابىن تابا بىلەتىن بۇل اۋدان جۇرتشىلىقتى ءالى تالاي تاڭ قالدىراتىن سەكىلدى.

Abai.kz