وسىدان ءبىر اي بۇرىن اقش-تا پرەزيدەنتتىك سايلاۋ ءوتىپ، وندا ميللياردەر دونالد ترامپ جەڭىسكە جەتكەن بولاتىن. كوپ جۇرت كۇتپەگەن جەردەن جەڭىسكە جەتكەن ترامپقا پرەزيدەنتتىك تاقتى  الدەن بەرىپ جاتىر. جيرەن-سارى ميللياردەردىڭ جەڭىسكە جەتكەنى راس. دەگەنمەن اقش-تاعى سايلاۋ جۇيەسىنىڭ بىزگە تۇسىنىكسىز تاعى ءبىر تەتىگى بار. وندا سايلاۋ ەكى كەزەڭنەن تۇرادى.

ترامپتىڭ العاشقى جەڭىسىنەن كەيىنگى جەلپىنىسى كوپ امەريكاندىقتىڭ كوڭىلىنەن شىقپاسا كەرەك، ساياسي ساراپشىلار ترامپتىڭ پرەزيدەنتتىك لاۋازىمىن كلينتون حانىم تارتىپ الۋى مۇمكىن دەگەن پىكىردە. ءتىپتى، دونالد ترامپتىڭ جەڭىسىنە ايرىقشا قۋانعان رەسەيلىك ساراپشىلار دا سونداي بولجامدار ايتۋدا. جاقىندا «كومسومولسكايا پراۆدا» باسىلىمىندا «ترامپ پرەزيدەنتتىك مانسابىنان ايىرىلىپ قالۋى مۇمكىن» دەگەن ماقالا جارىق كوردى. وندا مۇحيتتىڭ ارعى بەتىندەگى جۇرتتىڭ ترامپقا سەنبەيتىندىگى ايتىلادى.

8-قاراشادا وتكەن سايلاۋدا قاراپايىم حالىق بيۋلەتەندەرگە بەلگى قويىپ، ءوز داۋىستارىن بەرەدى. وسى پروتسەسستەن تۇپ-تۋرا 40 كۇن وتكەندە ءاربىر شتاتتاعى تاڭداۋشىلار القاسى ءوز داۋىستارىن قالاعان ۇمىتكەرىنە بەرەتىن بولادى.

سايلاۋدىڭ وتكەن كەزەڭىندە دونالد ترامپ 50 شتاتتىڭ 30-ىندا جەڭىسكە جەتكەن. وندا دا باستى قارسىلاسى حيلاري كليتنتوننان ءسال عانا باسىمدىق كورسەتكەن-ءتىن.

ەندى 19 جەلتوقسان كۇنى تاڭداۋشىلار القاسى ءوز كانديداتتارىن سايلايتىن بولادى. دەموكراتيانىڭ ناعىز ۇلگىسىن كورسەتكەن وسى جولعى سايلاۋداعى قىزىقتىڭ كوكەسى وسى جەردە  سەكىلدى. سەبەبى، تاڭداۋشىلار القاسىنىڭ كەيبىرى ترامپقا داۋىس بەرۋدەن باس تارتىپ، ونىڭ جەڭىسىن لەگەتيمدى دەپ مويىندامايتىنىن ايتىپتى.

«New York Times» باسىلىمىنا سۇحبات بەرگەن تەحاس شتاتىنىڭ تاڭداۋشىسى كريستوفەر سۋپرۋن ماگناتقا داۋىس بەرمەيتىنىن ايتقان. «ترامپ ۇلتتى بىرىكتىرۋدىڭ ورنىنا ءبىر-بىرلەرىمەن ارازداستىرىپ وتىر»,-دەيدى سۋپرۋن.

«New York Times» باسىلىمىندا جارىق كورگەن «مەن نەگە ءوز داۋسىمدى دونالد ترامقا بەرمەيمىن؟» دەگەن ماقالاسىندا كريستوفەر سۋپرۋن مىرزا ترامپتىڭ دەموگوگ ەكەنىن ايتىپ، شەتەلدىك «اۋقاتتىلارعا» تاۋەلدى ەكەندىگىن ايتىپتى.

اسىرەسە، ترامپتىڭ سايلاۋدان كەيىنگى سوزدەرىنەن كەيىن سۋپرۋننىڭ جاقتاستارى 19 جەلتوقساندا ترامپقا داۋىس بەرمەۋىن ءوتىنىپتى.

دونالد ترامپ سايلاۋ الدى دودالارىندا رەسەيمەن جاۋلاسۋدى دوعاراتىنىن اشىق مالىمدەگەن ەدى. ول سونداي-اق، «حيلاري كلينتوننىڭ ەلەكتروندى پوشتاسىن رەسەي اگەنتتەرى بۇزۋى ءتيىس» دەگەندى دە ايتقان.

سونداي-اق، مەكسيكامەن شەكارانى جاۋىپ تاستايتىنىن، مۇسىلمان ميگرانتتارىن ەلدەن قۋىپ شىعاتىنىن ايتىپ، قارا ناسىلدىلەردى كەمسىتكەن سوزدەر ايتقانى دا ونىڭ رەپۋتاتسياسىنا كەرى اسەرىن تيگىزبەي قويمايدى. وسىنىڭ بارلىعىن ايتا كەلە، سۋپرۋن مىرزا 19 جەلتوقسانداعى سايلاۋدا دونالد ترامپقا داۋىس بەرمەيتىنىن جەتكىزگەن. «15 جىل بۇرىن مەن ءوز وتانىمدى، ونىڭ كونستيتۋتسياسىن قورعايمىن دەپ انت بەرگەم. 19 جەلتوقسان كۇنى مەن قايتاتىن وتانىمدى قورعاۋعا بارامىن»,-دەپتى.

ايتا كەتەيىك، كريستوفەر سۋپرۋن ترامقا داۋىس بەرۋدەن باس تارتقان العاشقى تاڭداۋشى ەمەس. تەحاستىق تاعى ءبىر ساياساتكەر ارت سيسنەرس تە ترامپتىڭ پرەزيدەنتتىك وكمپانياسىنا سەنىمسىزدىك تانىتقان-تىن.  تەحاستان وزگە وگويو شتاتىنىڭ تاڭداۋشىلارى دا پرەزيدەنتتىككە ترامپتان گورى كلينتوننىڭ لايىق ەكەندىگىن ايتادى.

نۇرگەلدى ابدىعانيۇلى

Abai.kz