وڭتۇستىك قازاقستان وبلىسى، قازىعۇرت اۋدانى اكىمى اپپاراتىنىڭ ءباسپاسوز قىزمەتى قازىعۇرتتا جىلىجاي كولەمى 90 گەكتارعا جەتتى دەپ حابارلايدى. اعىمداعى جىلى 7 گەكتار جەردى يگەرۋ تاپسىرماسى بەرىلسە، مەجە 94 پايىزعا ورىندالىپ قويىپتى. 

قازىعۇرتتا  6 گەكتار 58 سوتتىق جەردە جاسىل جەلەك جايقالىپ تۇر. اۋدان قازىر شىمكەنت حالقى مەن كورشىلەس ەلدىمەكەندەردى قىس ايلارىندا كوكونىسپەن قامتۋعا قاۋقارلى. جىلىجاي سالۋدا تۇرباتتىقتار الدا كورىنەدى. «راحمات اتا» شارۋا قوجالىعى مۇندا ەل العىسىنا بولەنگەن ۇجىم. 20 ازاماتتى جۇمىسپەن قامتىعان سەرىكتەستىك 1,6 گەكتار جەردى يگەرىپ وتىر. «اتيا» قىزاناعى مەن «تۋمي» قيارىن ەگىپ، ەكىنشى كەزەڭنىڭ داقىلدارىن جيناپ تا العان.

تۇربات اۋىلىنىڭ حالقى تەگىس جىلىجاي شارۋاشىلىعىن دامىتۋعا بەيىمدەلگەن. ولار 20 گەكتاردان استام جەردىڭ ءار گەكتارىنان 100 توننادان استام باۋ-باقشا داقىلدارىن جيناپ الادى.

 قازۇرتتىقتار وندىرگەن ءونىم شىمكەنتتەن بولەك، الماتى، استانا قالالارىنا دا جونەلتىلۋدە.  وتكەن كۇزدە قازىعۇرتتىقتار 19 875 توننا كوكونىس، 4647 توننا باقشا داقىلدارىن جينادى. مۇندا ءار ماۋسىمدا 200-دەي ازامات جىلىجايدان ناپاقا تاۋىپ كەلەدى.

ەكونوميكاسى اۋىل شارۋاشىلىعىنا بەيىمدەلگەن وڭىردە اۋىل شارۋاشىلىعى داقىلدارىن ءارتاراپتاندىرىپ، سۋارمالى جەرلەردىڭ كولەمىن ۇلعايتۋ، ءونىم كولەمىن ارتتىرۋ ماقساتىندا بىرقاتار جۇمىستار اتقارىلىپ كەلەدى. وبلىستان نەگىزىنەن ەكسپورتقا: كارتوپ، كوكونىس، باقشا، بيداي، ۇن، بالىق جانە بالىق ونىمدەرى، وسىمدىك مايى، قۇس ەتى، ماقتا تالشىقتارى شىعارىلادى. اگرارلى ايماقتا وسى جىلى كوكونىس پەن كارتوپ داقىلدارى جالپى 52,3 مىڭ گەكتارعا، ال باقشا ءونىمى 59,1 مىڭ گەكتار جەرگە ەگىلگەن. جوسپار بويىنشا جىل سوڭىنا دەيىن وبلىستا 890 مىڭ توننا كوكونىس، 1,4 ملن. توننا باقشا، 256 مىڭ توننا كارتوپ جينالادى دەپ كۇتىلۋدە.  

اباي-اقپارات