«نۇر وتان» پارتياسى وبلىستىق فيليالىنىڭ كەزەكتى XXI ەسەپ بەرۋ-سايلاۋ كونفەرەنتسياسى ءوتتى. وعان وبلىس اكىمى بەردىبەك ساپارباەۆ، استانادان كەلگەن «نۇر وتان» پارتياسىنىڭ حاتشىسى قانىبەك جۇماشەۆ، باسقارما باسشىلارى مەن پارتيا بەلسەندىلەرى قاتىستى، - دەپ حابارلايدى "اقتوبە" وبلىستىق گازەتى.
جيىندا نەگىزىنەن ەلباسى نۇرسۇلتان نازارباەۆتىڭ حالىققا ارناعان كەزەكتى جولداۋى جانە پارتيانىڭ «قازاقستان – 2021: بىرلىك. تۇراقتىلىق. جاسامپازدىق» اتتى سايلاۋالدى باعدارلاماسى اڭگىمە ارقاۋى بولدى. العاش بوپ ءسوز العان وبلىس اكىمى بەردىبەك ساپارباەۆ:
— ارينە، بۇگىنگە دەيىن كوپتەگەن جۇمىستار جاسالدى. بىراق وسىمەن توقتالىپ قالۋعا بولمايدى. «نۇر وتان» پارتياسىنىڭ توراعاسى، مەملەكەت باسشىسى ءبىزدىڭ الدىمىزعا ۇلكەن مىندەتتەر قويدى. ءبىز سونىڭ بارلىعىنىڭ ءوز دەڭگەيىندە ورىندالۋىنا كۇش سالۋىمىز كەرەك, — دەدى.
سونداي-اق، ءوڭىر باسشىسى ازاماتتاردى الەۋمەتتىك جاعىنان قولداۋعا، ازىق-تۇلىك ونىمدەرىنىڭ باعاسىن ۇدايى باقىلاۋدا ۇستاۋعا، جاستاردىڭ بويىنداعى پاتريوتتىق سەزىمدى ودان ءارى ارتتىرۋعا باسا ءمان بەرۋگە شاقىرىپ، بۇل ىستە بىرلەسە جۇمىس ىستەۋ كەرەكتىگىن جەتكىزدى.
شارادا پارتيا مۇشەلەرىنىڭ قاتارى جىل ساناپ ارتىپ كەلە جاتقانى دا ايتىلدى. ماسەلەن، 2014 جىلى وبلىستا «نۇر وتانعا» مۇشە ادامداردىڭ سانى 32 402 بولسا، بۇگىندە ولاردىڭ قاتارى 42 685 ادامعا دەيىن كوبەيگەن.
پارتيانىڭ 2015-2016 جىلدارداعى اتقارعان جۇمىسى تۋرالى جاساعان ەسەپتەن بىلگەنىمىزدەي، بيىل پارلامەنت ءماجىلىسى جانە بارلىق دەڭگەيدەگى ءماسليحات دەپۋتاتتارىنىڭ سايلاۋى جوعارى دەڭگەيدە وتكەن، سايلاۋشىلاردىڭ كوپ بولىگى «نۇر وتان» پارتياسىنا داۋىس بەرگەن. سونىڭ ناتيجەسىندە بيلىك پارتياسى جەڭىسكە جەتكەن. وبلىستىق فيليال توراعاسىنىڭ ورىنباسارى نۇرحان اعنيازوۆتىڭ سوزىنشە، پارتيانىڭ دامۋ جوسپارىنداعى جاڭا يدەولوگيالىق تاسىلدەردىڭ نەگىزى — ادامعا كۇندەلىكتى قامقورلىق كورسەتۋ، ءار ازاماتتىڭ ءوزىن قوعامنىڭ اجىراماس بولىگى رەتىندە سەزىندىرۋ. وسىعان وراي، وبلىستىق جانە اۋداندىق فيليالدار ناقتى الەۋمەتتىك توپتاردىڭ ماسەلەسىن — ەگدە ادامدار، مۇگەدەكتەر، جاستار، انا مەن بالانىڭ ماسەلەلەرىن شەشۋگە باعىتتالعان توعىز ءىرى پارتيالىق جوبانى جۇزەگە اسىرۋدا. مىسالى، ەسەپتى كەزەڭدە «كەدەرگىسىز كەلەشەك» ارنايى پارتيالىق جوباسىنىڭ اياسىندا 1132 مۇمكىندىگى شەكتەۋلى جان جۇمىسقا ورنالاستىرىلدى. 2015-2016 جىلدار ارالىعىندا «كەدەرگىسىز كەلەشەك» جوباسى اياسىندا وبلىس بويىنشا جوسپارلانعان 216 نىسانعا تولىق بەيىمدەۋ جۇمىستارىن جۇرگىزۋ اياقتالدى.
ەلباسىنىڭ تىكەلەي تاپسىرماسىمەن قۇرىلعان جاستار ۇيىمى بىرقاتار ءىرى جوبالاردى ىسكە اسىرىپ كەلەدى. 2015-2016 جىلدار ارالىعىندا «جاستار كادرلىق رەزەرۆى» جوباسىنا قاتىسۋعا 125 ۇمىتكەر ءوتىنىش بىلدىرگەن.
ء«ساتتى قادام» پارتيالىق جوباسى اياسىندا مەكتەپ ءبىتىرۋشى تۇلەكتەرمەن جۇمىستار جۇرگىزىلگەن. ايتالىق، بيىل وبلىس بويىنشا 6497 تۇلەك مەكتەپ بىتىرسە، 1899 جاس ۇلتتىق بىرىڭعاي تەستىلەۋگە مۇلدە قاتىسپاعان، ال قاتىسقانداردىڭ ىشىندە 815 تۇلەك شەكتى دەڭگەيدەن تومەن بالل جينادى. وسى تۇلەكتەردىڭ دەرەكقورلارى ازىرلەنىپ، باستاۋىش پارتيا ۇيىمدارىنىڭ اتسالىسۋىمەن جۇمىسقا ورنالاستىرۋ، قايتا دايارلاۋ كۋرستارىنا تارتۋ جۇمىستارى جۇرگىزىلگەن.
سونداي-اق «ارداگەرلەردى ارداقتايىق» جوباسى اياسىندا 107 قارتقا ەرىكتىلەر پۋلىنان قۇرالعان 50 بەلسەندى جاس جىل بويى كومەك كورسەتىپ كەلەدى، بەلسەندى قىز-جىگىتتەردىڭ «باقىتتى بالالىق شاق»، «اۋىل تۇرعىندارىن جۇمىسپەن قامتۋ»، «جاستار — وتانعا» اتتى پارتيالىق جوبالاردا دا ۇلەسى زور.
بەلگىلى بولعانداي، قوعامدىق كەڭەس پەن پارتيالىق باقىلاۋ كوميسسياسى وتكەن 2015 جىلى جانە 2016 جىلدىڭ وتكەن كەزەڭىندە بارلىعى 112 وتىرىس، ءتۇرلى دەڭگەيدەگى 164 ءىس-شارا وتكىزگەن. سوڭعى ەكى جىلدا ون پارتيا مۇشەسىنىڭ جەمقورلىق ءۇشىن جاۋاپكەرشىلىككە تارتىلعانى دا ايتىلماي قالمادى. ولاردىڭ بارلىعى دا پارتيانىڭ جارعىسىنا سايكەس پارتيا قاتارىنان شىعارىلىپتى.
جالپى، وتكەن جىلدىڭ جانە وسى جىلدىڭ ون ايىنىڭ قورىتىندىسى بويىنشا دەپۋتاتتار، مەملەكەتتىك جانە قۇقىق قورعاۋ ورگاندارىنىڭ باسشىلارى 4327 قوعامدىق قابىلداۋ وتكىزىپ، قابىلداۋعا 5258 ادام كەلگەن. قابىلداۋعا كەلگەن 923 ازاماتتىڭ ماسەلەسى وڭتايلى شەشىلىپ، 4335 ادامعا كەڭەس بەرىلىپتى. قوعامدىق قابىلداۋ بولمەسىنە كەلىپ تۇسكەن وتىنىشتەردى سارالاعاندا حالىقتى ءالى دە بولسا تۇراقتى جۇمىسقا ورنالاسۋ، تۇرعىن ۇيمەن، جەر تەلىمدەرىمەن قامتۋ، الەۋمەتتىك قامسىزداندىرۋ ماسەلەلەرىنىڭ الاڭداتاتىنى بايقالىپ وتىر.
«نۇر وتان» پارتياسىنىڭ ويىل اۋداندىق فيليالى توراعاسىنىڭ ءبىرىنشى ورىنباسارى ەركىن جيەنالين، وبلىستىق ءماسليحات دەپۋتاتى سەرگەي ۆيشنياك، «نۇر وتان» پارتياسىنىڭ ارداگەرى، «ىقىلاس» باستاۋىش پارتيالىق ۇيىمىنىڭ توراعاسى كەلدىباي ەسپاعامبەتوۆ، «نۇر وتان» پارتياسىنىڭ وبلىستىق فيليالى «جاس وتان» جاستار قاناتىنىڭ اتقارۋشى توراعاسى اسىلجان بۇركىتاليندەرگە دە ءسوز كەزەگى بەرىلىپ، ولار پارتيانىڭ ءوز سالاسى بويىنشا تيگىزگەن شاراپاتىنا، جالپى اتقارىلعان ىستەردىڭ اۋجايىنا توقتالدى.
جينالعاندار «نۇر وتان» پارتياسى وبلىستىق فيليالىنىڭ ساياسي كەڭەسىنىڭ 2015-2016 جىلدارى اتقارعان جۇمىسىن ءبىراۋىزدان «قاناعاتتانارلىق» دەپ قابىلداعان سوڭ، «نۇر وتان» پارتياسىنىڭ حاتشىسى، پارتيانىڭ ساياسي كەڭەسىنىڭ مۇشەسى قانىبەك جۇماشەۆ ەلباسىنىڭ العا قويعان تاپسىرمالارى وڭىردە تالاپقا ساي ىسكە اسىرىلىپ جاتقانىنا ريزاشىلىعىن ءبىلدىردى. ارتىنشا بىرقاتار پارتيا بەلسەندىلەرىن «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ اتىنان قۇرمەت گراموتاسىمەن، العىس حاتتارمەن ماراپاتتادى. وبلىس اكىمى بەردىبەك ساپارباەۆ تا پارتيانىڭ جەمىستى جۇمىسىنا اتسالىسىپ جۇرگەن بىرنەشە ازاماتقا العىس حات تابىستادى.
XXI ەسەپ بەرۋ-سايلاۋ كونفەرەنتسياسى بارىسىندا، سونداي-اق، پارتيانىڭ وبلىستىق فيليالىنىڭ ساياسي كەڭەسىنىڭ جاڭا قۇرامى تانىستىرىلىپ، ولاردىڭ سانى بۇرىنعىداي 33 ادامنان تۇراتىنى بەلگىلى بولدى.
ايبەك سەرىكۇلى
اباي-اقپارات
