29  قاراشادا «تۇلپار-تالگو» زاۋىتىندا قازاقستاندىق وندىرىستەن شىققان كەڭ شاناقتى جولاۋشىلار ۆاگوندارىنا كەدەن وداعىنىڭ «تەمىر جول جىلجىمالى قۇرامىنىڭ قاۋىپسىزدىگى تۋرالى» تەحنيكالىق تالابى رەگلامەنتىنە سايكەس سەرتيفيكات سالتاناتتى تۇردە تابىس ەتىلدى. - دەپ حابارلايدى قازاقپارات. بۇل تۋرالى «قازاقستان تەمىر جولى» ۇك» اق ءباسپاسوز قىزمەتىنەن حابارلادى.

«اسا جايلى ۆاگوندار جولاۋشىلار تاسىمالى جۇيەسىندە جىلجىمالى قۇرام پاركىن جاڭعىرتۋدىڭ ۇزاق مەرزىمدى باعدارلاماسى اياسىندا شىعارىلىپ جاتىر»، - دەپ اتاپ ءوتتى «قازاقستان تەمىر جولى» ۇك» اق ۆيتسە-پرەزيدەنتى ەركىن جۋسانباەۆ. جاڭا ۇلگىدەگى ۆاگوندار «تۇلپار-تالگو» زاۋىتىنىڭ كونسترۋكتورلىق بيۋروسى ماماندارى مەن يسپاندىق ارىپتەستەرىنىڭ قازاقستانداعى ۆاگونداردى وندىرىستەن شىعارۋ تاجىريبەسى مەن پايدالانۋ ناتيجەسىندە بىرلەسكەن جوباسى بولىپ تابىلادى. ۆاگونداردىڭ ەنى، سانيتارلىق-گيگيەنالىق بولمەسى جۇردەك پويىز جولاۋشىلارىنىڭ كىرىپ-شىعۋىنا بارىنشا  قولايلى ەتىلىپ، كەڭەيتىلدى. جىلجىمالى قۇرامدا ۆاگوننىڭ ەكى ءتۇرى بار.  

«تۋريست» ۆاگوندارىندا كرەسلولارى جانە  جۇك قوياتىن ورنى بار.  «گراند-كلاسس» ۆاگوندارىندا ەلەكترلى كوتەرگىشى، مۇمكىندىگى شەكتەۋلى جاندارعا ارنالعان جەكە سەبەزدەتكىشىمەن قوسا دارەتحاناسى قامتىلعان.  «تۇلپار-تالگو» ۆاگوندارى قازاقستان، رەسەي، گەرمانيا، اۆستريا، يسپانيا، چەحيا، يتاليا، ۇلىبريتانيا، فرانتسيانىڭ ارنايى ورتالىقتارىندا سىناقتاردىڭ تولىق كەزەڭدەرىنەن وتكىزىلدى. ماسەلەن، لەيپتسيگتە ۆاگونداردى پايدالانۋ كەزىندە بولاتىن ءتۇرلى جۇكتەردى تيەۋ سىناعى وتكىزىلدى. مادريدتە ۆاگون قورابى ارباشاسىنىڭ قانشالىقتى جۇكتەردى، قانشا جىل كوتەرۋگە شىداس بەرە الاتىندىعى  سىنالدى. ۆەنادا ارنايى كامەرادا: ىلعالدى اۋادا، جوعارى قىسىمدى جانە تومەنگى تەمپەراتۋرادا، جەلدىڭ جىلدامدىعىنا قاتىستى اۋا رايىنا شىدامدىلىعى جان-جاقتى ساراپتالدى. اقمولا، وڭتۇستىك قازاقستان، جامبىل، قاراعاندى وبلىستارىندا ساعاتىنا 200 كيلومەتر جىلدامدىقپەن، قيىن جول تەلىمدەرىندە، كەي جەرلەرىندە  300 -دەن 2000 مەترگە دەيىن قيىس كەتەتىن تۇستاردا سىنالدى.

 تەمىر جول كولىگى عىلىمي-زەرتتەۋ ينستيتۋتى قىزمەتكەرلەرى («تجكعزي» اق) 200 كيلومەترلىك جىلدامدىقتا جىلجىمالى قۇرامنىڭ تەجەگىش قۇرالدارىنىڭ ساپاسى مەن وزىمەن-ءوزى اجىراتىلۋىن باسقارۋ ۇدەرىسىن تەكسەردى. «سىناقتار ناتيجەسى - جىلجىمالى قۇرامنىڭ كەدەن وداعى «تەمىر جول جىلجىمالى قۇرامىنىڭ قاۋىپسىزدىگى تۋرالى» تر تس 001/2011 تەحنيكالىق رەگلامەنتى تالابىنا ساي كەلەتىندىگىن كورسەتتى. بۇل رەسەي فەدەرالدىق تەمىر جول كولىگىن سەرتيفيكاتتاۋ  رەگيسترىنىڭ سەرتيفيكاتىمەن دايەكتەلدى»،-دەپ اتاپ ءوتتى «فەدەرالدىق تەمىر جول كولىگىن سەرتيفيكاتتاۋ رەگيسترى» فبۋ جەتەكشىسىنىڭ ءبىرىنشى ورىنباسارى ا. كارياكين. اسا جايلى ۆاگونداردان جاساقتالعان جىلجىمالى قۇرام بيىلعى جەلتوقساننان استانا مەن الماتى باعدارىنا، كەلەسى جىل باسىنان الماتى-شىمكەنت باعدارىنا شىعا باستايدى.

جىلجىمالى قۇرامدى جاڭعىرتۋ اياسىندا 2021 جىلعا دەيىن «تۇلپار-تالگو» جايلى ۆاگوندارىنان جاساقتالعان پويىزداردى قوسىمشا جەتى باعدارعا - الماتى-پاۆلودار، اقتوبە-مانعىشلاق، استانا-لەنينوگور، اقتوبە-اتىراۋ، الماتى-قوستاناي، استانا-سارىاعاش جانە الماتى-مانعىشلاق باعىتىنا جىبەرۋ جوسپارلانعان. 

Abai.kz