1. بيىلعى جىلى قازاقستانعا 11 مىڭ ورالمان وتباسى كەلدى

بۇل 2015 جىلمەن سالىستىرعاندا 6 ەسە كوپ. بۇل تۋرالى «ازاماتتىق قوعام دامۋىنىڭ جاعدايى جانە پەرسپەكتيۆالارى» تاقىرىبىندا وتكەن فورۋمنىڭ پلەنارلىق وتىرىسىندا پرەمەر-ءمينيستردىڭ ورىنباسارى يمانعالي تاسماعامبەتوۆ سۇيىنشىلەدى.

«سىزدەردىڭ نازارلارىڭىزدى تاعى ءبىر وزەكتى باعىت – قازاقستانعا كەلگەن وتانداستارىمىزدى الەۋمەتتىك بەيىمدەۋ ماسەلەسىنە اۋدارعىم كەلەدى. مۇندا دا مەملەكەت پەن ۇەۇ ءوز الەۋەتىن دۇرىس قولدانا الماي وتىر. بيىلعى جىلى ەلىمىزگە 11 مىڭ وتباسى كوشىپ كەلدى. بۇل 2015 جىلمەن سالىستىرعاندا 6 ەسە كوپ. وتانداستارىمىز قۇجاتتاردى راسىمدەۋ، ءبىلىم الۋ، الەۋمەتتىك بەيىمدەلۋ تۇرعىسىندا كومەككە ءزارۋ بولىپ وتىر. ءدال وسى ماسەلەدە ۇەۇ-نىڭ ءرولى ەرەكشە ماڭىزدى دەپ بىلەمىن. ويتكەنى، ورالمانداردى جاڭا قوعامعا اكىمشىلىك مەحانيزمدەردى قولدانا وتىرىپ بەيىمدەۋگە بولمايدى. مۇنى تەك ولاردى بىرتە-بىرتە قوعامدىق قۇرىلىمدارعا تارتۋ ارقىلى جۇزەگە اسىرۋعا بولادى»، - دەدى ۆيتسە-پرەمەر.

1. ۆيتسە-پرەمەر ي. تاسماعامبەتوۆ ءداستۇرلى ەمەس ءدىني اعىمداردىڭ جەتەگىندە جۇرگەندەردى وڭالتۋدىڭ ماڭىزدى ەكەنىن اتادى

استانادا ءوتىپ جاتقان VII ازاماتتىق فورۋم بارىسىندا ءدىني احۋال ماسەلەسى دە قارالدى. پلەنارلىق وتىرىس بارىسىندا پرەمەر-ءمينيستردىڭ ورىنباسارى يمانعالي تاسماعامبەتوۆ ءداستۇرلى ەمەس ءدىني اعىمداردىڭ جەتەگىندە جۇرگەندەردى وڭالتۋ ماسەلەسىنە توقتالدى.

«دەراديكاليزاتسيا – بۇل مەملەكەت پەن ۇكىمەتتىك ەمەس ۇيىمداردىڭ بىرىگىپ، بارىنشا كۇش سالىپ جۇمىس جاسايتىن سالا.

بۇگىندە تەك 22 قوعامدىق ۇيىم ءدىن سالاسىندا كەڭەس بەرۋ جانە وڭالتۋ كومەگىن كورسەتۋمەن اينالىسادى. بۇل جالپى ۇەۇ سانىنىڭ 0,12 پايىزى عانا. ال، رەسمي ستاتيستيكا مالىمەتى بويىنشا ەلدە 15 مىڭ جۋىق ادام ءدىني جات اعىمداردى قولدايدى. بۇعان قاراماستان، تەك ءتورت وبلىستا (استانا، كوكشەتاۋ، قاراعاندى، تاراز) ەكىدەن كوپ ورتالىق جۇمىس جاسايدى، پەتروپاۆلدا بىردە-ءبىر وڭالتۋ ورتالىعى جوق.

وڭتۇستىك قازاقستان وبلىسىندا ءۇش مىڭعا جۋىق تىيىم سالىنعان ءدىني اعىمداردىڭ ءىزباسارلارى بار. الايدا، اتالعان وبلىستا تەك ءبىر عانا ۇكىمەتتىك ەمەس ۇيىم («نۇر-مۇرا» قب)» ءدىن سالاسىندا كەڭەس بەرۋ جانە وڭالتۋ ماسەلەسىمەن اينالىسادى»، - دەدى پلەنارلىق وتىرىس بارىسىندا ۆيتسە-پرەمەر ي. تاسماعامبەتوۆ.

3. تاسماعامبەتوۆ: ء«بىلىم جۇيەسىنىڭ بارلىق جەلىسى قايتا جاڭارۋدا» دەدى

استانادا VII ازاماتتىق فورۋم اياسىندا «ازاماتتىق قوعام دامۋىنىڭ جاعدايى جانە پەرسپەكتيۆالارى» تاقىرىبىندا شارانىڭ پلەنارلىق وتىرىسى ءوتىپ، وندا قازاقستان رەسپۋبليكاسى پرەمەر-ءمينيسترىنىڭ ورىنباسارى يمانعالي تاسماعامبەتوۆ ءسوز سويلەدى.

ۆيتسە-پرەمەر بۇگىنگى تاڭدا ۇكىمەت قولعا الىپ وتىرعان الەۋمەتتىك سالانىڭ بىرنەشە باعىتتارىن اتاپ ءوتتى جانە ءبىلىم بەرۋ جۇيەسىنىڭ ەرەكشە ماڭىزدىلىعىنا توقتالدى.

«بۇگىنگى تاڭدا وسى سالادا جاڭعىرتۋدىڭ جاڭا كەزەڭى باستالۋدا. ناقتىراق ايتقاندا، 2016 جىلدان باستاپ 2019 جىلعا دەيىن ورتا ءبىلىم ۇيىمدارى جۇيەسىندە كەزەڭ-كەزەڭىمەن وقىتۋدىڭ جاڭا مازمۇنىنا كوشۋ جوسپارلانعان. جاڭا وقۋلىقتار، باعدارلامالار مەن وقىتۋ ادىستەرى مەحانيكالىق وقىتۋدان فۋنكتسيونالدىق ساۋاتتىلىققا باعىتتالادى، ياعني ءوز ءبىلىمى مەن داعدىلارىن لوگيكالىق قولدانۋعا ۇيرەتەتىن بولادى»، - دەدى ءوز سوزىندە يمانعالي تاسماعامبەتوۆ.

ۇبت جۇيەسىن جەتىلدىرۋ ءبىتىرۋ ەمتيحاندارى مەن جوو ءتۇسۋ ەمتيحاندارىن ءبولۋدى قاراستىرادى. بۇل بىتىرۋشىلەردىڭ تەرەڭ ءبىلىمىن، ءبىلىمنىڭ جۇيەلىلىگى، تولىقتىعى، تالداۋ، قورىتۋ، جىكتەۋ مۇمكىندىكتەرىن انىقتايتىن داعدىلارىن تەكسەرۋگە باعىتتالادى.

كاسىپتىك جانە تەحنيكالىق ءبىلىم بەرۋ سالاسىندا مامانداردى دايارلاۋدىڭ دۋالدى جۇيەسىنە كوشۋ جۇزەگە استى. بۇل 2017 جىلدان باستاپ تەگىن جۇمىسشى ماماندىقتارىن وقىتۋ بارىسىندا تەوريا مەن پراكتيكا اراسىنداعى كەمشىلىكتى جويۋعا كومەكتەسەدى.

«جوعارى ءبىلىم بەرۋ سالاسىندا جوو-نىڭ اۆتونومدىلىققا كوشۋى جانە ولاردىڭ اكادەميالىق، قارجىلىق تاۋەلسىزدىگىن كەڭەيتۋ جۇرگىزىلۋدە. وزدەرىڭىز بايقاپ وتىرعانداي، بارلىق ءبىلىم بەرۋ جەلىسى جاڭعىرتىلۋدا. اتالعان جاڭا وزگەرىستەردى ەندىرۋدە تالقىلاۋ، تالداۋ، ناقتىلاۋ پروتسەسىنە سىزدەردى بەلسەنە قاتىسۋعا شاقىرامىز»، - دەدى پرەمەر-ءمينيستردىڭ ورىنباسارى.

5. قازاقستاندا 8 مىڭنان اسا ۇكىمەتتىك ەمەس ۇيىمدار بەلسەندى جۇمىس جاسايدى

قازاقستاندا 18 092 ۇكىمەتتىك ەمەس ۇيىم تىركەلگەن. ولاردىڭ ىشىندە 8 307 بەلسەندى جۇمىس جاسايدى. بۇل تۋرالى استانادا ءوتىپ جاتقان VII ازاماتتىق فورۋم بارىسىندا ايتىلدى.

قازاقستاندا بەلسەندى ۇكىمەتتىك ەمەس ۇيىمدار جەلىسى دامىعان 5 ءوڭىردى ەرەكشە اتاۋعا بولادى.  ولار – استانا، الماتى قالالارى، اقتوبە، جامبىل جانە وڭتۇستىك قازاقستان وبلىستارى.

ۇكىمەتتىك ەمەس سەكتوردا تۇراقتى نەگىزدە 27 مىڭ ادام جۇمىس جاسايدى.

«ۇەۇ-نىڭ قۇرىلىمى ءبىزدىڭ ازاماتتاردى كوبىنەسە تولعاندىراتىن پروبلەمالاردى سيپاتتايدى. بۇل تۇرعىدا ءبىز ۇكىمەتتىك ەمەس سەكتوردى قۋاتى مەن قابىلەتى جاعىنان ەلدەگى وڭ وزگەرىستەردىڭ قوزعاۋشى كۇشى بولا الاتىن نيەتتەستەر قاۋىمداستىعى دەپ بىلەمىز»، - دەدى قر پرەمەر-ءمينيسترىنىڭ ورىنباسارى يمانعالي تاسماعامبەتوۆ.

بۇگىنگى ۇەۇ قىزمەتىنىڭ باعىتتارى الەۋمەتتىك سالانىڭ بارلىق بولىگىن قامتيدى.

ولاردىڭ قاتارىندا جاستار ساياساتى مەن بالالار باستاماسى، حالىقتىڭ الەۋمەتتىك از قامتىلعان توبىن قولداۋ، ءبىلىم جانە عىلىم، سپورت جانە دەنە تاربيەسى، سالاۋاتتى ءومىر سالتىن ناسيحاتتاۋ، ازاماتتاردىڭ قۇقىقتارى مەن زاڭدى مۇددەلەرىن قورعاۋ، گەندەرلىق ماسەلەلەردى شەشۋ، قورشاعان ورتانى قورعاۋ، ونەر مەن مادەنيەتتى دامىتۋ سالاسىندا جۇمىس جاسايتىن ۇيىمدار، سونداي-اق، ۇلتتىق بىرلىك پەن قوعامدىق كەلىسىمدى نىعايتۋعا، تاريحي-مادەني قۇندىلىقتاردى قورعاۋعا، مەملەكەتتىك ءتىلدى دامىتۋ، دەموگرافيالىق پروبلەمالاردى شەشۋگە باعىتتالعان قوعامدىق بىرلەستىكتەر بار.  

6. تەحنيكالىق ماماندىقتار بويىنشا قوسىمشا ءبىلىم بەرۋ قىزمەتى مۇلدەم از

VII ازاماتتىق فورۋمنىڭ پلەنارلىق وتىرىسىندا قر پرەمەر-ءمينيسترىنىڭ ورىنباسارى يمانعالي تاسماعامبەتوۆ ازاماتتىق سەكتور جانە بيزنەس قۇرىلىم وكىلدەرىن قوسىمشا ءبىلىم بەرۋ قىزمەتىنە قوسىلۋعا شاقىردى.

«قازىرگى ۋاقىتتا الەمدە ءبىرىنشى ورىنعا قوسىمشا قابىلەت پەن داعدىلاردى قوياتىن تۇبەگەيلى ترانسفورماتسيا جۇرۋدە. بۇگىندە قۋانتارلىق جايت، قوسىمشا ءبىلىم بەرۋ ۇلكەن سۇرانىسقا يە بولىپ وتىر. ءبىر عانا استانادا 271 دامىتۋ ورتالىعى جۇمىس جاسايدى. الايدا، روبوتوتەحنيكا، كومپيۋتەرلىك باعدارلامالاۋ جانە گرافيكا سياقتى تەحنيكالىق ماماندىقتار بويىنشا قوسىمشا ءبىلىم بەرۋ قىزمەتى مۇلدەم از بولىپ وتىر»، - دەدى ۆيتسە-پرەمەر.

يمانعالي تاسماعامبەتوۆ قازاقستاندا، اسىرەسە وڭىرلەردە نيەت بىلدىرگەندەر جاڭا ءبىلىم الا الاتىن وزىندىك اشىق وقىتۋ جانە تانىمدىق رەسۋرستار جوقتىعىنا توقتالدى. «وسى باعىتتاعى جوبالاردى ازىرلەۋ وتە ءتيىمدى بولار ەدى دەپ سانايمىن»، - دەدى ۆيتسە-پرەمەر.

ءشارىپحان قايسار

اباي-اقپارات