رەسەي پرەزيدەنتى ۆلاديمير پۋتين ورىس گەوگرافتارى وداعىنىڭ سالتاناتتى جيىنىندا ءسوز سويلەپتى. سويلەگەندە دە ساتيرالاتىپ، سالا قۇلاش سويلەپتى.

پۋتين ورىس گەوگرافتارى وداعىنىڭ لاۋرەاتتارىن ماراپاتتاۋ راسىمىندە 9 جاسار ميروسلاۆ پەن 5 جاستاعى بىلگىر تيموفەيدىڭ گەوگرافيالىق ءبىلىمىن ءبىر سىناپ، ارتىنشا ءوزى دە ءازىل-شىنى ارالاس ءبىراز ءسوز ايتىپ قالىپتى.

گەوگرافيانى شەمىشكەدەي شاعاتىن ميروسلاۆتان رەسەي شەكاراسىنىڭ قاي جەردە اياقتالاتىنىن سۇرايدى. پرەزيدەنتىنىڭ الدىندا ەمتيحان تاپسىرىپ تۇرعان ميروسلاۆ شەكارانىڭ بەرينگ بۇعازى مەن اقش شەكاراسىمەن اياقتالاتىنىن ايتادى.

سوندا سولتۇستىكتە كورشىمىز بولىپ وتىرعان ۆلاديمير پۋتين «رەسەيدىڭ شەكاراسى ەش جەردەن اياقتالمايدى» دەپ كۇلەدى. ارتىنشا «بۇل قالجىڭ» دەگەندى قوسا ايتقان.

رەسەي پرەزيدەنتىنىڭ اقش ءام ەۋروپا ەلدەرىمەن اراسى الا ەكەنى بەلگىلى. رەسەي پرەزيدەنتىنىڭ يمپەرياليستىك قۇندىلىقتارىنا، اگرەسسورلىق ساياساتىنا دەس بەرىپ وتىرعان ساناۋلى ەل بار.

سانكتسيانىڭ توپەسىندە قالعان ءپۋتيننىڭ ءازىلى سول باتىسقا كورسەتكەن ءدوڭايباتى، دالىرەك ايتساق تۇياق سەرپىلىسى دەگەنىمىزبەن، گەوساياساتتا بۇل – اگرەسسورلىق. اسىرەسە شەكارانى شەكسىز دەگەندى باسقا-باسقا ەمەس رەسەيدىڭ پرەزيدەنتى ايتتى.

قازاقستان شەكاراسىنىڭ جالپى ۇزىندىعى 13394 كم. ونىڭ تەڭىزبەن (كاسپي) ءجۇرىپ وتەتىن تۇسى 2000 كم-دەن استام. قازاقستان باتىستا، سولتۇستىك-باتىستا جانە سولتۇستىكتە 7591 كم رەسەيمەن شەكتەسەدى.

سوندىقتان قازاقستان مەن رەسەيدىڭ اراسىنداعى شەكارا قۇرلىقتاعى ەڭ ۇزىن شەكارا بولىپ ەسەپتەلەدى. ال مەملەكەت شەكارادان باستالاتىنىن پۋتين بىلمەيدى ەمەس، بىلەدى. ويناسا دا ويىنداعىسىن ايتتى. «ورىستان دوسىڭ بولسا، ايبالتاڭ قاسىڭدا بولسىن» دەگەندى استە ەستەن شىعارماۋىمىز كەرەك.

نۇرگەلدى ابدىعانيۇلى

Abai.kz