22 قاراشا كۇنى ماڭعىستاۋ وبلىستىق  ن.ءجانتورين اتىنداعى وبلىستىق دراما تەاتردا جازۋشى-دراماتۋرگ جابال ەرعاليەۆتىڭ «جان شىرىلى» دراماسىنىڭ پرەمەراسى قويىلدى. بۇگىنگى كۇنى وزەكتى پروبلەماعا اينالعان تاقىرىپ قاسيەتتى ساحنا تورىندە ونەر تىلىمەن ءورىلدى. جالپى حالىققا ۇعىنىقتى، اسەرلى تىلمەن. جان شىرىلى - ەل ىشىنە دەندەپ ەنىپ كەلە جاتقان راديكالدى اعىمنىڭ ۋىتىنا ۋلانعان جاستاردىڭ تاعدىرى مەن قايعى-قاسىرەتى جايىندا.

كادىمگى قازاقى شاڭىراق. مامىراجاي تىرشىلىك كەشىپ وتىرعان وتباسىندا ءسال عانا ابىگەرلەنۋ بار. وتباسى جولاۋشىنى توسۋدا. جولاۋشى كولدەنەڭ كوك اتتى ەمەس، سوناۋ الماتىدان كەلە جاتقان قىزى مەن كۇيەۋ بالاسى. شاڭىراقتاعى شىرايلى ءساتتىڭ شىتىناۋى، اشىق اسپاندا كۇركىرەپ نايزاعاي ويناۋى كۇتكەن جولاۋشىلار تابالدىرىقتان اتتاعان ساتتەن باستالادى. شىعارمانىڭ ءون بويىندا ارباسۋ مەن اداسۋ، ءۇمىت پەن وكىنىش، كۇدىك پەن سەنىم تايتالاسىپ جاتىر. قازاق «اداسقاننىڭ الدى ءجون، ارتى سوقپاق» دەگەن. اۋەل باستا الدە جاستىق، الدە ءبىلىمنىڭ تايازدىعى ارباعاننىڭ ارتىنان ەرىپ كەتە بەرۋ اقىرى جارعا جىقتى. وزدەرى عانا ەمەس، باۋىر ەتى كىشكەنتاي بالاسىن دا وسى باتپاققا باتىرادى. سۇتتەي ۇيىعان ءبىر قازاق وتباسىنىڭ  شاڭىراعى وسىلاي  شايقالدى. قانشاما قايعى-قاسىرەت. كورىپ وتىرعان كورەرمەننىڭ جانارى جاسقا شىلاندى. ساناعا سالماق سالاتىن، جۇرەككە كۇش تۇسىرەتىن كورىنىستەر. دراما بىرەۋدىڭ ارتىنان كوزسىز ەرۋدىڭ، ءوزىم بىلەمدىلىككە سالىنىپ، وزگەلەردى كاپىر ساناۋدىڭ، اداسۋدىڭ سوڭى ءدال وسىنداي تىعىرىققا اكەلىپ تىرەيتىندىگىن مەڭزەيدى.

اتا-انانىڭ پەرزەنت ءۇشىن كۇيىنۋى، باۋىر ەتى بالاسى ءۇشىن سوڭعى ساتكە دەيىن كۇرەسى، وزەكتى ورتەگەن وكىنىش، جول تابا الماي كۇيزەلگەن، جانى شىرقىراعان اتا-انانىڭ جايى شىنايى باياندالادى.

ساحناداعى اكتەرلەردىڭ ويىنى دا جينالعاندارعا اسەر ەتتى.  بۇگىنگى كۇنگى باستى پرووبلەما – جات ءدىننىڭ قاۋپىن اشىق كورسەتە بىلگەن كەيىپكەرلەر  اتا-انا مەن وتاننان ىستىق ەشنارسە دە جوق ەكەنىن ۇقتىرعانداي. ەڭ باستىسى، قويىلىمنان كورەرمەن تاماشا تاعىلىم الدى، ايرىقشا اسەرگە بولەندى.

Aباي-اقپارات