قازىرگى كەزدە رەسپۋبليكامىز بويىنشا بارلىق وڭىردە جىلىجاي شارۋاشىلىعى ەرەكشە قارقىنمەن دامىپ كەلە جاتقاندىعى بەلگىلى. بۇرىندارى ىشكى نارىقتى كوكونىس ونىمدەرىمەن تولىعىمەن قامتاماسىز ەتۋ پروبلەماسى كورشى ەلدەردەن تاسىمالداۋ ارقىلى شەشىلىپ جۇرسە، ەندى وزگەگە جالتاقتاماي، قولدان كەلەتىن ىسكە ءوزىمىز-اق بىلەك ءتۇرىپ كىرىسە باستادىق.

اۋماعى ەداۋىر گەكتار جەردى الاتىن، وسىرىلگەن ونىمدەرى قايتادان وڭدەلمەيتىن، كوكونىستەردى جاڭا پىسكەن كۇيىندە قولدانۋدى قامتاماسىز ەتەتىن جاڭا، وزىق تەحنولوگيالى جىلىجاي كەشەندەرى تۋرالى ايتار بولساق، بۇل ەڭ الدىمەن سوڭعى ۋاقىتتا جاپپاي قولعا الىنىپ، مەملەكەتتىڭ قولداۋىنداعى ماقساتتى باعدارلامالار اياسىندا ىسكە قوسىلىپ جاتقان جوبالارعا قاتىستى. ولاردى تۇرعىزۋداعى باستى ماقسات – حالىقتى جاڭا پىسكەن ساپالى ونىممەن قامتاماسىز ەتۋ، نارىقتاعى باعانى ءتۇسىرۋ، سونداي-اق، ماۋسىمارالىق كەزەڭدە كوكونىستەردىڭ باعاسىن تۇراقتاندىرۋ بولىپ تابىلادى. 

وسى ورايدا وڭتۇستىك قازاقستان وبلىسى جىلىجاي شارۋاشىلىقتارىن دامىتۋ بويىنشا ەلىمىزدە كوش باستايدى. 2016 جىلدىڭ 1 قاڭتارىندا وڭتۇستىك قازاقستان وبلىسى بويىنشا جالپى جىلىجايلار كولەمى 79,64 گا جەردى قۇراعان. بيىلعى جىلى جىلىجايلار كولەمىن قوسىمشا 3,0 گا ۇلعايتۋ تاپسىرماسى بەرىلگەن بولسا، اعىمداعى جىلدىڭ 9 ايىندا 3,99 گا جەرگە جىلىجايلار قۇرىلىپ قويىلعان (133,0 %). بۇل رەسپۋبليكالىق كورسەتكىشتىڭ 87 پايىزىنا تەڭ. ال اتالعان شارۋاشىلىقتاردا 10 مىڭعا جۋىق ادام جۇمىس ىستەۋدە. سولاردىڭ ءبىرى ماقتارال اۋدانىنا قاراستى "امينا" شارۋا قوجالىعىنىڭ باسشىسى سارىباەۆ بەرىك 1,5 گا جەرگە جىلىجايدا قىزاناق ءونىمىن ەگىپ، 142,5 توننا ءونىم الىپ، ورتاشا ونىمدىلىك 950 تس/گا قۇراپ وتىر. بۇل باسقالارمەن سالىستىرعاندا ۇلكەن ەڭبەك دەۋگە بولادى.

Abai.kz