ەلباسى ەلىمىزدى جەمىس-جيدەك كوكونىس ونىمدەرىمەن قامتاماسىز ەتۋدە وڭتۇستىك وڭىرگە اسا زور سەنىم ارتىپ وتىر. ويتكەنى سوڭعى جىلدارى وڭتۇستىكتىك ديحانداردىڭ جەردى يگەرۋگە، ەڭبەك ونىمدىلىگىن ارتتىرعا دەگەن ىنتا ىقىلاسى زور.

«بۇگىندە ءبىز العا قويعان باسىم مىندەتتەردىڭ ءبىرى – ءار ءوڭىردىڭ الەۋەتىن اشۋ. استىق ەگۋمەن سولتۇستىك وڭىرلەر اينالىسادى، ولار سوعان ماماندانعان، قانداي جاعدايدا بولماسىن ساپالى ەگىن بولادى. شىعىستا التىن مەن كۇمىس، ورتالىقتا مىس، باتىستا مۇناي وندىرىلەدى. وڭتۇستىك وبلىستار بۇكىل ەلدى كوكونىسپەن قامتاماسىز ەتىپ، ونىمدەرىن شەتەلگە دە ەكسپورتتايدى.

بۇعان قوسا، وڭتۇستىك وڭىردە ءجۇزىم شارۋاشىلىعى دامىپ جاتقاندىقتان، ءبىز ەندى شاراپ ونىمدەرىن شىعارۋمەن دە بارىنشا بەلسەنە اينالىسا الامىز. ءۇش جىل بۇرىن فرانتسيادا جۇرگەندە شاراپ شىعاراتىن زاۋىتتا بولىپ، ىشىندە تۇرىپ ويلادىم.

نەگە ءبىز دە وسىنداي شاراپ شىعارمايمىز دەپ» دەگەن ەدى ەلباسى وڭتۇستىككە جاساعان ءبىر ءىسساپارىندا. سوندىقتان سوڭعى جىلدارى وڭتۇستىكتىك شارۋالار ءجۇزىم وسىرۋگە اسا ۇلكەن كوڭىل ءبولىپ كەلەدى. كوپ ۇزاماي قازاقستاندىق شاراپتار الەمدىك برەندكە اينالادى دەپ تە ءۇمىت ەتىلۋدە. بۇگىندە وڭتۇستىكتەگى 600 گەكتار اۋماقتا ءجۇزىمنىڭ سەگىز ءتۇرى وسىرىلۋدە. «ركاتسيتەللي» مەن «ساپەراۆي» سەكىلدى ءجۇزىم سورتتارى وزىمىزدە بۇرىننان بار.

ال قالعان التاۋى – كابەرنە فران، كابەرنە سوۆينون، سوۆينون بلانش، شاردونە، مۋسكات وتتونەل، ۆيونەدەن سەكىلدى ءجۇزىم سورتتارىنان فرانتسۋزدار وتە جوعارعى ساپالى شاراپ سۇزەدى. ايتا كەتەر جايت وڭتۇستىكتىڭ القابى مەن اۋا رايى ساپالى ءجۇزىم سورتتارىن دايىنداۋعا اسا قولايلى ەكەنىن ماماندار دا ايتىپ وتىر. ەندەشە جەرى قۇنارلى، شارۋالارى ەڭبەكقور وڭتۇستىك وڭىردەن كۇتىلەر ءۇمىت تە كوپ بولىپ وتىر. 

Abai.kz