سوڭعى ترەندتىڭ تاساسىندا قالعان تاعى ءبىر جاڭالىق – ەلباسىنىڭ Bloomberg-كە بەرگەن سۇحباتى بولدى. «Dalanews.kz» سايتىنىڭ دەرەكتەرىنە سۇيەنسەك،  ەلباسىنىڭ ىسكەرلىك كەلبەتىن ەكىباستان ءسوز ەتىپ كەلە جاتقان اگەنتتىكتىڭ وكىلدەرى كوپتى كۇپتى قىلىپ جۇرگەن كەيبىر ماسەلەلەردىڭ تەتىگىن اعىتىپتى.

سۇحبات بارىسىندا نۇرسۇلتان نازارباەۆ ەلىمىزدىڭ ساياسي جانە الەۋمەتتىك-ەكونوميكالىق دامۋىنىڭ باستى باعىتتارىنا قاتىستى ساۋالدارعا جاۋاپ بەرىپ، ەاەو-عا مۇشە مەملەكەتتەر ىنتىماقتاستىعىنىڭ پەرسپەكتيۆالارى، جاھاندىق ەكونوميكانىڭ، تەرروريزممەن كۇرەستىڭ ماڭىزدى اسپەكتىلەرى، سونداي-اق شەت ەلدەرمەن ءوزارا ءىس-قيمىلدى نىعايتۋ جونىندە ايتقان.

سونداي-اق، ءوز سۇحباتىندا قازاقستاننىڭ كەلەسى باسشىسى كىم بولادى دەگەن سۇراققا بۇكپەسىز جاۋاپ بەرگەن ەكەن. بالالار بيلىك باسىنا كەلمەيتىن كورىنەدى. ەلباسى ءوزى سولاي دەپتى. 

پرەزيدەنت قازاقستان بيلىگىنىڭ كونستيتۋتسياعا ساي اۋىساتىنىن، بارلىق پروتسەستىڭ تەك زاڭ شەڭبەرىندە جۇزەگە اساتىنىن جەتكىزگەن.

ەلباسى سونداي-اق قازاقستان پرەزيدەنتى بولىپ سايلانعان ادامنىڭ 5 جىلدان 2 مارتە سايلانا الاتىنىن ەسكەرتىپ، ءوز جوسپارلارىن جۇزەگە اسىرۋعا بارلىق قاجىر-قايراتىن جۇمسايتىنىن جەتكىزگەن.

«مەن 2020 جىلعا دەيىن جۇمىس ىستەيمىن، 2020 جىلى جۇزدەسەيىك», – دەيدى ەلباسى (“Until 2020, I’m going to work. And we’ll meet again in 2020,” said Nazarbayev).

نۇرزات توعجان

Abai.kz