مەكتەپ فورماسىنىڭ باعاسى ورتاشا ستاتيستيكالىق تۇتىنۋشىنىڭ ماتەريالدىق مۇمكىندىكتەرىن نەگىزگە الا وتىرىپ، الەۋمەتكە باعىتتالۋى ءتيىس.

مەكتەپ فورماسى  تۋرالى اڭگىمەلەر ادەتتە وقۋ جىلى باستالار الدىندا قىلاڭ بەرەدى. ال، بيىلعى جىلى بۇل ماسەلەگە ەرتەلەۋ قوزعاۋ سالىنىپ وتىر.  ونىڭ سەبەبى  دە جوق ەمەس، وسى ۋاقىتقا دەيىن مەكتەپ فورماسىن نەگىزىنەن تۇرىكتەردىڭ، قىرعىز بەن قىتايدىڭ وندىرۋشىلەرىنەن ساتىپ الىپ كەلدىك. وزگە ەلدەن ساتىپ الۋ – سول ەلدىڭ ەكونوميكاسىن بايىتۋعا ۇلەس قوسۋ دەگەن ءسوز. سول سەبەپتى بيىلدان باستاپ مەكتەپ كيىمىن ءوز تىگىنشىلەرىمىزدىڭ وندىرۋىنە مۇمكىندىك بەرىلگەلى وتىر.

الايدا، ماسەلە تاعى دا سول قاراجاتقا كەلىپ تىرەلەدى. ايتالىق، الماتىداعى قارا بازاردا قىتاي، قىرعىز فورمالارى 5-8 مىڭ تەڭگە شاماسىندا ساتىلىپ كەلدى. ال، الماتىلىق «Angelher»، «Glasman»، «ەركە-ناز»، «سىمبات»  فيرمالارىنىڭ مەكتەپ فورمالارى 10-25 مىڭ تەڭگە توڭىرەگىندە. البەتتە،  وتاندىق ءونىمدى ساتىپ العىڭ كەلىپ، قانشا جەردەن پاتريوت بولساڭ دا، قالتاڭا قاراي كوسىلەتىنىڭ ايان. مىنە، سودان دا قىتاي مەن قىرعىز ونىمدەرى ءبىزدىڭ تاۋارلاردىڭ جولىن بوگەيدى. وتاندىق تىگىنشىلەر تىككەن فورمالاردىڭ كوبى وتپەي، سورەدە قالادى.

دەگەنمەن، وسى ولقىلىقتىڭ ورنىن تولتىرۋ قادامدارى قولعا الىنا  باستاعان سىڭايلى. بيىلعى جىلدىڭ قاڭتار ايىندا قازاقستاندا ورتا ءبىلىم بەرەتىن ۇيىمدارعا ارنالعان مىندەتتى مەكتەپ فورماسى تۋرالى تالاپتار ماقۇلدانعان بولاتىن. قۇجاتقا قر «اتامەكەن» ۇلتتىق كاسىپكەرلەر پالاتاسىنىڭ مەكتەپ فورماسىن وتاندىق وندىرۋشىلەردەن ساتىپ الۋ تۋرالى ۇسىنىسى ەنگىزىلدى. پالاتا ساراپشىلارى مەكتەپ فورماسىمەن قامتاماسىز ەتۋگە دايىن تىگىن كاسىپورىندارىنىڭ بازاسىن قۇردى. سونىڭ ءبىرى – كوكشەتاۋ قالاسىنداعى  №1 مەكتەپتە وتكەن كەزدەسۋ بارىسىندا تىگىنمەن اينالىساتىن التى كاسىپورىن بىردەي مەكتەپ فورماسىن تىگۋگە دايىن ەكەندىكتەرىن مالىمدەدى.  مەكتەپتەگى كەزدەسۋگە جالپى ءبىلىم بەرۋ ۇيىمدارىنىڭ وكىلدەرى مەن اتا-انالار، كاسىپكەرلەر قاتىستى.

كاسىپكەرلەر دايىنداپ كەلگەن مەكتەپ فورماسىنىڭ ۇلگىلەرىن جاس مودەلدەر ساحناعا شىعىپ تانىستىردى.

 «دياس» تىگىن فابريكاسى» جشس ديرەكتورى حاسەن قاجىباەۆتىڭ ايتۋىنشا، بۇل باستامانى وندىرۋشىلەر بىردەن قولداعان، الايدا ولاردىڭ وزدەرى ورتاشا ستاتيستيكالىق تۇتىنۋشىنىڭ ماتەريالدىق مۇمكىندىكتەرىن نەگىزگە الۋى كەرەك.  «قازىرگى نارىقتىق جاعدايلاردا ءبىر جيىنتىقتىڭ باعاسى شامامەن 10000 تەڭگەدەي بولۋى ءتيىس»، – دەيدى ول.  

وبلىستىق ءبىلىم باسقارماسى ۇسىنعان مالىمەتتەرگە سايكەس، 2016-2017 وقۋ جىلىندا اۋدان بويىنشا مەكتەپ فورماسىنا دەگەن قاجەتتىلىك 86 231 توپتاما بولسا، وبلىس ورتالىعىندا 13 مىڭعا جەتەدى. بۇگىندە وبلىستا 26 ءوندىرۋشى وقۋشىلارعا ارنالعان فورمالىق كيىم تىگۋگە جۇمىلدىرىلعان.

مەكتەپ وقۋشىلارىنا ارنالعان كيىم فورماسىنا قويىلاتىن ءبىر تالاپ -  بىرىڭعاي بولۋى. وسى تۇرعىدا  «جۇماعۇلوۆ م.س.» جەكە كاسىپكەرلىگىنىڭ باسشىسى ايدا مۇحامەدجاروۆا: ء«تۇسى مەن ۇلگىسى ءبىر-بىرىنەن قاتتى ەرەكشەلەنبەۋى كەرەك. بۇل كەز كەلگەن دايىنداۋشىعا ىڭعايلى بولادى»، - دەيدى.  

ەلىمىزدە 2,5 ميلليوننان استام مەكتەپ وقۋشىسى بار. ەندەشە، 2,5 ملن بالانى وتاندىق تىگىنشىلەر كيىندىرسە، بۇل وتاندىق ءونىمدى قولداۋ ءارى ەكونوميكاعا قوسىلعان ۇلەس ەمەس پە؟ وعان سول تىگىن فيرمالارىندا جۇمىسپەن قامتىلعان ادامداردى قوسىڭىز. ارينە، ول ءۇشىن مەكتەپ كيىمى ساپالى، ورتاشا ستاتيستيكالىق وتباسى ءۇشىن قولجەتىمدى  بولۋى مىندەتتى. ولاي بولسا، وتاندىق تىگىن كومپانيالارىنىڭ  بۇل مىندەتتىڭ ۇدەسىنەن شىعۋى وزدەرىنە بايلانىستى  دەر ەدىك.

Abai.kz