ستاتيستيكا جونىندەگى كوميتەتتىڭ مالىمەتىنە قاراعاندا، ەلىمىز ءوز وندىرىسشىلەرى ەسەبىنەن كوكونىسپەن ءوزىن-ءوزى تولىعىمەن قامتاماسىز ەتە الادى. ال جەمىس-جيدەك ونىمدەرى مەن سونداي-اق ماۋسىمارالىق كەزەڭدەگى ەرتە پىسەتىن كوكونىستە جەتىسپەۋشىلىك بار. 

بۇگىندە ەلىمىزدە 12 ءتۇرلى نەگىزگى كوكونىس ءتۇرى وسىرىلەدى. ولار – كارتوپ، قىزاناق، پياز، قيار، قىرىققابات، ءسابىز، اسحانالىق جانە قانت قىزىلشاسى، اسقاباق، بۇرىش، بايالدى، سارىمساق. ۇلەستىڭ باسىم بولىگى، انىعى ۇشتەن ءبىرى كارتوپقا تيەسىلى، ياعني 38 پايىز.

نەگىزىنەن ەلىمىزدەگى كوكونىس پەن جەمىس ەگىلەتىن ەگىس القابىنىڭ 87 پايىزى وڭتۇستىك وبلىستارعا تيەسىلى. وڭتۇستىك قازاقستان وبلىسىنا –38,5 پايىز، الماتى وبلىسىنا – 37,4 پايىز، جامبىل وبلىسىنا – 9,6 پايىز، قىزىلوردا وبلىسىنا – 1,6 پايىز. وڭتۇستىك ايماق تابيعي-كليماتتىق قولايلىلىعىمەن قاتار، كوكونىس جانە ءجۇزىم وسىرۋدە الەۋەتى زور. ەلىمىزدەگى حالىقتىڭ ماۋسىمارالىق بالعىن كوكونىستى تۇتىنۋ تالابى 686 مىڭ توننانى قۇرايدى.

ال جازعى ماۋسىمدا – 789 مىڭ توننا. جىلىنا جالپى ورتاشا ەسەپپەن العاندا 8-9 ميلليون توننا كوكونىس جينالادى. مامىر مەن قازان ايلارى ارالىعىندا اشىق الاڭدا وندىرىلەتىن كوكونىس كولەمى 3,3 ميلليون توننا. بۇل ىشكى سۇرانىستى تولىعىمەن قامتاماسىز ەتەدى. ارتىلعانى كونسەرۆىلەۋگە، ساقتاۋعا، ەكسپورتقا جىبەرىلەدى. ال ماۋسىمارالىق مەزگىلدە جابىق توپىراقتا نەبارى 153 مىڭ توننا بالعىن كوكونىس وسىرىلەدى.

قالعان 530 مىڭ توننادان ارتىق قاجەتتىلىك (قىزاناق، پياز، قيار، قىرىققابات، ءسابىز) نارىققا ەلىمىزدىڭ كوكونىس ساقتاۋ قويمالارىنان جانە ورتا ازيا، قىتاي، رەسەي مەن يراننان كەلەدى. بۇگىندە ەلىمىزدە 1,2 ميلليون توننا ءونىمدى ساقتاۋ قويماسى بار. ونەركاسىپ قويماسى تاپشىلىعى 417 مىڭ توننانى قۇرايدى. جەمىس-كوكونىس ساقتاۋ قويماسى تاپشىلىعىن بولدىرماۋ ءۇشىن 2020 جىلعا دەيىن ونىڭ كولەمىن 1,5 ميلليون تونناعا دەيىن جەتكىزۋ قاجەت. وسى ماقساتتا وڭتۇستىك قازاقستاندا 136 گەكتار جەرگە جىلىجايلار سالىنۋدا.

Abai.kz