قازاقستان پرەزيدەنتى نۇرسۇلتان نازارباەۆ بۇگىن، قازاقستاندا العاش رەت اتاپ ءوتىلىپ جاتقان العىس ايتۋ كۇنى ارىپتەستەرىنەن كەشىرىم سۇرادى دەپ حابارلايدى ازاتتىق سايتى جەرگىلىكتى اگەنتتىكتەرگە سىلتەمە جاساپ.

بۇگىن استانادا العىس ايتۋ كۇنىنە وراي ۇيىمداستىرىلعان شارادا نازارباەۆ قازاقستاندىقتاردى العىس ايتۋ كۇنىمەن قۇتتىقتاپ، بۇل كۇننىڭ ءمانى بار ەكەنىن ايتتى. ول كوپ ەلدە "تىنىشتىق كەتىپ، قاقتىعىستار بولىپ جاتقاندىقتان" ءدال قازىر قازاقستاندىقتار ءبىر-بىرىنە قولداۋ كورسەتكەنى ءۇشىن العىس ءبىلدىرىپ، ءبىر-بىرىنە قۇرمەت كورسەتۋى كەرەگىن ايتتى. نازارباەۆ بۇعان قوسا، وسىنداي بايتاق جەر قالدىرعان اتا-بابالارعا العىس ايتۋ كەرەك ەكەنىن ءبىلدىردى.

"ەگەر وكپە-رەنىش بولسا، كوڭىلگە تيەتىن سوزدەر ايتىلسا بۇل كۇنى كەشىرۋگە بولادى. بۇگىن مەن تاڭەرتەڭ ارىپتەستەرىمنەن رەنجىتىپ، سوككەن بولسام كەشىرۋلەرىن سۇرادىم" دەدى نازارباەۆ.

قازاقستاندا العىس ايتۋ كۇنىن اتاپ ءوتۋ 2016 جىلى 15 قاڭتاردا پرەزيدەنت نۇرسۇلتان نازارباەۆتىڭ جارلىعىمەن بەكىتىلگەن.

نۇرسۇلتان نازارباەۆ 2015 جىلى 23 ساۋىردە قازاقستان حالقى اسسامبلەياسىنىڭ 22-سەسسياسىندا قازاقستانداعى حالىقتاردىڭ ءبىر-بىرىنە جانە قازاقتارعا العىس ءبىلدىرۋ كۇنىن اتاپ ءوتۋدى ۇسىنعان. نازارباەۆ ستاليندىك رەجيم كەزىندە قازاقستانعا مىڭداعان وزگە ۇلت وكىلدەرى دەپورتاتسيالانىپ، قازاقتاردىڭ ولاردى جاتسىنباي، قابىلداعانىن ايتقان.