س.سەيفۋللين اتىنداعى قاراعاندى  وبلىستىق

قازاق  دراما تەاتى ۇجىمىنىڭ

اشىق حاتى

ءبىز، قاراعاندى وبلىستىق قازاق دراما تەاترىنىڭ ۇجىمى، وسى اشىق حاتىمىزدى جولداي وتىرىپ، قازاقستان تەاتر قايراتكەرلەرى وداعىنىڭ توراعاسى، قازاقستاننىڭ حالىق ءارتيسى، مەملەكەتتىك سىيلىقتىڭ يەگەرى، ونەرتانۋ كانديداتى، تەاتر ونەرىنە سان بۋىن شاكىرت تاربيەلەگەن ۇلاعاتتى ۇستاز تۇڭعىشباي قادىرۇلى جامانقۇلوۆتىڭ قازاق تەاتر جانە كينو ونەرىن دامىتۋ ىسىنە قوسقان  ۇشان-تەڭىز ەڭبەكتەرىن ەسكەرە وتىرىپ، ونىڭ وسى ابىروي بيىگىن ساقتاپ قالۋدى سۇرايمىز.    

قازاقستان تەاتر قايراتكەرلەرى وداعى – ءوز قىزمەتىن 1962 جىلدان بەرى جالعاستىرىپ كەلە جاتقان قوعامدىق ۇيىم.

وسى جىلدار ىشىندە بۇل قازاقستان تەاترلارىنا كوپ  كومەك پەن قولداۋلار كورسەتىپ، ونەر جولىندا العا قاراي ىنتالاندىرىپ، دامىتۋعا  تىكەلەي مۇرىندىق بولىپ  كەلەدى.

سوڭعى جىلدارى  وداققا توراعا بولىپ، تۇڭعىشباي جامانقۇلوۆتىڭ  كەلۋىمەن بىرگە، تەاتر قايراتكەرلەرى وداعىنىڭ جۇمىسى اناعۇرلىم جاندانىپ،  قانشاما يگى ىستەرگە تالپىنىس جاسالىپ، ناقتى جۇمىستار اتقارىلۋدا.

قانشاما جىلداردىڭ تەزىنەن، سىنىنان وتكەن بۇل وداقتىڭ بارلىق قازاقستان تەاترلارى ءۇشىن اسا قىمبات ەكەندىگى، قانشالىقتى كەرەك ەكەندىگى ۋاقىت وتكەن سايىن ايقىن سەزىلە تۇسۋدە.

ء بىز، بۇكىل ەلىمىز تەاترلارىنىڭ ونەرىن العا جەتەلەۋگە بىردەن-ءبىر ۇيتقى بولىپ، 55 جىلدان اسا ءمىنسىز قىزمەت ەتىپ كەلە جاتقان قازاقستان تەاتر قايراتكەرلەرى وداعىنا اياعىنا دەيىن ادال بولىپ قالىپ،  سونىڭ ساپىندا قالۋدى قالايمىز. 

سوڭعى جىلدارى  تەاتر قايراتكەرلەرى وداعىنىڭ تىكەلەي مۇرىندىق بولىپ، ۇيىمداستىرۋىمەن قانشاما يگى ىستەرگە تالپىنىس جاسالىپ، ناقتى جۇمىستار اتقارىلدى.

ماسەلەن، تەاتر قايراتكەرلەرى وداعى تاراپىنان جىل سايىن وتكىزىلەتىن رەسپۋبليكالىق «ەڭلىكگۇل» تەاتر ونەرى بايقاۋىنىڭ قورىتىندىسىندا جىلدا 10-نان اسا نوميناتسيالار  بويىنشا ايماقتاردا جۇمىس ىستەيتىن ارتيستەرگە، تەاتر سۋرەتشىلەرىنە، دراماتۋرگتەرگە  جۇلدەلەر بەرىلەدى. ءار جۇلدەنىڭ سىياقىسى 300 مىڭ تەڭگەدەن 1 ملن. تەڭگەگە دەيىنگى ارالىقتى قۇرايدى.

بۇدان بولەك، جىل سايىن وبلىستاردا قانشاما تەاتر فەستيۆالدارى، ماستەر-كلاسس وقۋلارى وتكىزىلەدى. وداق تاراپىنان بۇكىل رەسپۋبليكاعا تارايتىن «تەاتر» جۋرنالى شىعارىلادى. سولاردىڭ بارىنە تىكەلەي ۇيتقى بولاتىن – تەاتر قايراتكەرلەرى وداعى. 

ەگەر، قازاقستان تەاتر قايراتكەرلەرى وداعىنا ۇكىمەت تاراپىنان قولداۋلار كورسەتىلىپ تۇراتىن بولسا، ەلىمىزدىڭ تەاترلارى شەت ەلدەرگە دە ءجيى-ءجيى شىعىپ، حالىقارالىق ونەر دودالارىندا باقتارىن سىنار ەدى، قازاق تەاترى ونەرىن الەم جۇرتشىلىعىنا تانىتىپ، كەڭ قانات جايىپ، وركەندەر ەدى.

ءبىز، قازىرگى قازاقستان تەاتر قايراتكەرلەرى وداعىنىڭ جۇمىسىن تولىق قاناعاتتانارلىق دەپ ەسەپتەيمىز.

ءبىز، قازاقستان  رەسپۋبليكاسى پرەزيدەنتىنەن، ۇكىمەتتەن، بارشا قازاقستان تەاترلارى ۇجىمدارىنان ءبىزدىڭ اشىق حاتىمىزعا قولداۋ كورسەتىپ، قازاقستان تەاتر قايراتكەرلەرى وداعىن جانە ونىڭ توراعاسى تۇڭعىشباي جامانقۇلوۆتىڭ ابىروي بيىگىن  ساقتاپ قالۋعا ىقپال ەتۋدى سۇرايمىز.

س.سەيفۋللين اتىنداعى قاراعاندى  وبلىستىق قازاق  دراما تەاتى ۇجىمىنىڭ تىلەگى

84 ادام قول قويعان

Abai.kz