«بۇرىن قىلمىس جاساعان، جۇمىسسىز، ديپلومسىز. ءدىني ساۋاتى كەم، ءدىني ادەبيەتتەردى وقىماعان. بىراق، عالامتورداعى ءدىني ماتەريالدار  مەن تەررورلىق ارەكەتتەرگە ۇندەيتىن ۋاعىزشىلاردىڭ سوزىنە تەز بەرىلەدى».

قازاقستان رەسپۋبليكاسى باس پروكۋراتۋراسى قوعامدىق قاۋىپسىزدىك تۋرالى زاڭداردىڭ قولدانىلۋىن قاداعالاۋ دەپارتامەنتى باستىعىنىڭ ورىنباسارى قايىرگەلدى ساكەنوۆتىڭ ماقالاسىندا تەرىس اعىمدا جۇرگەن جاستاردىڭ  بەينەسى جوعارىداعىداي باياندالادى. ماقالا اۆتورىنىڭ جازۋىنشا، بىلتىر ەكستەرميستىك جانە تەررورلىق قىلمىس جاساعانى ءۇشىن 143 ادام سوتتالىپتى. وسىنداي كەلەڭسىزدىكتەردىڭ الدىن الۋ ماقساتىندا 2016 جىلى اقتوبە وبلىسىندا جەرگىلىكتى حالىق كۇندەلىكتى كەزدەسەتىن ماسەلەلەردى رەتتەپ، قىلمىستىق ىستەردىڭ جولىن كەسۋ شارالارى جۇرگىزىلگەن. اتالعان شاراعا ءدىنتانۋشىلار بار، دارىگەرلەر مەن قارجىگەرلەر بار، پسيحولوگتار مەن جۇمىسپەن قامتۋ ورتالىقتارىنىڭ ماماندارى بار، بارلىعى – 230 مامان جانە 145 مىڭ ادام قاتىسقان 2,5 مىڭ جيىن وتكىزىلىپتى. جيىن بارىسىندا جۇمىسسىزداردىڭ جۇمىسقا تۇرۋىنا، جۇمىس ورىندارىنان جالاقىلارىن الا الماي جۇرگەندەرگە  ناقتى كومەك كورسەتىلگەنگە ۇقسايدى. استانا مەن الماتىدان بارعان دارىگەرلەر 4 مىڭنان استام ادامدى قاراپ، مۇگەدەكتەرگە تىرەك اربالار بەرىلىپتى.

ءجا، بۇنىڭ ءبارى دۇرىس قوي. بىراق، ءبىزدىڭ ۇكىمەت، زاڭنىڭ ورىندالۋىن قاداعالايتىن ورگان (پروكۋراتۋرا) نەگە كەش قيمىلدايدى وسى؟ نەگە ءباسپاسوزدىڭ دابىلىنا قۇلاق اسپايدى؟ بىزگە ماسەلەنىڭ مىنە، وسى جاعى تۇسىنكسىز. قايىرگەلدى اناۋربەكۇلىنىڭ سوزىنە سۇيەنسەك، تەرىس اعامنىڭ سوڭىندا جۇرگەن جاستاردىڭ دەنى جۇمىسسىز ەكەن. ال، ءبىر قىزىعى ۇكىمەت شەشە الماي وتىرعان وسى جۇمىسسىزدىقتىڭ جايىن ءداستۇرلى ەمەس ءدىني جات اعىمنىڭ جەتەكشىلەرى استىرتىن رەتتەپ، ورايىن كەلتىرىپ وتىر. قايتىپ دەيسىز عوي؟ جۇمىسسىز جاستارعا ۇيالى تەلەفوندار مەن اۆتوكولىكتەردىڭ بولشەكتەرىن ارزان باعامەن تاراتۋ ارقىلى. «اش ادامعا بالىق بەرمە، بالىق اۋلاۋدى ۇيرەت» دەمەكشى، جات اعىمداردىڭ كولەڭكەدەگى «كوسەمدەرى» الگىندەي جەڭىل-جەلپى تابىس كوزدەرىن جاستارعا تاۋىپ بەرىپ قانا قويماي، ولاردى ءوز قاتارىنا تارتىپ، قاراسىن مولايتىپ-اق جاتىر. وتكەن جازدا الماتىدا الا تايداي بۇلىك سالعان كۇلەكباەۆ، مىسالى، كوك بازاردىڭ جانىندا ۇيالى تەلەفون ساتىپ جۇرگەن جاستىڭ ءبىرى بولعان. سول قاتاردا ەندى قانشا كۇلىكباەۆتىڭ جۇرگەنىن كىم بىلەدى؟ بىراق، قازاق ۇكىمەتى مەن زاڭ ورگاندارى وتپەلى ناۋقان تىرلىكتەن ارىگە باسار ەمەس. سونى قاپىسىز اڭعارعان جات اعىمدار قازاق جاستارىن جۇمىسپەن عانا ەمەس، اقاشامەن، باسپانامەن، وزگە دە قاجەتتىلىكتەرمەن، قات دۇنيەلەرمەن، ءتىپتى، بايبىشە-توقالمەن  قامتاماسىز ەتىپ، جارىلقاپ جاتىر.

Abai.kz