تالدىقورعان قالاسىنىڭ تۇرعىنى سالماعى 40 كگ بولاتىن گىر تاسىن تىسىمەن كوتەردى. ول بۇدان وزگە دە ونەرلەرىن كورسەتىپ، ستۋديا قوناقتارىن تاڭ-تاماشا ەتتى.

بۇل تۋرالى “ايتۋعا وڭاي” باعدارلاماسىندا ايتىلدى.

ميراس قۇرىمجانوۆ تالدىقورعان قالاسىنىڭ تۇرعىنى. ول مەكتەپ بىتىرگەلى سپورتپەن اينالىسىپ كەلەدى. ۋنيۆەرسيتەتتە وقىپ جۇرگەن كەزدە، ءارتۇرلى قاشىقتىققا جۇگىرۋدەن الدىڭعى ورىندارعا يە بولدى. كەيىن بىرتىندەپ اۋىر اتلەتيكاعا ويىستى. قازىر ول 40 كگ گىر تاسىن تىسىمەن كوتەرىپ، 15-20 كيلوگرامدىق شىنجىرمەن سەكىرەدى. سونداي-اق قۇلاعىمەن 5 ليتر سۋ كوتەرىپ، ءبىر ساۋساقپەن عانا جەر تىرەپ تۇرىپ، 20 رەت تارتىلا الادى. ەڭ قىزىعى، ول قالىڭ رەزىڭكەدەن جاسالعان گريلكانى ۇرلەپ جارىپ تالايدى تاڭ قالدىرعان.

“جۋىردا تالدىقورعاندا رەكورد ورناتتىم. سالماعى 40 كگ بولاتىن گىر تاسىن تىسىممەن 30 سەكۋند بويى ۇستاپ تۇردىم. جەتى جاسىمنان باستاپ سپورتپەن اينالىستىم. جۇگىرۋدەن دە ءارتۇرلى جەتىستىكتەرگە جەتتىم. كوبىنەسە سپورتپەن ۇيدە اينالىستىم. كەز كەلگەن جاستاعى ادام سپورتپەن اينالىسۋى كەرەك. سەبەبى، ونىڭ دەنساۋلىققا بەرەر پايداسى مول. اتا-بابامىزدىڭ قانى مىقتى. اكەم جاۋىرىنى جەرگە تيمەگەن پالۋان بولعان. ۇيدە ءتورت قىز، ءۇش ۇلمىز”، – دەيدى ميراس قۇرىمجانوۆ.

ەر ازامات ءوزىنىڭ جەتى جاسار قىزىن دا سپورتقا باۋلىپ ءجۇر ەكەن. ول جوعارىداعى ونەرلەرىنىڭ بارلىعىن “ايتۋعا وڭاي” باعدارلاماسىنىڭ ستۋدياسىندا كورسەتتى. الدىمەن، تىسىمەن گىر تاسىن كوتەرىپ، 8 كيلوگرامدىق شىنجىرمەن بىرگە سەكىردى. بۇدان وزگە گريلكانى ۇرلەپ جاردى.

نۇرسۇلۋ نايمانوۆا

Abai.kz