عابيت مۇسىرەپوۆتىڭ ايگىلى «قازاق سولداتى» رومانى «زىتىپ كەلەم، زىتىپ كەلەم، ارتىما قاراي-قاراي زىتام» دەپ باستالاتىن ەدى عوي. ءباسپاسوز وكىلدەرىنەن قاشىپ بارا جاتقان بجعم ءمينيسترى ەرلان ساعاديەۆتىڭ مىنا كەيىپى ءبىزدىڭ ەسىمىزگە عابەڭنىڭ سول «زىتىپ كەلەمىن» ءتۇسىردى. تومەندەگى بەينەۇزىكتە مينيستر: «قاشىپ كەلەم، قاشىپ كەلەم، جۋرناليستەرگە قاراي-قاراي قاشامىن» دەپ بارا جاتقان سياقتى. بۇل – شاماسى ماجىلىستەگى «ۇكىمەت ساعاتىنان» كەيىنگى كورىنىس بولسا كەرەك. 20 اقپان كۇنى ماجىلىستەگى «ۇكىمەت ساعاتىندا» دەپۋتاتتار ەرلان ساعاديەۆ باسقاراتىن ۆەدموستۆونىڭ قىزمەتىن سىنعا العان بولاتىن. ونى ايتاسىز، مەكتەپ وقۋلىقتارىنداعى قاتەگە قاتتى اشۋلانعان بەكبولات تىلەۋحان ءتىپتى ءبىلىم مينيسترىمەن شەكىسىپ تە قالعان. كەزەك جاۋاپتاسىپ، قاتتى شارپىسقان دەپۋتات پەن مينيستر اقىر سوڭىندا ورتاق پىكىرگە كەلە الماعان-دى. سودان سوڭ دەپۋتات بەكبولات تىلەۋحان مينيستر ەرلان ساعاديەۆكە:

-2-ءشى سىنىپتىڭ بالاسىنا 7-ءشى سىنىپتىڭ بالاسىنىڭ دەڭگەيىندەگىنى جازىپ بەرۋ – بۇل رۋحاني ديۆەرسيا، ۇرپاقتى قولمەن ءولتىرۋ. وسىنى ادەيى ىستەي مە، الدە، اقىماق پا وسىنى ىسەگەن ادامدار؟ ەرەكە، بۇعان جاۋاپ بەرىڭىز. ال ەگەر قازىر جاۋاپ بەرە الماساڭىز، ءباسپاسوز بەتىندە  مەن ءسىزدى جەكپە-جەككە شاقىرامىن، - دەگەن بولاتىن.

كورىپ وتىرسىزدار، مينيستر ءباسپاسوز بەتىندە دەپۋتاتپەن جەكپە-جەككە شىعۋ بىلاي تۇرسىن، جۋرناليستەر قويعان قاتارداعى ساۋالداردىڭ وزىنەن جالتارىپ، جاۋاپسىز قالدىردى. نەگە؟ ول تىم اسىعىس پا، الدە، باق وكىلدەرىنىڭ ساۋالىنا بەرەر جاۋابى جوق پا؟

بىزدە ءبارى «ەلباسىنىڭ تاپسىرماسىمەن» باستالادى عوي. ال، ەلباسى لاۋازىم يەلەرىنە ۇنەمى: «حالىققا تۇسىنىكتى تىلدە سويلەڭدەر، كوپتىڭ كوكەيىندەگى ساۋالدارعا جاۋاپ بەرىپ، ماسەلەنىڭ ءمان-جايىن ءتۇسىندىرىپ بەرۋدەن باس تارتپاڭدار» دەۋمەن كەلەدى.     

Abai.kz