پارلامەنتتە ءوتىپ جاتقان ۇكىمەت ساعاتىندا دەپۋتات زاعيپا باليەۆا بعم ءمينيسترى ەرلان ساعاديەۆتى بالالار مەن مۇعالىمدەردى سۇيۋگە شاقىردى.

ء "بىز بالالارىمىزدى كىمگە سەنىپ تاپسىرامىز؟ ءبىرىنشى كەزەكتە تاربيەشىلەر مەن مۇعالىمدەرگە. مەن ءمينيستردىڭ بۇگىنگى بايانداماسىندا مامانداردىڭ قالاي دايىندالىپ جاتقاندارىن، جاستاردىڭ پەداگوگيكالىق جوو-عا تۇسۋگە دەگەن قىزىعۋشىلىعى قانداي ەكەنى جايلى ەستيمىن دەپ ويلادىم. مۇندا پروبلەما تەك مامانداردىڭ سانىندا ەمەس، سونداي-اق، ولاردىڭ ساپاسىندا. بۇل ماسەلەنى تەك ءبىلىم مينيسترلىگىندەگىلەر شەشۋ كەرەك دەپ ايتۋعا بولمايدى. بارلىعىمىز بىرىگىپ، وسى ماسەلەنى شەشەيىك. ءبىلىم ءمينيسترى - ول ەلىمىزدەگى ەڭ ءبىرىنشى مۇعالىم. مينيستر، ءسىز بالالاردى جانە مۇعالىمدەردى ءسۇيۋدى ۇيرەنۋىڭىز كەرەك. كەز كەلگەن جاڭا ەرەجە، جاڭا تاجىريبە جايلى باستاپقىدا بالامەن اقىلداسىپ، كەيىننەن مۇعالىمدەرمەن كەلىسىپ، تاجىريبەدەن وتكىزۋ كەرەك. سوسىن عانا ول ەرەجەنى ەنگىزۋ كەرەك. سوندا ءبىز بۇل كەرەك پە، جوق پا - سونى تۇسىنەمىز. مەنىڭشە، ءبىلىم مينيسترلىگى ءوز جۇمىسىن قايتا قاراپ شىعادى. ءتيىپ-قاشىپ رەفورما جاساي بەرۋگە بولمايدى", - دەدى زاعيپا باليەۆا. ال، باليەۆانىڭ ارىپتەسى، دەپۋتات گالينا بايماحانوۆا بولسا، اتالعان مينيسترلىكتەن «عىلىمدى» الىپ تاستاپ، جەكە مينيسترلىك قۇرۋ قاجەت دەدى.

اباي-اقپارات