ميرزياەۆ باس پروكۋراتۋرا مەن ءىىم باسشىلارىنا ءبىر ايدىڭ كولەمىندە تەرگەۋ جانە ىزدەستىرۋ جۇمىستارىمەن اينالىساتىن ادامدارعا ماتەريالدىق ىنتالاندىرۋ جۇيەسىن ەنگىزەتىن جوبانى ازىرلەۋدى تاپسىردى.

– ولار پروكۋراتۋرادا، قاۋىپسىزدىك كەڭەسىندە، ىشكى ىستەر ورگانىندا جۇمىس ىستەيدى. ءبارى ءبىر جۇمىسپەن اينالىسادى. بىراق ەشقانداي ناتيجە جوق. قىلمىستى اشقان ادامدارعا اقشالاي سىياقى بەرۋ كەرەك. ءبىز ولارعا ەكى ەسە، ءۇش ەسە جانە ءتورت ەسەگە دەيىن كوپ جالاقى تولەيمىز. سەبەبى قازىر كىم قىلمىستاردى اشىپ جاتىر، كىم جۇمىس ىستەمەيدى، ءبارى بىردەي جالاقى الادى، – دەدى شاۆكات ميرزياەۆ.

وتستاۆكاداعى ميليتسيا مايورى وتانازار وللوبەرگانوۆ قىلمىستىڭ اشىلمايتىنىنىڭ باستى سەبەبى وزبەك قۇقىق قورعاۋ ورگاندارىنداعى قىزمەتكەرلەردىڭ كاسىبي بىلىكتىلىگى وتە تومەن دەيدى. ول بۇل سالاعا ۇلكەن رەفورما كەرەك دەپ ەسەپتەيدى.

ەسكە سالا كەتەيىك، 9 اقپاندا ۇكىمەت مۇشەلەرىمەن وتكەن جينالىستا شاۆكات ميرزياەۆ ىشكى ىستەر ورگاندارىنىڭ قىزمەتىن قاتاڭ سىنعا العان. ونىڭ سوزدەرىنشە، حالىقتىڭ ميليتسيا قىزمەتكەرلەرىنە كوڭىلى تولمايدى. پرەزيدەنت وتكەن جىلى ىشكى ىستەر ورگاندارىنان 4518 قىزمەتكەردىڭ جۇمىستان شىعارىلعانىن اتاپ ءوتتى. ولاردىڭ كوبى قىزمەتتەرىن اسىرا پايدالانىپ، پارا العان.

اباي-اقپارات